Bakwatankana Kuba Kyaswa Muchima wa Yehoba

MWAYA ntanda yonse, kuji mabumba avula a bupopweshi, a bumulwila ntanda, a busulu, ne tubungwe twa bantu twapusana pusana, bintu byo bakeba kuba, mo bamwena bintu ne mizhilo yapusana pusana. Pano bino, kuji jibumba jimo japusanako na ano mabumba onse. Mambo a Lesa asolola patoka jino jibumba amba ke Bakamonyi ba kwa Yehoba.

² Kyawama bingi byo muji mu jibumba ja Yehoba. Byo mwayuka kyaswa muchima wa Lesa, mubena kwikyuba. (Sala. 143:10; Loma 12:2) Mwi ba mingilo babambakana babena kwingijila pamo na balongo bonse baji na butemwe mwaya ntanda. (2 Ko. 6:4; 1 Pe. 2:17; 5:9) Byonka byaamba Mambo a Lesa, kino kimuletela mapesho avula ne lusekelo lukatampe. (Maana 10:22; Mako 10:30) Byo mubena kuba kyaswa muchima wa Yehoba mu bukishinka, babena kwimunengezha kukekala bwikalo bwa myaka ne myaka bwa lukumo kulutwe.—1 Timo. 6:18, 19; 1 Yoa. 2:17.

³ Mulenga wetu Mukatampe uji na jibumba jawama ja ntanda yonse jo atangijila. Kino kibena kulumbulula’mba jino jibumba jitangijilwa ne Yehoba, Mutwe wa byonse. Twakinka manungo mwi aye. Aye ye Mutonyi wetu, ye Upana Mizhilo, kabiji ye Mfumu wetu. (Isa. 33:22) Byo aji Lesa ubila bintu monka mo byalondankena, wanengezha bya kwitukwasha “kwingijila nanji pamo” pa kuba kyaswa muchima wanji.—2 Ko. 6:1, 2.

⁴ Mpelo ya buno bwikalo byo yafwenya kala pepi, twafwainwa kutwajijila kulondela Mfumu ye batongola, aye Kilishitu Yesu. (Isa. 55:4; Lum. 6:2; 11:15) Yesu ye waambijile jimo kuba’mba baana banji ba bwanga bakengila mingilo ikatampe kukila mingilo yo aingijile kimye kya mwingilo wanji pano pa ntanda. (Yoa. 14:12) Kino kyakonsheshe kubiwa pa kupitapo kimye kyabaya ne kuvujilako kwa basapwishi, baana ba bwanga ba kwa Yesu bakonsheshe kusapwila mu manyaunda avula. Bafwainwe kusapwila mambo awama a Bufumu monse mwapela ntanda.—Mat. 24:14; 28:19, 20; Byu. 1:8.

⁵ Akino kyaambilepo Yesu kyaubiwa. Nangwa byonkabyo, byonka byaambile Yesu, mwingilo wa kusapwila mambo awama ukapwa pa kimye kyatongola mwine Yehoba. Biyukilo byonse bya bungauzhi bwa mu Mambo a Lesa byamwesha’mba juba ja Yehoba jikatampe kabiji jilengesha moyo jafwenya kala pepi.—Yoe. 2:31; Zefwa. 1:14-18; 2:2, 3; 1 Pe. 4:7.

⁶ Byo twayuka kyaswa muchima wa Yehoba mu ano moba a kupelako, twafwainwa kwibikishako kuba bikeba Lesa. Kino kibena kulumbulula’mba twafwainwa kuyuka bulongo jibumba ja Lesa byo jingila ne kukwatankena pamo najo. Ñingijilo ya jino jibumba yaimena pa mafunde a mu Binembelo, kubikapotu ne mikambizho, mizhilo, malamuna ne mafunjisho aji mu Mambo a Lesa anembelwe na lutangijilo lwa mupashi wazhila.—Sala. 19:7-9.

⁷ Bantu ba Yehoba inge balondela luno lutangijilo lwa mu Baibolo, bekala mu mutende ne kwingijila pamo saka bakwatankana. (Sala. 133:1; Isa. 60:17; Loma 14:19) Ñanyi kintu kilengela balongo betu mwaya ntanda kukwatankana? Ke butemwe. Bintu byonse twibyuba na butemwe mambo twavwala butemwe. (Yoa. 13:34, 35; Kolo. 3:14) Mu jino jishinda, twendela pamo na lubaji lwa mwiulu lwa jibumba ja Yehoba.

