Babuulainga’mba Mwibatemwa

Ong-li ke Kamonyi wa Yehoba wikala ku Bulgaria. Wafunjishanga Baibolo inetu umo wa jizhina ja Zlatka, bino bamwatawanji kechi bafundanga Baibolo ne. Ong-li washimikizhe’mba: “Byo twisambilenga pa bwikalo bwa kisemi, nakoseshe kishinka kya kuba’mba twafwainwa kubuulanga benakwetu ne baana betu kuba’mba twibatemwa. Zlatka wainukile ne kuntajisha na bulanda, kabiji waambile’mba ukyangye kubuulapo bamwatawanji nangwa mwananji wa mukazhi uji na myaka itanu na ina amba wibatemwa.”

Zlatka walumbulwile’mba: “Nebikako bingi kwibobila byonse bikebewa, pano bino, kinkatazha kwamba byambo bya kuba’mba nebatemwa.” Kabiji wanungilepo’mba: “Bamama kechi bakimbuulapo’mba bantemwa ne, kabiji bankambo babakazhi nabo kechi babuujilepo bamama amba bebatemenwe ne.” Ong-li wemwesheshe Zlatka kuba’mba Yehoba waambile’mba watemenwe Yesu. (Mateo 3:17) Watundaikile Zlatka kulombapo kwi Yehoba pa kino kintu ne kwibikila kikonkwanyi kya kubuula bamwatawanji ne mwananji wamukazhi amba wibatemwa.

Ong-li waambile’mba: “Byo papichiletu moba abiji, Zlatka wambuujile saka asangalala amba walombele kwi Yehoba kuba’mba amukwashe. Bamwatawanji byo babwelele pa nzubo, wibabuujile’mba wafunda mu Baibolo ene mambo o kyanemena mwanamukazhi wasongolwa kunemeka bamwatawanji ne kwibatemwa. Kepo, byo atulumeneko pacheche, wibabuujile’mba wibatemwa bingi. Kabiji mwananji wamukazhi naye byo abwelele pa nzubo, Zlatka wamukumbachijilemo ne kumwambila’mba wamutemwa bingi. Zlatka wambuujile’mba: ‘Luno nakasuluka. Pa myaka yonseye yapitapo nakankalwanga kulumbulula byo natemwa kisemi kyami, pano na bukwasho bwa Yehoba, luno mbena kwibabuula byo nebatemwa.’

Ong-li watwajijile kwamba’mba: “Byo papichile mulungu umo, namonañene na bamwatawanji Zlatka, kabiji bambuujile’mba: ‘Bantu bavula bañambijilenga’mba Zlatka kechi wafwainwa kufundanga Baibolo ne anweba ne, bino kyamwekeshatu patoka kuba’mba bintu byo abena kufunda mu Baibolo ne anweba byakwasha bingi kisemi kyetu. Tubena kwikala na mutende ne lusekelo.’”