‘Salai Anwe Bene ye Mukengijilanga’

1. Pa kuba’mba twikale na lusekelo, ñanyi bintu byo twafwainwa kuba, kabiji mambo ka? (Isaya 48:17, 18)

SHETU wa mwiulu witutemwa bingi, kabiji ukeba’mba twikalenga na lusekelo mu bwikalo bwetu, pa kino kimye ne mu kimye kya kulutwe. (Sapwi. 3:12, 13) Yehoba witulengele na busendwe bwa kuba bintu. Nangwa byonkabyo, Yehoba kechi witupele luusa lwa kwilamanga atweba bene nangwa kwifuukwila kyawama ne kyatama ne. (Sapwi. 8:9; Yele. 10:23) Wayuka’mba pa kuba’mba twikale na lusekelo, twafwainwa kumwingijilanga ne kulondela mikambizho yanji.​—Tangai Isaya 48:17, 18.

2. Satana ukeba’mba twitabile’mba ka, kabiji Yehoba waubilepo ka pa kuba’mba amweshe’mba byaambile Satana bya bubela?

² Satana ukeba’mba twitabile’mba twakonsha kwikala na lusekelo inge ke twitangijile atweba bene, kwakubula kwitutangijila kwi Yehoba. (Nte. 3:4, 5) Pa kuba’mba Yehoba amweshe’mba byaambile Satana bya bubela, waswisha bantu kwilama pa kimye kicheche. Kyamwekeshatu patoka kuba’mba bantu bakankalwa kwilama abo bene. Baibolo waamba pa banabalume ne banabakazhi bajinga bingi na lusekelo na mambo a kwingijila Yehoba. Pa bano paji ne Yesu Kilishitu kabiji ye wajinga na lusekelo bingi kukila bano bonse. Patanshi, twayai twisambe pa bintu byamulengejile kufuukulapo kwingijila Yehoba. Kepo tusakwisamba ne pa ene mambo o twafwainwa kupopwelanga Shetu wa mwiulu. Kyapelako, tusakwisamba pa bintu bimo bitulengejile kufuukulapo kwingijila Yehoba.

ENE MAMBO YESU O AFUUKWIJILEPO KWINGIJILA YEHOBA

3. Ñanyi bintu Satana byo amwesheshe Yesu, kabiji Yesu wafuukwilepo kuba ka?

³ Byo ajinga pano pa ntanda, Yesu wafwainwe kufuukulapo muntu ye afwainwe kwingijilanga. Yesu byo abatizhiwe, Satana wamumwesheshe bufumu bonse bwa pano pa ntanda ne kumwambila’mba usakumupa buno bufumu bonse inge wamufukamina ne kumupopwela. Yesu wamukumbwile’mba: “Fuma papo Satana! Mambo kyanembwa’mba: ‘Wafwainwa kupopwelatu Yehoba Lesa wobe ne kumwingijila aye yenka kwapwa.’” (Mat. 4:8-10) Mambo ka Yesu o aambijile bino? Twayai twisambe pa bishinka bimo byamulengejile kwamba bino.

4-5. Ñanyi bintu bimo byalengejile Yesu kufuukulapo kwingijila Yehoba?

⁴ Kine kintu kyalengejile Yesu kufuukulapo kwingijila Yehoba ke na mambo a kumutemwa. Yesu watemwa bingi Shanji. (Yoa. 14:31) Kikwabo, Yesu wingijila Yehoba mambo wayuka’mba kyo kintu kyawama kyo afwainwa kuba. (Yoa. 8:28, 29; Lum. 4:11) Wayuka kuba’mba Yehoba yo Nsulo ya bumi, waketekelwa kabiji mpanyi. (Sala. 33:4; 36:9; Yako. 1:17) Yehoba kimye kyonse waambanga bya kine kwi Yesu kabiji ye wamupele bintu byonse byo ajinga nabyo. (Yoa. 1:14) Kupusanako na kino, Satana aye waletatu lufu. Satana wa bubela, wa lwiso kabiji ukebatu bintu byamuwamina. (Yoa. 8:44) Kuyuka bino bishinka, kwalengejile Yesu kubula kusatukila Yehoba byonka byaubile Satana.​—Fili. 2:5-8.

⁵ Kintu kikwabo kyalengejile Yesu kufuukulapo kwingijila Yehoba ke na mambo a kuba’mba walangulukilenga pa bintu byawama bikafumamo inge watwajijila kwingijila Yehoba mu bukishinka. (Hebe. 12:2) Wayukile’mba inge watwajijila kwikala wakishinka, ukazhijika jizhina ja Shanji ne kufumyapo bundengamambo ne lufu byaletele Diabola.

ENE MAMBO O TWAFWAINWA KUPOPWELANGA YEHOBA

6-7. Mambo ka bantu bavula lelo jino o babujila kwingijila Yehoba?

