Yelemiya
46 Bino byo byambo Yehoba byo abuujile ngauzhi Yelemiya pa mambo a bisaka bya bantu:+ 2 Pa Ijipita+ na mambo a bashilikale ba kwa Felo Neko+ mfumu wa Ijipita, waikalanga kwipi na ku Mukola wa Ufelata, kabiji ye bashinjijile mu Kakemishi kwi Nebukaneza Mfumu wa Babilona mu mwaka wa buna wa bukalama bwa mfumu wa Yuda aye Yehoyakimu+ mwana wa kwa Yosiya, amba:
3 “Tola makebo* obe acheche ne akatampe,
Uye na kulwa nkondo.
4 Anweba mwenda pa bambili, kasai bambili ne kukanjilapo.
Vwalai tumpompo twenu muyenga.
Nonai mafumo ne kuvwala malaya enu a byela.
5 Yehoba waamba’mba, ‘Mambo ka o babena kumwekela kwakamwa?
Babena kubwelamo, babiyangala babo bebepaya.
Banyema, babiyangala babo kechi babwelamo ne.
Bintu bilengesha moyo biji konse konse.’
6 ‘Aba baji na lubilo kechi bakonsha kunyema ne, kabiji babiyangala kechi bakonsha kupuluka ne.
Ku kabeta ka ku buyeke kwipi na kitulu kya Mukola wa Ufelata,
Ko ko betuntwila ne kupona.’+
7 Ñanyi we ubena kwiya nobe Mukola wa Nile,
Nobe mikola iji na mukuku?
8 Ijipita ubena kwiya nobe Mukola wa Nile,+
Nobe mikola iji na mukuku,
Kabiji ubena kwamba’mba, ‘Amiwa nkaya ne kukumbana pa ntanda.
Nkonauna muzhi ne bantu bekalamo.’
9 Yainga, anweba bambili!
Nyemeshai, anweba makalaki!
Babiyangala batangileko,
Ne bena Kushi ne bena Puta bonka bayuka kwingijisha makebo,+
10 “Aja juba jo juba ja Nkambo Mfumu Yehoba wa mabumba, jo juba jo akashinkanya na balwanyi banji. Kabiji mpoko ikatapañana ne kutondwa kabiji ikatapakana mashi abo, mambo Nkambo Mfumu Yehoba wa mabumba watapisha kitapisho mu kyalo kiji ku kabeta ka ku buyeke bwa Mukola wa Ufelata.+
11 Yainga mukasende manyi a balasama ku Gileada,+
Obewa kisungu Ijipita.
Michi yavula yo mubena kwingijisha yo yatutu,
Mambo kafwako muchi ukemubuka ne.+
12 Bisaka bya bantu byaumvwa byo kimulenga bumvu,+
Kabiji kujila kwenu kwakumbana mu kyalo.
Mambo babiyangala batuntwisha babiyangala bakwabo,
Kabiji bonse baponenatu pamo.”
13 Yehoba waambijile ngauzhi Yelemiya pa mambo a kwiya kwa Nebukaneza Mfumu wa Babilona na konauna kyalo kya Ijipita amba:+
14 “Taya mbila mu Ijipita ne kwiisampanya mu Migidolo.+
Wiisampanye mu muzhi wa Nofu* ne mu Tapanesa.+
Wambe’mba, ‘Imanai ne kwinengezha,
Mambo mpoko isakwipaya bonse bemuzhokoloka.
15 Mambo ka babilobo benu o bebakumpwila?
Abo kechi bakosele ne,
Mambo Yehoba wibaponesha panshi.
16 Bavula babena kwituntula ne kupona.
Babena kwiambila mulwabo amba:
“Imanai! Twayai tubwele ku balongo betu ne ku kyalo kyetu
Na mambo a kushinta kwa mpoko.’’’
18 Mfumu wa jizhina ja Yehoba wa mabumba waamba’mba, ‘Byonkatu byo nji na bumi,
‘Aye* ukeya nobe mutumba wa Tabola+ uji mu mitumba ikwabo
Kabiji nobe mpunzha ya Kamela+ iji ku kalunga ka mema.
19 Longai bipe bya kuya nabyo mu buzha,
Obewa kisungu wikala mu Ijipita.
Mambo muzhi wa Nofu* ukekala kintu kilengesha bantu moyo;
Bakamusoka* ne kumushatu kwa kubula muntu nangwa umo wikalamo.+
20 Ijipita uji nobe mwana ñombe mukazhi umweka bulongo,
Bino bakamusuma ku tuzembe tukafuma ku kabeta ka ku buyeke.
21 Ne bashilikale bo aji nabo bo atwezhezhe nkito baji nobe baana bañombe banuna,
Pano bino, babwelamo ne kunyema bonse.
22 ‘Kyungwe kyanji kibena kumvwanyika nobe nswalo ya muloolo,
Mambo balwanyi bakamulukuka na tupasa,
Nobe bantu babena kutema bichi.*
23 Yehoba waamba’mba, ‘Bakatema jivunda janji nangwa kya kuba jamwekelenga nobe kechi mwakonsha kupita muntu ne.
Mambo balwanyi bavula nobe nzhiye, ba kukankalwa kubala.
24 Bena Ijipita bakebalengesha bumvu.
Bakebapana ku bantu ba ku kabeta ka ku buyeke.’+
25 “Yehoba wa mabumba, Lesa wa Isalela waamba’mba: ‘Amiwa nazhingijila Amonyi+ wa mu muzhi wa No,*+ nazhingijila ne Felo, Ijipita, balesa banji+ ne bamfumu banji, ko kuba’mba Felo ne bantu bonse bakinka manungo mwi aye.’+
26 “Yehoba waamba’mba, ‘Nkebapana ku boba bakeba konauna bumi* bwabo, kwi Nebukaneza Mfumu wa Babilona+ ne bakalume banji. Pano bino, pa kupitapo kimye, mukekala bantu jibiji byonkatu byo kyajinga kala.’+
27 ‘Pakuba obewa Yakoba kalume wami, kange uchine ne,
Ne obewa Isalela kange ukakilwe ne.+
Yakoba ukabwela na kwikala mu mutende saka akasuluka,
Kwa kubula muntu nangwa umo wa kumulengesha moyo ne.+
28 “Yehoba waamba’mba, ‘Onkao mambo, obewa Yakoba kalume wami kange uchine ne, mambo amiwa nji ne obewa.