Pa Kuba’mba Mwikale Byonka Byajinga Yesu Mwafwainwa . . .

KWIKALA NA LUSA

Na mambo a kuba’mba Yesu wajinga muntu walumbuluka, kechi wapichile mu makatazho ne kwikala na bijikila byo twikalapo nabyo ne. Pano bino, waumvwinanga bantu lusa. Wipaine kukwasha bantu ne kwibobila bintu byamwekanga nobe muntu kechi wakonsha kwibyuba ne. Kya kine, lusa lo lwamulengelanga kukwasha bantu. Langulukai pa bimo byo aubile byanembwa mu Bitango 32, 37, 57, 99.

KUKASULUKILA BANTU

Bantu ba mafumbi apusana pusana, ko kuba’mba banyike ne bakulumpe bayanga kwi Yesu mambo wibakasulukijile kabiji kechi wimweshanga’mba wanema kukila abo ne. Na mambo a kuba watele bantu muchima, bantu baumvwanga bingi bulongo kwikala nanji. Pa kuba’mba mumvwishe kino, monai Bitango 25, 27, 95.

KULOMBANGA KIMYE KYONSE

Yesu kimye kyonse walombanga kwi Shanji na muchima yense, bunke bwanji kabiji ne na bapopweshi ba kine. Wasanchilanga Shanji, kumutota ne kulomba kuba’mba amutangijile pa kufuukula bya kuba. Tangai bimo byo aubile byanembwa mu Bitango 24, 34, 91, 122, 123.

KUBULA KWITEMWATU ANWEBA BENE

Bimye bimo Yesu byo akebanga kukokolokapo, kechi wakokolokanga ne, na mambo a kukeba kukwasha bantu. Kechi wakebanga bintu byamuwaminatu aye ne. Ne atweba twafwainwa kwikala nobe aye kupichila mu kutangizhako bikeba bakwetu. Fundai kino mu Bitango 19, 41, 52.

KULEKELAKO BAKWENU MAMBO

Yesu kechi wafunjishengatu bya kulekelako bakwetu mambo ne, bino, wamwesheshe kino mu byo aubanga na baana banji ba bwanga ne bantutu bakwabo. Langulukai pa mashinda o aubilangamo bino mu Bitango 26, 40, 64, 85, 131.

KWINGILA NA MUKOYO

Kyaambijilwe jimo amba Bayudea bavula bakakana kutambwila Mesiasa ne kuba’mba balwanyi banji bakamwipaya. Onkao mambo, Yesu inge wachiine kubila bantu bintu byavula. Pano bino, aye waingijile na mukoyo kutundaika bupopweshi bwa kine. Baana banji ba bwanga bonse bafwainwa kwingilanga na mukoyo byonka byo aingilanga nangwa kya kuba bapita mu makatazho nangwa kwibamanyika. Monai Bitango 16, 72, 103.

KWIPELULA

Yesu wakijile bantu bambulwa kulumbuluka mu mashinda a kukankalwa kubala, nabiji mu maana ne milangwe. Na mambo a kuba’mba wajinga walumbuluka, Yesu wajinga na bulume ne maana kukila bantu bonse. Pano bino, waingijilanga bakwabo. Musakutaana mafunjisho aamba pa kino mu Bitango 10, 62, 66, 94, 116.

KWIKALA BATEKANYA

Yesu kimye kyonse wamweshanga butekanye ku batumwa banji ne bantu bakwabo kimye kyo bakankalwanga kulondela byo aubanga nangwa kuba bintu byo aambanga. Wibatekenyanga pa kwibafunjisha ne kubwezhabwezhapo mafunjisho amo pa kuba’mba bekale na bulunda bwawama ne Yehoba. Langulukai pa mashinda Yesu o amwesheshangamo butekanye mu Bitango 74, 98, 118, 135.