Kwashai bo Mufunjisha Baibolo Kufuukulapo Kwingijila Yehoba

1-2. (a) Mambo ka bafunda Baibolo bamo o bakankazhamina kufuukulapo kwingijila Yehoba? (b) Ñanyi bintu byo tusakwisambapo mu uno mutwe?

NANCHI kujipo bintu bimulengejilenga kukankazhama kufuukulapo kwikala Kamonyi wa kwa Yehoba nyi? Kampe mwaakaminwe amba bantu bo mwingila nabo ku nkito, balunda nenu nangwa ba mu kisemi kyenu bakemushikwa. Nangwa kampe mwalangulukilenga’mba kikemukatazha kukookelanga mikambizho ya Lesa. Inge ibyo, ko kuba’mba mwayuka ene mambo bantu bamo bafunda Baibolo o bakankazhamina kufuukulapo kwingijila Yehoba.

² Yesu wayukile’mba bintu bya uno mutundu byakonsha kulengela bafunda Baibolo kukankalwa kwingijila Yehoba. (Mat. 13:20-22) Pano bino, kechi wasankijilepo bantu bakankazhaminenga kumulondela ne. Pakuba wafunjishe baana banji ba bwanga bya kukwasha bantu ba uno mutundu, (1) kuyuka bintu bibalengejilenga kubula kuyilako palutwe, (2) kutemwa bingi Yehoba, (3) kuyuka bintu byanemesha mu bwikalo bwabo, ne (4) kushinda mikiika yabo. Twakonsha kulondela byepi bintu Yesu byo afunjishe baana banji ba bwanga pa kwingijisha buku wa Mukekala Myaka ne Myaka! pa kuba’mba tukwashe bo tufunjisha Baibolo kufuukulapo kwingijila Yehoba?

KWASHAI YE MUFUNJISHA BAIBOLO KUYUKA BINTU BIBENA KUMULENGELA KUBULA KUYILAKO PALUTWE

3. Ñanyi kintu kyakonsheshe kulengela Nikodema kubula kwikala mwana wa bwanga wa kwa Yesu?

³ Nikodema ntangi wa Bayudea wayile bingi nkuwa, wachiinenga kwikala mwana wa bwanga wa kwa Yesu. Yesu byo aingijile mwingilo wanji pa ba ñondo batanu na umo, Nikodema wayukile’mba Yesu bamutumine kwi Lesa. (Yoa. 3:1, 2) Nangwa byonkabyo, Nikodema wayile na kumonañana ne Yesu ku mbaji mambo ‘wachiinenga Bayudea.’ Kampe wachiinenga’mba basakumufumya pa kifulo kyanji inge waikala mwana wa bwanga wa kwa Yesu.a

4. Yesu wakwashishe byepi Nikodema kuyuka bintu Lesa byo akebelenga’mba obe?

⁴ Nikodema wayukile mizhilo ya Mosesa, pano bino wakebewenga kumukwasha pa kuba’mba ayuke Yehoba byo akebelenga amba obe. Yesu wamukwashishe byepi? Na mambo a kuba’mba Yesu wakebanga kukwasha bantu, waswile kwisamba ne Nikodema bufuku. Yesu walumbulwijile bulongo Nikodema byo afwainwe kuba pa kuba’mba ekale mwana wa bwanga. Wamwambijile’mba wafwainwe kulapila, kubatizhiwa mu mema ne kwitabila mu Mwana Lesa.​—Yoa. 3:5, 14-21.

5. Twakonsha kukwasha byepi ye tufunjisha Baibolo kuyuka bintu bibena kumulengela kubula kuyilako palutwe?

⁵ Nangwa kya kuba ye mufunjisha Baibolo wayuka Binembelo, mwafwainwa kumukwasha kuyuka bintu bibena kumulengela kubula kuyilako palutwe. Nkito yo engila nangwa kumukanya ku ba mu kisemi kwakonsha kumulengela kubula kwikala Kamonyi wa kwa Yehoba. Onkao mambo, kwashainga ye mufunjisha Baibolo byonka byaubanga Yesu. Mwakonsha kumwita ku nzubo kuba’mba mujiile pamo nanji kajo nangwa kuya na kololako maulu. Inge mwauba bino, mukamulengela kukasuluka ne kwimubuula makatazho o abena kupitamo. Tundaikai ye mufunjisha Baibolo kupimpula byubilo byanji na mambo a kutemwa Yehoba, kechi na mambo a kukeba kwimutokesha ku muchima ne.

