Ene Mambo Makondo ne Malwañano o Byatwajijila

BUNDENGAMAMBO

Lesa walengele bansemi betu batanshi ba Adama ne Evwa mu kipasha kyanji. (Ntendekelo 1:27) Akino kibena kulumbulula’mba bafwainwe kumwesha byubilo bijipo ne Lesa nabiji mutende ne butemwe. (1 Kolinda 14:33; 1 Yoano 4:8) Pakuba Adama ne Evwa bakaine kukookela Lesa kabiji balengele mambo. Na mambo akino, atweba bonse twaswana bundengamambo ne lufu. (Loma 5:12) Onkao mambo, byo twaswana bundengamambo, javula twikala bingi na milanguluko yatama. Akino kyo kilengela bantu bavula kuba bintu byatama.​—Ntendekelo 6:5; Mako 7:21, 22.

MAKAFULUMENDE A BANTU

Lesa kechi witulengele’mba twilamenga atweba bene na bene ne. Baibolo waamba’mba: “Muntu mwine kechi uji na luusa lwa kwitangijila mu jishinda jo afwainwa kuyamo ne.” (Yelemiya 10:23) Akino kibena kulumbulula’mba, makafulumende a bantu kechi aji na bulume bwa kupwisha makondo ne malwañano ne.

SATANA NE BANDEMONA BANJI

Baibolo waamba’mba: “Pano pa ntanda ponse paji mu bulume bwa kwa aye mubi.” (1 Yoano 5:19) Uno “mubi” ye Satana Diabola kabiji ye mbanzhi mukatampe. (Yoano 8:44) Satana ne bandemona banji bo batundaika bantu kulwa nkondo ne malwañano.​—Lumwekesho 12:9, 12.