⁶ Bantu bavula lelo jino kechi bengijila Yehoba ne, mambo kechi bayuka byubilo byanji byawama byo aji nabyo ne, kabiji kechi bayuka bintu byawama byo ebobila ne. Abino byo byajinga ne bantu mutumwa Paulo bo asapwijileko mu Atene.​—Byu. 17:19, 20, 30, 34.

⁷ Paulo walumbulwijile bantu bo asapwijilengako amba Lesa wa kine “ye upa bantu bonse bumi, muya ne bintu byonse.” Wanungilepo amba: “Mambo aye ye ulengela’mba twikale na bumi ne kwenda.” Lesa ye Mulenga kabiji “ku muntu umo ko ko alengele bisaka byonse bya bantu.” Onkao mambo, aye ye yenkatu ye twafwainwa kupopwelanga.​—Byu. 17:25, 26, 28.

8. Ñanyi kintu Yehoba kyo abula kuba? Lumbululai.

⁸ Byo aji Mulenga kabiji Nkambo walengele bintu byonse, Yehoba uji na luusa lwa kwitukanjikizha’mba tumupopwelenga. Pano bino, kechi byobyo oba ne. Pakuba witupa bintu byavula bitulengela kushiinwa’mba koaji kabiji amba witutemwa atweba bonse pa muntu pa muntu. Ukeba bantu bavula kwikala balunda nanji myaka ne myaka. (1 Timo. 2:3, 4) Na mambo a bino, Yehoba witufunjisha pa kuba’mba tufunjishenga bantu kuyuka kyaswa muchima wanji ne kwibabuula bintu byawama byo akebobila kulutwe. (Mat. 10:11-13; 28:19, 20) Wanengezha bipwilo kabiji witupa bakalama betuta bingi muchima.​—Byu. 20:28.

9. Yehoba umwesha byepi’mba watemwa bantu bonse?

⁹ Yehoba umwesha’mba watemwa bantu ne mu byo oba na bantu bakaana’mba ufwako. Akilangulukai pa bino bishinka: Kufumatu ne kala, bantu bavula belengela mizhilo yaamba pa kyawama ne kyatama. Nangwa byonkabyo, Yehoba wibapa bintu bibalengela kutwajijila kwikala na bumi ne kwikala na lusekelo mu bwikalo bwabo. (Mat. 5:44, 45; Byu. 14:16, 17) Wibalengela kwikala na balunda bawama, kusema baana ne kwingila mingilo ibalengela kumwenamo bintu byawama. (Sala. 127:3; Sapwi. 2:24) Abino bishinka byonse bimwesha patoka kuba’mba Shetu wa mwiulu watemwa bantu bonse. (Lupu. 34:6) Pano twayai twisambe pa bintu bimo bitulengela kufuukulapo kwingijila Yehoba ne byo etupesha.

ENE MAMBO O TWAFUUKWIJILEPO KWINGIJILA YEHOBA

10. (a) Ñanyi kine kintu kitulengela kwingijila Yehoba? (Mateo 22:37) (b) Mwamwenamo byepi Yehoba byo emutekenya? (Salamo 103:13, 14)

¹⁰ Byonka byaubile Yesu, ne atweba twingijila Yehoba na mambo a kumutemwa. (Tangai Mateo 22:37.) Kufunda pa byubilo byawama biji ne Yehoba kwitulengela kufwenya kwipi ne aye. Akilangulukai pe Yehoba byo etutekenya. Bena Isalela byo basatukile, wibasashijile amba: “Bwelai, lekai kuba bintu byatama.” (Yele. 18:11) Yehoba wayuka’mba twi bambulwakulumbuluka kabiji uvuluka’mba twi lukungu. (Tangai Salamo 103:13, 14.) Inge ke mulanguluke languluke pe Yehoba byo emutekenya ne pa byubilo byanji bikwabo byawama, nanchi kino kechi kimulengela kukeba kumwingijila myaka ne myaka nenyi?

11. Ñanyi bintu bikwabo bitulengela kufuukulapo kwingijila Shetu wa mwiulu?

¹¹ Kabiji kintu kikwabo kitulengela kufuukulapo kwingijila Yehoba ke na mambo a kuba’mba twayuka’mba kyo kintu kyanema kyo twafwainwa kuba. (Mat. 4:10) Kabiji twayuka’mba inge twatwajijila kwingijila Yehoba mu bukishinka, tukamwenamo bintu byawama. Kutwajijila kwikala bakishinka kwitulengela kuzhijika jizhina ja Yehoba, kumwesha’mba Diabola wa bubela ne kusangajika Shetu wa mwiulu. Kabiji inge twafuukulapo kwingijila Yehoba luno, kino kiketulengela kumwingijila myaka ne myaka.​—Yoa. 17:3.