6. Mwakonsha kukwasha byepi ye mufunjisha Baibolo kwibikako kwingijila Yehoba? (1 Kolinda 16:13)

⁶ Inge ye mufunjisha Baibolo washiinwa’mba Yehoba ukamukwashanga kukookela mizhilo ya mu Baibolo, ukebikangako kwingijisha byo abena kufunda. (Tangai 1 Kolinda 16:13.) Mwingilo ye mwingila twakonsha kumwesakanya ku mwingilo wingila mufunjishi wa pa sukulu. Inge mwavuluka moba o mwajinga ku sukulu, ñanyi mufunjishi ye mwatemenwe bingi? Kampe muvuluka mufunjishi wimutekenyanga ne kwimutundaika kuba’mba mwakonsha kuba bulongo. Po pamotu, mufunjishi wayuka kufunjisha bantu Baibolo kechi wibafunjishatu kuyuka bikeba Lesa ne, bino wibakwasha ne kuyuka’mba Yehoba wakonsha kwibakwasha kupimpula byubilo byabo. Mwakonsha kuba byepi bino?

KWASHAINGA YE MUFUNJISHA BAIBOLO KUTEMWA BINGI YEHOBA

7. Yesu wakwashishe byepi bantu bo afunjishenga kutemwa bingi Yehoba?

⁷ Yesu wayukile’mba kutemwa Lesa kukalengela baana banji ba bwanga kwingijisha bintu byo bafunjile. Javula wibafunjishanga bintu bibakwashanga kutemwa bingi Shabo wa mwiulu. Waesakenye Yehoba ku muntu upa baana banji bintu byawama. (Mat. 7:9-11) Bantu bamo Yesu bo afunjishenga kechi bajingapo na bansemi bebatemenwe mu jino jishinda ne. Akilangulukai pa lusekelo lo bajinga nalo Yesu byo aambile kishimpi kya nsemi wa butemwe watambwijile mwananji waelekele wabwelele pa nzubo. Bashiinwe kuba’mba Yehoba watemwa bingi baana banji pano pa ntanda.​—Luka 15:20-24.

8. Mwakonsha kukwasha byepi muntu ye mufunjisha Baibolo kutemwa bingi Yehoba?

⁸ Ne anweba mwakonsha kukwasha muntu ye mufunjisha Baibolo kutemwa bingi Yehoba inge ke mumukwashe kwikala na byubilo bijipo ne Yehoba. Kimye kyo mubena kumufunjisha Baibolo, mukwashai kuyuka bintu byo abena kufunda byo byakonsha kumulengela kuyuka’mba Yehoba witutemwa. Kabiji pa kwisamba pa bukuzhi, mulumbulwilai byo akonsha kumwenamo mu bukuzhi. (Loma 5:8; 1 Yoa. 4:10) Muntu ye mufunjisha Baibolo ukatemwa bingi Yehoba inge kealanguluke pe Yehoba byo amutemwa.​—Nga. 2:20.

9. Ñanyi kintu kyalengejile Michael kupimpula bwikalo bwanji?

⁹ Akilangulukai pe Michael wikala mu kyalo kya Indonesia. Wakomejile mu kisemi kya Bakamonyi, pano bino kechi wabatizhiwe ne. Byo afikizhe myaka 18, wayile ku kyalo kingi na kwingila nkito ya kwendesha myotoka ikatampe. Palutwe kacheche wasongwele, nangwa byonkabyo washile kisemi kyanji ne kutwajijila na kwingila nkito mu kyalo kingi. Mukazhanji ne mwananji wamukazhi batendekele kufunda Baibolo kabiji baubilenga bingi bulongo. Bainanji byo bafwile, Michael wabwelele ku kyalo kyanji kuba’mba akalamenga bashanji kabiji waswile kufunda Baibolo. Byo afikile mu lufunjisho 27 mu buku wa Mukekala Myaka ne Myaka!, pa kipungu kya kuba’mba “Funjilaipo Bikwabo,” wafunjile bintu byamufikile bingi pa muchima. Byo alangulukilenga pe Yehoba byo aumvwinenga ku muchima pa kumona Mwananji na kumanama, Michael walakeshe mipolo. Kino kyamulengejile kunemeka bingi bukuzhi kabiji wapimpwile bwikalo bwanji ne kubatizhiwa.

