Yelemiya
28 Mu yenkawa mwaka, ku ntendekelo ya bukalama bwa kwa Zedekiya Mfumu+ wa Yuda, mu mwaka wa buna, mu ñondo wa butanu, ngauzhi Hananiya mwana wa kwa Azula wa ku Gibeona,+ wañambijile mu nzubo ya Yehoba ku meso a bañanga ne bantu bonse amba: 2 “Yehoba wa mabumba, Lesa wa Isalela waamba’mba, ‘Amiwa nkachimuna kikonkoji kya mfumu wa Babilona.+ 3 Myaka* ibiji saka ikyangye kupwa, amiwa nkabwezha mu ino mpunzha bipe byonse bya mu nzubo ya Yehoba, Nebukaneza Mfumu wa Babilona byo afumishe mu ino mpunzha kutwala mu Babilona.’”+ 4 “Yehoba waamba’mba, ‘Kabiji nkabwezha mfumu wa Yuda, aye Yekoniya+ mwana Yehoyakimu+ mu ino mpunzha pamo na bantu bonse ba mu Yuda bo batwajile mu buzha ku Babilona,+ mambo amiwa nkachimuna kikonkoji kya mfumu wa Babilona.’”
5 Kepo ngauzhi Yelemiya esambile ne ngauzhi Hananiya pa meso a bañanga ne bantu bonse baimene mu nzubo ya Yehoba. 6 Ngauzhi Yelemiya waambile’mba: “Amena!* Yehoba obe byonkabyo! Yehoba afikizhe byambo byonse byo waawile pa kubwezha bipe byonse bya mu nzubo ya Yehoba ne bantu bonse bo batwajile mu buzha, kwibafumya mu Babilona ne kwibaleta mu ino mpunzha! 7 Nangwa byonkabyo, umvwa bino byambo byo mbena kwamba kwi obewa ne ku bantu bonse. 8 Kala kene, bangauzhi bajingako amiwa ne obewa saka tukyangye kwikalako, baawilenga pa byalo byavula ne pa bufumu bukatampe, pa nkondo, bya malwa ne mwalo.* 9 Umvwe ngauzhi waaula bya mutende kabiji byambo byanji byafika, kikayukanyikwa’mba kine Yehoba ye watuma yewo ngauzhi.”
10 Ponkapo ngauzhi Hananiya wafumishe kikonkoji kyajinga mu nshingo ya ngauzhi Yelemiya ne kwikichimuna.+ 11 Kepo Hananiya aambile ku bantu bonse amba: “Yehoba waamba’mba, ‘Abino byo byo nkachimuna ne kikonkoji kya kwa Nebukaneza Mfumu wa Babilona mu nshingo ya bisaka byonse bya bantu myaka ibiji saka ikyangye kupwa.’”+ Kabiji ngauzhi Yelemiya wafuminepo.
12 Ngauzhi Hananiya byo achimwine kikonkoji kyajinga mu nshingo ya ngauzhi Yelemiya, Yehoba waambijile Yelemiya amba: 13 “Yanga ukabuule Hananiya amba, ‘Yehoba waamba’mba: “Obewa byo wachimuna bikonkoji bya bichi,+ obewa yenka ukapingakenyapo bikonkoji bya kyela kya kapotwe.” 14 Mambo Yehoba wa mabumba, Lesa wa Isalela waamba’mba: “Amiwa nkakobeka kikonkoji kya kyela kya kapotwe mu nshingo ya bino bisaka byonse bya bantu kuba’mba bakengijilenga Nebukaneza Mfumu wa Babilona, kabiji kine bakamwingijilanga.+ Kabiji nkamupa ne banyama ba mungye.”’”+
15 Kepo ngauzhi Yelemiya aambijile ngauzhi Hananiya amba:+ “Umvwa, obewa Hananiya! Yehoba kechi ye wakutuma ne, bino obewa walengela bano bantu kuketekela mu bintu bya bubela.+ 16 Onkao mambo, Yehoba waamba’mba, ‘Umvwa! Amiwa mbena kukufumya pano pa ntanda. Ubena kufwa uno mwaka, mambo walengela bantu kusatukila Yehoba.’”+
17 Byonkabyo, ngauzhi Hananiya wafwile mu yenkawa mwaka, mu ñondo wa butanu na bubiji.