Mateo 6:34—“Kange Mubambishenga Michima na Mambo a Juba ja Kesha ne”

“Kange mubambishenga michima na mambo a juba ja kesha ne, mambo juba ja kesha jikekala na bijikila byajo. Juba jonse jiji na makatazho ajo.”—Mateo 6:34, Binembelo bya Ntanda Ipya.

“Kechi mubambishe michima yenu na ja kesha ne: mambo ja kesha jine jikebambisha na byajo. Bibi bya lelo bijiwaina lelo.”—Mateo 6:34, Buku wa Lesa.

Bilumbulula Mateo 6:34

Yesu waambijile bamutelekelenga kubula kukizhamo kwikala na bijikila nangwa kwakamwa pa makatazho a kulutwe. Pakuba bakonsheshe kwikala na lusekelo inge batatu muchima pa makatazho a jonkajo juba.

Yesu kechi walumbulwilenga’mba twafwainwa kuleka kulanguluka pa juba ja kesha nangwa kunengezhezha jimo bya kulutwe ne. (Byambo bya Maana 21:5) Pakuba walumbulwilenga’mba kechi twafwainwa kukizhamo kwikala na bijikila nangwa kwakamwa pa byakonsha kukamweka kesha ne. Kwikala na bino bijikila kwakonsha kwitulengela kubula kwikala na lusekelo ne kubula kuta muchima pa mingilo ya lelo. Kechi twakonsha kupwisha makatazho akyangye kumweka ne. Javula bintu byo twakamwapo kechi bimweka ne, kabiji bimye bimo inge byamweka kechi bikala byonka byo twalangulukilenga ne.

Mwatala Mateo 6:34

Bino byambo Yesu wibyambile mu jashi janji ja pa mutumba jaya nkuwa jiji mu Mateo kitango 5-7. Mu jino jashi, Yesu waambile’mba kukizhamo kwikala na bijikila kechi kwakonsha kwitulengela kwikala bwikalo bwawama nangwa kunungako bumi bwetu ne. (Mateo 6:27) Waambile ne kuba’mba inge twatangizhako Lesa mu bwikalo bwetu kechi twafwainwa kukizhamo kwikala na bijikila na mambo a juba ja kesha ne. Inge Lesa uta muchima bichi ne banyama, ko kuba’mba ukakizhamo kuta muchima aba bamwingijila.—Mateo 6:25, 26, 28-33.