KWASHAINGA YE MUFUNJISHA BAIBOLO KUYUKA BINTU BYANEMESHA MU BWIKALO BWANJI

10. Yesu wakwashishe byepi baana banji ba bwanga batanshi kuyuka bintu byanemesha? (Luka 5:5-11) (Monai ne kipikichala.)

¹⁰ Baana ba bwanga batanshi ba kwa Yesu bayukile’mba Yesu wajinga Mesiasa walailwe, pano bino bakebewenga kwibakwasha kunemeka mwingilo wa kusapwila mu bwikalo bwabo. Pa kikye kimye, Petelo ne Andeleo bajinga baana ba bwanga ba kwa Yesu byo ebechile kuba’mba bamulondelenga. (Mat. 4:18, 19) Baingilanga mwingilo wa kukwata masabi kabiji kyamweka baingijilanga pamo na Yakoba ne Yoano. (Mako 1:16-20) Petelo ne Andeleo byo “bashile makonde abo” ne kulondela Yesu, kyamweka banengezhezhepo mashinda a kumwena ba mu kisemi kyabo bintu bikebewa. Ñanyi kintu kibalengejile kuyuka bintu byanemesha mu bwikalo bwabo? Jishimikila jiji mu Luka jitubuula’mba Yesu waubile kya kukumya kibalengejile kushiinwa kuba’mba Yehoba ukebapanga bintu byo bakeba.—Tangai Luka 5:5-11.

11. Ñanyi bintu byo twakonsha kubuula muntu ye tufunjisha Baibolo pa kuba’mba tukoseshe lwitabilo lwanji?

¹¹ Kechi twakonsha kuba bya kukumya byonka byaubanga Yesu ne, pano bino twakonsha kubuula bantu bo tufunjisha Baibolo kuba’mba Yehoba ukwasha boba batangizhako bya Bufumu mu bwikalo bwabo. Abya mwakonsha kuvuluka Yehoba byo emukwashishe kimye kitanshi kyo mwatendekele kupwila nyi? Kampe mwisambile na mukulumpe wa nkito ne kumulumbulwila ene mambo o mwafuukwijilepo kubula kwingilanga panyuma ya kukomboka ku nkito pa moba a kupwila. Pa kubuula bo mufunjisha Baibolo bino bintu, balumbulwilai lwitabilo lwenu byo lwakosejileko pa kumona Yehoba byo emukwashishe kufuukulapo bulongo pa kuba’mba mutangizheko bya Bufumu mu bwikalo bwenu.

12. (a) Mambo ka o twafwainwa kusendangako basapwishi bapusana pusana ku muntu ye tufunjisha Baibolo? (b) Mwakonsha kwingijisha byepi mavidyo pa kuba’mba mukwashe muntu ye mufunjisha Baibolo? Lumbululai.

¹² Muntu ye mufunjisha Baibolo ukamwenamo bingi inge waumvwa byauba bena Kilishitu bakwabo pa kuba’mba batangizheko bya bufumu mu bwikalo bwabo. Onkao mambo, sendainga basapwishi bapusana pusana ku muntu ye mufunjisha Baibolo. Bepuzhai kuba’mba bamulumbulwile byo bafunjile bukine ne bintu byo baubile pa kuba’mba bengijilenga Yehoba mu bwikalo bwabo. Kunungapo, tambainga mavidyo na muntu ye mufunjisha Baibolo aji pa kipungu kya kuba’mba “Funjilaipo Bikwabo” ne kya kuba’mba “Kebai Bishinka Bikwabo” mu buku wa Mukekala Myaka ne Myaka! Twambe’mba mubena kufunda mu lufunjisho 37, mwakonsha kwamba pa bishinka biji mu vidyo wa kuba’mba Yehoba Uketupa byo Tukeba.

KWASHAINGA YE MUFUNJISHA BAIBOLO KUSHINDA MIKIIKA YANJI

13. Yesu wakwashishe byepi baana banji ba bwanga kwinengezha ku lumanamo?

¹³ Pa bimye byavula, Yesu wabuujile baana banji ba bwanga kuba’mba bakebamanyikanga ku bantu kuvwangakotu ne balongo babo. (Mat. 5:11; 10:22, 36) Yesu byo ajinga pepi kupwisha mwingilo wanji, wajimwineko baana banji ba bwanga kuba’mba bakonsha ne kwibepaya. (Mat. 24:9; Yoa. 15:20; 16:2) Wibambijile’mba bafwainwa kujimuka bingi mu mwingilo wabo. Wibatundaikile kwikala bajimuka ne kubula kwipachika na bantu bebakainyenga pa kuba’mba batwajijile kwingila mwingilo wa kusapwila.

