Yelemiya

47 Yehoba waambijile ngauzhi Yelemiya pa mambo a bena Filishitiya,+ Felo saka akyangye konauna Gaza. 2 Yehoba waamba’mba:

“Monai! Mema abena kwiya kufuma ku kabeta ka ku buyeke.

Akekala ke mukola wayula.

Kabiji akalobesha kyalo ne byonse bijimo,

Muzhi ne bantu bekalamo.

Banabalume bakajila,

Kabiji bonse bekala mu kyalo bakajila mabingo.

3 Na mambo a mituutu ya bambili banji balume babena kwenda,

Na kyongo kya makalaki anji a nkondo

Ne kyongo kya bitanga byanji,

Bashabo kechi bakabwela na kukwasha baana babo ne,

Mambo maboko abo akakookatu zubulu,

4 Mambo juba jibena kwiya ja konauna bena Filishitiya bonse;+

Ja konauna boba bonse bashalapo bakwasha Tila+ ne Shidona.+

Mambo Yehoba ukonauna bena Filishitiya,

Bonka bashalapo bafumine pa jikuji ja Kafutole.*+

5 Gaza ukasebeka jibala.*

Ashekelona bamuzhindamika.+

Anweba bashalapo ba mu kimpachiko* kyabo,

Mukatwajijila kwichibaula kufika ñanyi kimye?+

6 Obewa mpoko ya Yehoba!+

Ukatwajijila kwamba kufika ñanyi kimye?

Bwela mu kikwa kyobe.

Ikala panshi ne kuzhindamapo.

7 Pano mpoko yakonsha kuzhindama byepi

Yehoba saka eikambizha?

Wiituma kuya,

Ku bena Ashekelona ne ku boba bekala ku kitulu kya kalunga ka mema.”+