LUBAJI LWA MWIULU LWA JIBUMBA JA YEHOBA

⁸ Ngauzhi Isaya, Ezikyo ne Danyela, bamwene mu bimwesho lubaji lwa mwiulu lwa jibumba ja Yehoba. (Isa. kitango 6; Ezi. kitango 1; Da. 7:9, 10) Mutumwa Yoano naye wamwene mu kimwesho lunengezho lwa mwiulu, kabiji witubuulako pacheche mu buku wa Lumwekesho. Wamwene Yehoba pa jitanda ja lukumo saka bamuzhokoloka ku bamalaika, saka babijika’mba: “Wazhila, wazhila, wazhila Yehoba Lesa, wa Bulume Bonse, wajingapo, ujipo kabiji ukekalapo.” (Lum. 4:8) Kabiji Yoano wamwene “mukachi ka jitanda . . . saka mwaimana mwana mukooko,” Mwana Mukooko wa Lesa, aye Yesu Kilishitu.—Lum. 5:6, 13, 14; Yoa. 1:29.

⁹ Kino kimwesho kyamwesha Yehoba saka aikala pa jitanda, kibena kulumbulula’mba ye ubena kutangijila jino jibumba. Pa 1 Byambo bya Moba 29:11, 12 palumbulula kifulo kyanji kikatampe kuba’mba: “Anweba Yehoba, bukata ne bulume ne buwame ne lukumo ne buneme byo byenu, mambo bintu byonse biji mwiulu ne pano pa ntanda byo byenu. Bufumu bo bwenu, anweba Yehoba. Anweba mwitumbijika kwikala mwine wakila pa bonse. Bunonshi ne lukumo bifuma kwi anweba, kabiji anweba mulama bintu byonse, kabiji mu kuboko kwenu muji bulume ne ngovu, kabiji kuboko kwenu kwakonsha kutumbijika muntu ne kupana ngovu ku bonse.”

¹⁰ Byo aji wa mwingilo pamo ne Yehoba, Yesu Kilishitu uji na kifulo kikatampe bingi mwiulu, kabiji bamupa luusa lukatampe. Kwambantu kine, Lesa “wakokeshe bintu byonse munshi ya maulu anji ne kumutongola kwikala mutwe wa bintu byonse mu kipwilo.” (Efi. 1:22) Mutumwa Paulo waambile pe Yesu amba: “Lesa wamupele kifulo kikatampe ne jizhina jakila mazhina onse, kuba’mba mu jizhina ja Yesu manungo onse akafukame panshi—a bonse baji mwiulu ne a baji pano pa ntanda ne a boba baji munshi ya ntanda—kabiji njimi yonse yafwainwa kwamba patoka amba Yesu Kilishitu ye Nkambo mu kumuletela lukumo Lesa Tata.” (Fili. 2:9-11) Onkao mambo, twakonsha kwikala na luketekelo lwakosa mu bukalama bwaoloka bwa kwa Yesu Kilishitu.

¹¹ Ngauzhi Danyela wamwene mu kimwesho yenkawa wa Kala Kene saka aikala pa jitanda janji ja mwiulu ne bamalaika “milyonyi umo bamwingijilenga, ne mamilyonyi 100 baimene ko ajinga.” (Da. 7:10) Baibolo watongola ano mabumba a bamalaika amba ‘bilengwa byonse bya mupashi bya mwingilo wazhila byo batuma kwingijila boba bo akapulusha.’ (Hebe. 1:14) Abino byonse bilengwa bya mupashi bebibika pa ‘matanda, pa bunkambo, mu makafulumende ne luusa.’—Kolo. 1:16.