14. Twakonsha kukwasha byepi bantu bo tufunjisha Baibolo kwinengezha ku lumanamo? (2 Timoti 3:12)

¹⁴ Twakonsha kukwasha bo tufunjisha Baibolo kwinengezha ku lumanamo kupichila mu kwibalumbulwila bintu byakonsha kwiboba bantu bo bengila nabo ku nkito, balunda nabo ne balongo babo. (Tangai 2 Timoti 3:12.) Bantu bamo mo bengijila bakonsha kutendeka kwibendeleka na mambo a kulondela bintu byo babena kufunda mu Baibolo. Bantu bakwabo nabiji balongo babo nabo bakonsha kukana bintu byo baitabilamo. Inge twakwasha bukiji bo tufunjisha Baibolo kwinengezha ku lumanamo, kino kikebakwasha kuyuka bya kuba inge batendeka kwibamanyika.

15. Ñanyi bintu byakonsha kukwasha muntu ye mufunjisha Baibolo kuyuka bya kuba inge babena kumukanya ku ba mu kisemi kyanji?

¹⁵ Inge muntu ye mufunjisha Baibolo kebamukanye ku ba mu kisemi kyanji, mutundaikai kuyuka bine bintu bibena kulengela balongo banji kuzhingila. Bano balongo banji bakonsha kulanguluka’mba Bakamonyi ba kwa Yehoba babena kumutwala mungi nangwa amba Bakamonyi ba kwa Yehoba ke bantu batama bingi. Nangwatu Yesu kechi bamutemenwe ku balongo banji bamo na mambo a byo aubilenga ne. (Mako 3:21; Yoa. 7:5) Kwashai muntu ye mufunjisha Baibolo kutwajijila kutekanya ne kuyuka mwakubila na bantu ne na balongo banji.

16. Twakonsha kukwasha byepi muntu ye tufunjisha Baibolo kwisamba na ba mu kisemi kyanji bintu byo aitabilamo mu jishinda jawama?

¹⁶ Inge ba mu kisemi kyanji kebakebe kufunda Baibolo, muntu ye mufunjisha Baibolo kechi wafwainwa kwibalumbulwila bintu byavula pa kimye kimo ne. Inge wibalumbulwila byavula, bakonsha kukimwa ne kukaana kwibabuulako bintu byo aitabilamo pa kimye kikwabo. Onkao mambo, tundaikai muntu ye mufunjisha Baibolo kwisambanga na ba mu kisemi kyanji bintu byo aitabilamo. Wafwainwa kwisambanga nabo bintu bicheche. Kino kikebalengela kuswa kwibabuulako bintu byo aitabilamo ne pa kimye kikwabo. (Kolo. 4:6) Kampe wakonsha ne kwibatundaika kuya pa keyala wa jw.org. Kino kikebalengela kufunjilapo byavula pa Bakamonyi ba kwa Yehoba pa kimye kyo bakeba abo bene.

17. Mwakonsha kukwasha byepi muntu ye mufunjisha Baibolo kuyuka bya kulumbulwila bantu pa bintu bya bubela byo bamba pa Bakamonyi ba kwa Yehoba? (Monai ne kipikichala.)

¹⁷ Mwakonsha kwingijisha mitwe iji pa jw.org pa kipungu kya kuba’mba “Mepuzho o Bepuzha Javula pa Bakamonyi ba kwa Yehoba” kuba’mba mukwashe ye mufunjisha Baibolo kwinengezha kukumbula mepuzho o bamwipuzha ku balongo banji nangwa bantu bo engila nabo. (2 Timo. 2:24, 25) Inge mwapwisha kufunda nanji lufunjisho, pitulukaimo nanji pa kipungu kya kuba’mba “Bantu Bamo Bamba’mba,” mu buku wa Mukekala Myaka ne Myaka! Tundaikai muntu ye mufunjisha Baibolo kupituluka mu byo afwainwa kwibakumbula. Mwakonsha kumukwasha kuyuka mashinda apusana pusana a kulumbulwilamo bulongo bintu byo aitabilamo. Kupitulukamo nanji mu bino bintu kukamukwasha kulumbulwila bakwabo bulongo bintu byo aitabilamo ne byo abula kwitabilamo.

18. Mwakonsha kutundaika byepi ye mufunjisha Baibolo kutendeka kwingilako mwingilo wa kusapwila? (Mateo 10:27)

¹⁸ Yesu watundaikile baana banji ba bwanga kusapwila mambo awama ku bantu. (Tangai Mateo 10:27.) Inge ye mufunjisha Baibolo watendeka bukiji kubuulako bakwabo bintu byo aitabilamo, ukamona Yehoba byo akamukwashanga kabiji kino kikamulengela kuketekela mwi Yehoba. Mwakonsha kukwasha byepi ye mufunjisha Baibolo kwibikila kino kikonkwanyi? Inge babijika ku kipwilo kuba’mba kukekala mukwekele wa kusapwila, isambai na ye mufunjisha Baibolo ne kumutundaika kuyuka byo afwainwa kuba pa kuba’mba afikilemo kwikala musapwishi. Mulumbulwilai kuba’mba mu kimye kya mukwekele kyapeela bingi kutendeka kusapwila. Wakonsha ne kwibikila kikonkwanyi kya kutendeka kwamba majashi pa kupwila kwa mukachi ka mulungu. Kutendeka kwamba majashi pa kuno kupwila, kukamukwasha kuyuka bya kulumbulwila bulongo bantu bintu byo aitabilamo.