12-13. Ñanyi bintu byo tufunjilako ku byapichilemo nyenga Jane ne Pam?

¹² Nangwatu kimye kyo tukiji banyike, twakonsha kutemwa Yehoba, kabiji inge ke tukome, buno butemwe bukayanga na kubayilako. Akilangulukai pa bankasa ne kolo abo ba Jane ne Pam.a Kimye kyo batendekele kufunda Baibolo, umo wajinga na myaka 11, mukwabo na myaka 10. Nangwa kya kuba bansemi babo kechi bakebelenga kufunda Baibolo ne, baswishishe Jane ne Pam kwibafunjishanga Baibolo ku Bakamonyi ba kwa Yehoba. Nangwa byonkabyo, bano bansemi babo bebambijile kuba’mba bafwainwe kuyanga nabo ku chechi kwabo ku mpelo ya mulungu. Jane waambile’mba: “Bintu byamfunjishanga Bakamonyi byafumine mu Baibolo kabiji byankwashishe kubula kwingijishanga michi ipendañana ne kuchinuzhuka byubilo bikwabo byatama byaubanga bakwetu.”

¹³ Kabiji byo papichile myaka icheche, bano bankasa ne kolo baikele ke basapwishi. Mu kuya kwa kimye, batendekele mwingilo wa bupainiya aku saka balama bansemi babo bakota. Byo alangulukilenga pa bintu byo apichilemo, Jane waambile’mba: “Nafunjile kuba’mba Yehoba uta bingi muchima balunda nanji bakishinka. Kabiji kwesakana na byaamba 2 Timoti 2:19, ‘Yehoba wayuka banji.’” Kwakubula nangwa kuzhinaukatu ne, Yehoba uta muchima aba bamutemwa kabiji bamwingijila.

14. Bintu byo twamba ne byo tuba bifumyapo byepi mwenga pa jizhina ja Yehoba? (Monai ne bipikichala.)

¹⁴ Tukeba kukwasha bantu kuyuka bukine bwaamba pe Yehoba ne kufumyapo mwenga pa jizhina janji. Akilangulukai pa kino: Muji na mulunda nenu wa lusa, mpanyi kabiji ulekelako bakwabo mambo. Juba jimo, mwaumvwa muntu na kwamba byatama pa uno mulunda nenu kuba’mba wakanama kabiji kechi wakishinka ne. Mwakonsha kuba byepi? Kwakubula nangwa kuzhinaukatu ne, mukamwambilako pa kuba’mba mumuzhikijile. Kyo kimotu, inge Satana ne bantu banji baamba bintu byatama pe Yehoba kupichila mu kwamba bya bubela pe aye, twibakumbula inge ke twambe bukine pe Yehoba ne kuzhijika jizhina janji. (Sala. 34:1; Isa. 43:10) Tumwesha’mba tukeba kwingijila Yehoba na muchima wetu yense kupichila mu bintu byo twamba ne byo tuba.

15. Ñanyi bintu bimo byawama mutumwa Paulo byo amwenejilemo pa kusankilapo bintu bimo mu bwikalo bwanji? (Filipai 3:7, 8)

¹⁵ Tupimpulako bwikalo bwetu pa kuba’mba twingijileko Yehoba pakatampe. Abino byo byaubile ne mutumwa Paulo. Wasankijilepo kifulo kikatampe kyo ajinga nakyo mu bupopweshi bwa Bayudea pa kuba’mba ekale mwana wa bwanga wa kwa Kilishitu ne kwingijila Yehoba. (Nga. 1:14) Waingijijilenga Yehoba na lusekelo ne kwikala na luketekelo lwa kulama pamo ne Kilishitu mwiulu. Kechi wilangulwishepo pa byo afuukwilepo kwingijila Yehoba ne. Ne atweba kechi tukelangulushapo ne.​—Tangai Filipai 3:7, 8.

16. Ñanyi bintu byo tufunjilako ku byaubile Julia? (Monai ne bipikichala.)

