Byamwekele mwaka wapwa

NANGWA kya kuba mu ntanda ya kwa Satana mubena kumweka bya malwa kimye kyonse, bino bapopweshi ba Yehoba ba kine batwajijila kwikala “na bya kuba byavula mu mwingilo wa Nkambo.” (1 Ko. 15:58) Sawakya uji panshipo wamwesha Bakamonyi ba kwa Yehoba mwaya ntanda byo batwajijila “[kuketekela] mwi Yehoba . . . , kuba bintu byawama . . . , ne kubila bintu mu bukishinka.”—Sala. 37:3.

Kuvilula Ofweshi Mukatampe wa Ntanda Yonse ne Ofweshi wa Musampi

Mwingilo wa kubayishako bishimikwa ku Wallkill, mu muzhi wa New York, wapwile pa 1 February, 2016. Kino kyalengijile Kavoto ka Musampi wa United States kuvilukila ku Wallkill pamo na Dipatimenti Utala pa Bibena Kwenda Mwingilo ne madipatimenti akwabo ajinga pa ofweshi wa musampi wa United States. Kabiji byo kwashalatu pacheche kupwisha mwingilo wa kushimika ofweshi mukatampe wa ntanda yonse ku Warwick, ba mu kisemi kya Betele mu Brooklyn babena kuviluka kufuma mu muzhi wa New York kuya ku ino mpunzha yaikela pangye ya muzhi.

Pa Kimo pa 3 April, 2017, bantu bonse bebeta kwiya na kufwakesha ofweshi mukatampe wa ntanda yonse ku Warwick. Patanshi kukekala kuya bunke bwabo mu bibamba bisatu mo bamwesha bintu bimo, apa bino kukekale wa kwibapishamo kuya ku mapunzha akwabo.

1. “Baibolo ne Jizhina ja Lesa” ke kibamba muji Mabaibolo amo o bazhikwila jimo panembwa jizhina ja Lesa, kumwesha kuba’mba jizhina ja Lesa jiji mu Binembelo.

2. “Bantu Batelwa pa Jizhina ja Yehoba” ke kibamba muji bipikichala bimwesha mwapita Bakamonyi ba kwa Yehoba, Yehoba byo atangijilenga, kufunjisha ne kunengezha bantu banji kuba kyaswa muchima wanji.

3. “Ofweshi Mukatampe wa Ntanda Yonse Umwesha Lwitabilo Lumwekela mu Mingilo” ke kibamba mo balumbulula tuvoto twa mu Jibumba Jitangijila byo tukwasha bantu ba Yehoba kupwila pamo, kufunjisha bantu kwikala baana ba bwanga, kutambula kajo ka ku mupashi, ne kwitemwa bene na bene.

Kufwakasha bunke kwa kubula wa kwibapishamo kukekalako kutendeka pa Kimo kufika pa Kitanu kutendeka kimye kya 8 koloko lukelo kufika 4 koloko mabanga. Kabiji benyi bakebapishañanya mu maofweshi ne ku bibanza bya kukayilamo bya pa Betele pa maminiti 20. Kuno kufwakasha kukekalako kutendeka pa Kimo kufika pa Kitanu kutendeka na kimye kya 8 koloko kufika pa 11 koloko, kabiji ne kutendeka pa 1 koloko kufika pa 4 koloko.

Saka mukyangye kuya na kufwakasha, monai mabulañano aji pa jw.org panembwa’mba BAKAMONYI BA KWA YEHOBA > OFWESHI NE MABULAÑANO A BYA KUFWAKASHA > United States.