KETEKELAI YE MUFUNJISHA BAIBOLO AMBA WAKONSHA KUBA BULONGO

19. Yesu wamwesheshe byepi’mba waketekejile baana banji ba bwanga, kabiji twakonsha kulondela byepi byo aubile?

¹⁹ Yesu saka akyangye kuya mwiulu, wabuujile baana banji ba bwanga kuba’mba bakekala bonse pamo jibiji. Kechi bakwatakenye kuba’mba Yesu waambilenga pe abo amba bakaya mwiulu ne. Nangwa byonkabyo, Yesu wayukile’mba bajinga bakishinka nangwa kya kuba kechi bayukile byavula ne. (Yoa. 14:1-5, 8) Wayukile’mba pafwainwe kupita kimye pa kuba’mba bakwatakanye bintu bimo nabiji luketekelo lwabo lwa kuya mwiulu. (Yoa. 16:12) Ne atweba twakonsha kuketekela’mba bo tufunjisha Baibolo nabo bakonsha kutookesha Yehoba ku muchima.

20. Nyenga wikala mu kyalo kya Malawi wamwesheshe byepi’mba waketekejile muntu ye afunjishanga Baibolo?

²⁰ Twafwainwa kuketekela’mba bantu bo tufunjisha Baibolo bakeba kuba byawama. Akilangulukai pe nyenga wikala mu kyalo kya Malawi aye Chifundo. Watendekele kufunda Baibolo na nsongwakazhi wa mu Katolika aye Alinafe, kwingijisha buku wa Mukekala Myaka ne Myaka! Byo bapwishishe lufunjisho 14, nyenga Chifundo waipwizhe ye afunjishenga Baibolo kwamba byo alangulukapo pa kwingijisha bipashañano mu mpopwelo. Alinafe wazhingijile bingi kabiji wakumbwile’mba: “Nakonsha kwifuukwilapo amiwa mwine kwingijisha bipashañano nangwa ne.” Nyenga Chifundo walangulukile’mba kampe Alinafe usakuleka kufunda Baibolo. Nangwa byonkabyo, wamutekenyejile kabiji watwajijile kumufunjisha Baibolo. Nyenga Chifundo washiinwe’mba mu kuya kwa kimye, Alinafe ukayuka’mba kyatama kwingijisha bipashañano mu mpopwelo. Byo papichile bañondo bacheche, uno nyenga waipwizhe Alinafe bwipuzho buji mu lufunjisho 34 bwa kuba’mba, “Ñanyi bintu byawama byo mwamwenamo kufuma kimye kyo mwatendekele kufunda Baibolo, ne kufunda pe Lesa wa kine aye Yehoba?” Nyenga Chifundo washimikizha byakumbwile Alinafe amba, “Waambile bishinka byavula bingi. Kishinka kimo kyo aambile ke kya kuba’mba Bakamonyi ba kwa Yehoba kechi boba bintu byakanya Baibolo ne.” Palutwe kacheche, walekele kwingijisha bipashañano mu mpopwelo kabiji wabatizhiwe.

21. Twakonsha kukwasha byepi muntu ye tufunjisha Baibolo kufuukulapo kwingijila Yehoba?

²¹ Nangwa kya kuba Yehoba ye ‘ukomesha,’ bino ne atweba tuji na mwingilo wa kukwasha muntu ye tufunjisha Baibolo kuyilako palutwe. (1 Ko. 3:7) Kechi tumufunjishatu kuba bintu Lesa byo akeba’mba obenga ne, bino kuji ne bintu bikwabo byo twafwainwa kumukwasha kuba. Twafwainwa kumukwasha kutemwa bingi Yehoba. Kabiji twafwainwa kumutundaika kuyuka bintu byanemesha mu bwikalo bwanji. Twafwainwa ne kumufunjisha kuketekela mwi Yehoba inge keapite mu makatazho. Inge twamuketekela, kino kikamulengela kushiinwa’mba naye wakonsha kwikela mwayila mizhilo ya Yehoba ne kutwajijila kumwingijila.