¹⁶ Inge twanemeka kwingijila Yehoba mu bwikalo bwetu, tukekalanga bwikalo bwawama pa kino kimye ne kulutwe. Akilangulukai pa byapichilemo nyenga Julia. Saka akyangye kufunda bukine, wajinga mu jibumba ja banyimbi mu chechi kufumatu ku bwanyike. Na mambo a kuba’mba waimbanga bingi bulongo, bamutulukile ku shenyenye wa nyimbo kabiji watendekele kumufunjisha. Mu kimyetu kicheche, Julia watumbalele bingi kabiji watendekele kwimba nyimbo mu bishimikwa bikatampe mwaimbilanga bashenyenye ba nyimbo. Byo atendekele kufunda pa sukulu waya bingi nkuwa po bafunjisha bya nyimbo, mwanamulume umo mo bafunjilanga watendekele kwisamba nanji pe Lesa ne kumulumbulwila’mba jizhina ja Lesa Yehoba. Palutwe kacheche, Julia watendekele kufunda Baibolo jibiji mu mulungu. Mu kuya kwa kimye, wafuukwilepo kutendeka kwingijila Yehoba mu bwikalo bwanji kabiji wasankijilepo mwingilo wanji wa bunyimbi. Kechi kyapelele kufuukulapo bino ne. Julia waambile’mba: “Bantu bavula bañambilanga’mba ubena konauna kya bupe kya kupa Lesa. Pano bino nakebelenga kwingijila Yehoba mu bwikalo bwami. Inge wavuluka kino kintu kyo afuukwilepo kuba pa myaka 30 yapitapo, umvwa byepi ku muchima? Waambile’mba: “Nji na mutende wa mu milanguluko, kabiji nayuka kuba’mba kulutwe, Yehoba ukangubila bintu byonse byo nkeba.”​—Sala. 145:16.

TWAJIJILAI KWINGIJILA YEHOBA

17. Kuyuka kuba’mba tuji ku mpelo kwine kwa buno bwikalo kwafwainwa kulengela aba bafuukulapo kala kwingijila Lesa ne boba bakyangye kuba bino kuba ka?

¹⁷ Tubena kwikala ku mpelo kwine kwa buno bwikalo. Mutumwa Paulo wanembele’mba: “Mambo pakishala ‘pacheche,’ ne ‘yewa ubena kwiya ukafika kabiji kechi ukabanda ne.’” (Hebe. 10:37) Kino kyafwainwa kwitulengela kuba ka? Kimye kyashalako kya kuba’mba bantu bafuukulepo kwingijila Yehoba kyakepa bingi. (1 Ko. 7:29) Nangwa kya kuba twafuukulapo kala kwingijila Lesa, twayuka’mba twafwainwa kuchinchika meseko, pano bino ano meseko ke a ‘pa kakimyetu kacheche.’

18. Yesu ne Yehoba betutundaika kuba ka?

¹⁸ Yesu watundaikile bantu kwikala baana banji ba bwanga ne kutwajijila kumulondela. (Mat. 16:24) Onkao mambo, inge twatendekele kala kwingijila Yehoba, kechi twafwainwa kuleka ne. Twafwainwa kwibikako kutwajijila kumwingijila. Kechi kyapeela kumwingijila ne. Pano bino, kuba bino kuketulengela kumwenamo byawama nangwatu pa kino kimye.​—Sala. 35:27.

19. Ñanyi bintu byo tufunjilako ku byaubile mulongo Gene?

¹⁹ Bamo balanguluka’mba kwingijila Yehoba kukebalengela kubula kwikala na lusekelo. Inge mwi banyike, nanchi mulanguluka’mba mukashalapo pa bintu byawama inge kemwingijile Yehoba nyi? Mulongo wakyanyike aye Gene waambile’mba: “Nalangulukanga’mba kwikala Kamonyi wa kwa Yehoba kukandengelanga kubula kubako bintu bimo byo natemwa. Namwene kuba’mba bakwetu bavula mo twakomejile baubilenga bintu bimo bibaletelanga bingi lusekelo nabiji kwikala na bijiilo, kwikala na basambe ne kukaya makayo atama a pa intaneti. Amiwa nayangatu ku kupwila ne mu mwingilo wa kusapwila.” Ino ndangulukilo yalengejile Gene kutendeka kuba ka? Waambile’mba: “Natendekele kwikala bwikalo bwa bukakongolo mutoma kubiji ne kwivwanga mu bya kisangajimbwe byaubangapo bakwetu. Pano bino, abino byonse kechi byandengejile kwikala na lusekelo mu bwikalo bwami ne. Natendekele kulanguluka pa buneme bwa kukookela bintu byo nafunjile mu Baibolo, kabiji nafuukwilepo kwingijila Yehoba na muchima wami yense. Kufumatu kyokya kimye, nemwena patoka kuba’mba Yehoba unkwasha mu bintu byonse byo namulomba.”

20. Ñanyi kintu kyo twafwainwa kutwajijila kuba?

²⁰ Nyimbi wa Salamo waimbile kwi Yehoba amba: “Ye mwine wa lusekelo ye musala ne kumuleta kwipi kuba’mba ekale mu bipango byenu.” (Sala. 65:4) Twayai atweba bonse tutwajijile kwingijila Yehoba byonka byaubile Yoshua waambile’mba: “Pakuba amiwa ne ba mu nzubo yami, tukengijilanga Yehoba.”​—Yosh. 24:15.