Byamwekele

Kubila Lusa Bantu Bonse

Juba jimo nyenga wikala ku New Zealand watambile vidyo pa jw.org waamba pe Yehoba byo omvwa ku muchima ne kubila bantu lusa. (Isa. 63:7-9) Wafuukwilepo kwingijisha byo afunjile mu uno vidyo ne kumonapo muntu ye akonsha kukwasha. Byo ayile na kupota kajo ne bintutu bikwabo bya kwingijisha pa nzubo, wasambakene mwanamukazhi upitañanatu wabula pa kwikala. Wamwipwizhe inge wakonsha kumupotelapo kajo. Uno mwanamukazhi waswile. Pa kumupa kajo ko amupotejile, wamusapwijile kwingijisha talakiti wa kuba’mba Nanchi Buyanji Bukapwa Nyi?

Uno mwanamukazhi watendekele kujila. Waambile’mba wajinga Kamonyi, pano bino walekele kwingijila Yehoba myaka yavula yapitapo. Luno ulomba kuba’mba Yehoba amukwashe kubwela kwi aye. Nyenga wamupele Baibolo ne kumwipuzha inge wakonsha kutendeka kufunda Baibolo jikwabo.a

Uno mwanamukazhi waswile. Byonka byuba Yehoba, ne atweba twafwainwa kubilanga bantu lusa kuvwangakotu ne balongo betu ne bena Kilishitu mu kipwilo. Kabiji twakonsha kumwesha’mba tuji na lusa inge ke tumonepo mashinda a kusapwilamo bantu.