¹² Umvwe twaikalapo na kimye kya kulanguluka pa biji mu lubaji lwa mwiulu lwa jibumba ja Yehoba, twakonsha kumvwisha byaubile Isaya byo amwene mu kimwesho “Yehoba saka aikala pa jitanda janji ja bufumu jiji peulu pene,” ne “baselafi bamuzhokolokele.” Isaya waambile’mba: “Malwa o ami! Amiwa njitu nobe muntu wafwa, mambo amiwa nemuntu uji na kanwa kabula kufwainwa, kabiji mbena kwikala mu bantu baji na tunwa twabula kufwainwa; Mambo meso ami amona Mfumu, aye Yehoba wa mabumba!” Kine Isaya waakaminwe bingi ne kwiumvwa kubula kunema byo akwatakenye kubaya kwa jibumba ja Yehoba. Kino kyo amwene kyamwikele bingi ku muchima kya kuba kimye kyo kwaishile mbila kufuma mwiulu ya mwingilo wanema wa kusapwila bunchibamambo bwa Yehoba, Isaya waambile’mba: “Amiwa bano! Ntumai!”—Isa. 6:1-5, 8.

¹³ Kuyuka jibumba ja Yehoba ne kwijinemeka kutundaika bantu banji mu jishinda jintutu jimo. Jibumba byo jibena kuyilako palutwe, twibikako kwendela pamo najo. Twibikishako kumwesha’mba twaketekela jibumba ja Yehoba lelo jino.

JIBUMBA JA YEHOBA JIBENA KUYILAKO PALUTWE

¹⁴ Mu kitango 1 kya bungauzhi bwa kwa Ezikyo, Yehoba bamumwesha saka akanjila pa kalaki mukatampe wa mwiulu. Uno kalaki wa lukumo wimenako lubaji lubula kumweka lwa jibumba ja Yehoba. Byo enda pa uno kalaki kibena kulumbulula’mba umutangijila ne kumwingijisha kwesakana na mwayila kyaswa muchima wanji.—Sala. 103:20.

¹⁵ Kitanga kimo kimo kiji na kitanga kikwabo kyakimbakanamo mukachi, bino saka kyaesakana na kiji peulu. Mu jino jishinda mo mo kyakonsha kwambiwa’mba “byayilengatu konse konse.” (Ezi. 1:17) Bitanga byakonsha kwaluluka ponkapotu. Nangwa byonkabyo, uno kalaki kechi wendatu kwa kubula kumutangijila nangwa kumusopa bulongo ne. Yehoba kechi uleka jibumba janji kuya konse ko jikeba kuya jine ne. Ezikyo 1:20 waamba’mba: “Byayilenga konse konse kwibitangijilenga mupashi.” Onkao mambo, Yehoba ye ulengela jibumba janji kuya konse mupashi ko akeba’mba jiye. Bwipuzho bo twafwainwa kwiipuzha atweba bene ke bwa kuba’mba, ‘Nanchi mbena kwendela pamo najo nyi?’

¹⁶ Kwendela pamo na jibumba ja Yehoba kechi kulumbululatu kuya na kupwila ne kuya mu mwingilo wa mu bujimi ne. Bino kulumbulula ne kukomenako mu lwitabilo ne kwikala na bulunda bwakosa ne Lesa. ‘Tuyuka bintu byanemesha’ ne bintu bya katataka biji pa mutanchi wa kajo ka ku mupashi. (Fili. 1:10; 4:8, 9; Yoa. 17:3) Kabiji twafwainwa kuyuka’mba, paji jibumba pafwainwa kwikala lunengezho lwawama ne lukwatankano. Onkao mambo, twafwainwa kuyuka buneme bwa kwingijisha bulongo bintu byo tufunda ne bintu bya ku mubiji Yehoba byo etupa kuba’mba twingile mwingilo wanji. Byo tubena kwendela pamo na kalaki wa Yehoba wa mwiulu, twikela monka mwayila mambo awama o tusapwila.

¹⁷ Na bukwasho bufuma ku jibumba ja Yehoba, atweba bonse tubena kuyilako palutwe mu kuba kyaswa muchima wa Lesa. Vulukai’mba Wendesha uno kalaki wa mwiulu, ke Yehoba. Onkao mambo, kwendela pamo na kalaki wanji kumwesha’mba twanemeka Yehoba ne kumuketekela byo aji Jibwe jetu. (Sala. 18:31) Baibolo walaya’mba: “Yehoba ukapa bantu banji bulume. Yehoba ukapesha bantu banji kwikala mu mutende.” (Sala. 29:11) Byo tuji lubaji lwa jibumba ja Yehoba lelo jino, tutambwila bulume bo apana kabiji twikala na mutende ye apana ku bantu banji bakwatankana. Kwambatu kine, inge twatwajijila kuba kyaswa muchima wa Yehoba, tukekala na mapesho avula luno ne myaka ne myaka.