Kupana Musampi mu Sri Lanka

BALONGO ne banyenga bavwajile bivwalo byakishakulu bya bena Sri Lanka batambwijilenga balongo ne banyenga 130 bafumine mu byalo 19 baishile na kutanwa ku kupwila kwa kupana musampi pa jino jikuji. Jibumba ja banyike jaimbilenga nyimbo ya Bufumu kabiji bonse beyowele bya kishakulu byo batambilenga, kajo ka konkakwa, ne nyimbo yapita mu kyaji, ne kupwanañana kwa bwina Kilishitu.

Bishimikwa byo bashimikile ne byo bawamishe byonse bebipaine kwi Yehoba pa Kibelushi pa 11 January mu 2014. Bantu 893 bo bashikilwe ku uno mutanchi ye bantuntulwilenga mu milaka isatu. Bajinga mu luonde bapopwejile pa kimye kyabaya bingi mulongo Mark Sanderson wa mu Jibumba Jitangijila byo aipwi­zhe’mba: “Nanchi mubena kukeba kupana bino bishimikwa kwi Yehoba Lesa nyi?”

Juba jalondejilepo bantu 7,701 beyowele mutanchi wa kupituluka mu bishinka byajingako pa Kibelushi ne jashi jalutundaiko jaambile Mulongo Sanderson. Mapunzha atanu a mu kino kyalo kwajinga bantu bavula bingi beakwatakenye ku uno mutanchi. Kyo kyajinga kimye kitanshi balongo ne banyenga pa jino jikuji jonse kwimbila pamo nyimbo ya Bufumu. Kyajinga bino, mambo mabumba o bakwatakenye atambilenga pa vidyo. Kuno kupwila ko bakabula kulubamo kwaletele bingi “lusekelo lukatampe.”​—Neh. 12:43.