Yelemiya

27 Mfumu wa Yuda, aye Yehoyakimu mwana wa kwa Yosiya byo atatwile kulama, Yelemiya wamubuujile byambo byafumine kwi Yehoba amba: 2 “Yehoba wañambila’mba, ‘Lenga ntambo ne bikonkoji ne kwibikobeka mu nshingo yobe. 3 Kabiji wibitume kwi mfumu wa Edomu,+ mfumu wa Moabu,+ mfumu wa bena Amonyi,+ mfumu wa Tila+ ne kwi mfumu wa Shidona+ na baluwe baiya ku Yelusalema kwi Zedekiya Mfumu wa Yuda. 4 Mukebabuule uno mukambizho ye bakabuula bankambo yabo amba:

“‘“Yehoba wa mabumba, Lesa wa Isalela waamba’mba; mukabuule bankambo yenu amba, 5 ‘Amiwa yami nalengele ntanda, bantu ne banyama baji pano pa ntanda na bulume bwami ne na kuboko kwami; kabiji neipana ku muntu yense ye natemwa.*+ 6 Kabiji bino byalo byonse nebipana mu kuboko kwa kalume wami aye Nebukaneza+ Mfumu wa Babilona; namupa ne banyama ba mungye namba bamwingijilenga. 7 Bisaka byonse bya bantu bikamwingijilanga ne mwananji wa mulume ne munkananji wa mulume, kufikatu ne kimye kyanji kya kulama byo kikapwa,+ kimye bisaka bya bantu byavula ne bamfumu bakatampe kyo bakamwalula kwikala ke muzha wabo.’+

8 “‘“‘Umvwe kisaka kya bantu nangwa bufumu bwakana kwingijila Nebukaneza Mfumu wa Babilona, ne kukana kwikobeka kikonkoji kya mfumu wa Babilona mu nshingo, amiwa nkonauna kyokyo kisaka na mpoko,+ na kipowe kya nzala ne na mwalo* mukatampe kufikatu ne byo nkamwingijisha kwibavizha bonsetu,’ byo byaamba Yehoba.

9 “‘“‘Onkao mambo, kange mumvwine bangauzhi benu, bañanga ba lubuko, balota biloto, boba bingelekezha, ne balozhi benu, bonka bemwambila’mba: “Kechi mukengijilanga mfumu wa Babilona ne.” 10 Babena kwimwawila bintu bya bubela kuba’mba bakemufumye mu kyalo kyenu ne kwimutwala kwalepa, ne amiwa nkemupalañanya kabiji mukonaika.

11 “‘“‘Bino kisaka kya bantu kikekobeka kikonkoji kya mfumu wa Babilona mu nshingo yakyo ne kumwingijila, nkekiswisha kushala* mu kyalo kyakyo, pa kuba’mba kikajimengamo ne kwikala monka,’”’” byo byaamba Yehoba.

12 Kabiji naambijile ne Zedekiya Mfumu+ wa Yuda kintutu kimo namba: “Ikobekai kikonkoji kya mfumu wa Babilona mu nshingo yenu ne kumwingijila aye ne bantu banji kabiji mukekala na bumi.+ 13 Mambo ka anweba ne bantu benu o mukebela kufwa na mpoko,+ na kipowe kya nzala+ ne na kikola kikatampe+ byonkatu Yehoba byo aamba pa kisaka kikabulanga kwingijila mfumu wa Babilona? 14 Kange mumvwine byambo bibena kwimubuula bangauzhi amba, ‘Kechi mukengijilanga mfumu wa Babilona ne,’+ mambo babena kwimwawilatu bintu bya bubela.+

15 “Yehoba waamba’mba, ‘Amiwa kechi nebatuma ne, bino babena kwaulatu bya bubela mu jizhina jami ne kwimulengela’mba nkemupangemo, kabiji anweba mukonaikila pamo na bangauzhi babena kwimwawila bino bintu.’”+

16 Kabiji bañanga ne bantu bonse nebabujile namba: “Yehoba waamba’mba, ‘Kange mumvwine byambo bya bangauzhi benu babena kwimwawila’mba: “Umvwai! Bipe bya mu nzubo ya Yehoba katatakatu bakebibwezhe kufuma ku Babilona” ne!+ mambo babena kwimwawilatu bintu bya bubela.+ 17 Kange mwibomvwine ne. Ingijilainga mfumu wa Babilona kabiji mukekala na bumi.+ Nanchi mambo ka uno muzhi o afwainwa kushajilatu masala? 18 Bino umvwe kine bo bangauzhi kabiji umvwe byambo bya Yehoba baji nabyo, balekai basashijile Yehoba wa mabumba kuba’mba bipe byashala mu nzubo ya Yehoba, mu nzubo* ya mfumu wa Yuda ne mu Yelusalema babule kwibitwala ku Babilona.’

19 “Mambo Yehoba wa mabumba waamba pa mashiki,+ Kizhiba,*+ bikochikala+ ne bipe byashajile mu uno muzhi, 20 Nebukaneza Mfumu wa Babilona byo abujile kusenda, kimye kyo atwajile mfumu wa Yuda aye Yekoniya mwana Yehoyakimu mu buzha kumufumya mu Yelusalema kumutwala ku Babilona pamo na babinemanga bonse ba mu Yuda ne mu Yelusalema.+ 21 Yehoba wa mabumba, Lesa wa Isalela waamba pa mambo a bipe byashajile mu nzubo ya Yehoba, mu nzubo* ya mfumu wa Yuda ne mu Yelusalema amba: 22 ‘“Bakebileta mu Babilona+ kabiji bikekala monkamwa kufikatu ne juba jo nkebivuluka jibiji, kepo nkebibwezha ne kwibitula mu ino mpunzha,”’ byo byaamba Yehoba.”’”+