Muzhi wa Babela wajinga kwipi na muzhi wa Ula. Mu Ula mwajinga bantu bavula babulanga kupopwela Yehoba, bapopwelanga balesa ba bubela. Pano bino, mu uno muzhi mwajinga mwanamulume wapopwelanga Yehoba. Jizhina janji wajinga Abalahama.

Yehoba waambijile Abalahama amba: ‘Fuma mu muzhi wobe ne ku balongo bobe, uye ku kyalo ko nsakukubuula.’ Kepo Lesa amulayile’mba: ‘Ukekala mukoka mukatampe, kabiji nkobila bintu byawama bantu bavula bekala pano pa ntanda na mambo a obewa.’

Abalahama kechi wayukile Yehoba ko amubuujile’mba ayenga ne, pano bino waketekejile mwi Yehoba. Onkao mambo, Abalahama ne mukazhanji aye Sala balongele bipe byabo ne kuba bibabuujile Lesa. Bayijile pamo na shanji aye Tela ne Lota mwipwa wanji.

Abalahama wajinga na myaka 75 byo afikile na kisemi kyanji mu kyalo Yehoba kyo amubujile kuyako. Kino kyalo bekitelanga’mba Kenana. Akuno Lesa koko alayile Abalahama amba: ‘Kino kyalo kyonse kyo ubena kumona, nkekipana ku baana bobe.’ Bino Abalahama ne Sala bakotele kabiji kechi bajingapo na mwana ne. Pano Yehoba wakonsheshe byepi kufikizha mulaye wanji?

Abalahama ne Sala baikele myaka yavula bingi mu masongola. Bafumine mu muzhi wa Ula mo baikalanga bingi bulongo ne kuya na kwikala mu matente. Bino Sala kechi wijizhañanyanga ne, mambo waketekejile mwi Yehoba.

Sala wakebeshe bingi kusemapo mwana kya kuba waambijile Abalahama amba: ‘Inge wamwingilo wami Hegala wasema mwana, ukekala nobe mwanami wa kwisemena.’ Byo papichile kimye, Hegala wasemene mwana wamulume. Jizhina janji wajinga Ishimela.

Byo papichile myaka yavula, Abalahama saka afikizha myaka 99, ne Sala saka afikizha myaka 89, batambwijile benyi basatu. Abalahama wibatambwijile ne kwikala nabo munshi ya kichi ne kwibapo kajo. Bano benyi bajinga bañanyi? Bajinga bamalaika! Baambijile Abalahama amba: ‘Mwaka ubena kwiya pa kyonka kino kimye, obewa ne mukazhobe mukekala na mwana.’ Sala watelekelenga mu tente mo ajinga. Wasekele ne kutendeka kulanguluka’mba: ‘Nanchi kine nakonsha kwikala na mwana saka nakota kala nyi?’

Mwaka walondejilepo Sala wasemene mwana wamulume, byonkatu malaika wa Yehoba byo alayile. Abalahama wamutumbile’mba Izaka, jilumbulula’mba “Kuseka.”

Izaka byo afikizhe myaka nobe itanu, Sala wamwene Ishimela na kuba mukeyu Izaka. Wakebelenga kuzhikijila mwananji, waambijile Abalahama amba apange Hegala ne Ishimela. Abalahama kechi wakebelenga kuba bino ne. Bino Yehoba waambijile Abalahama amba: ‘Muteleke Sala. Nsakumulama Ishimela. Pano bino Izaka ye ukafikizha milaye yami yonse.’

Lota waikalanga na mwisho wanji, aye Abalahama, mu kyalo kya Kenana. Mu kuya kwa moba, Abalahama ne Lota baikele na banyama bavula bingi kya kuba mpunzha pa kwibalamina yakepele. Abalahama waambijile Lota amba: ‘Kechi twakonsha kutwajijila kwikala bonse pa mpunzha imo ne. Salapo mpunzha ko ukeba kwikala, ne amiwa nsakuya ku mpunzha ikwabo.’ Abalahama kechi witemenwe aye mwine ne.

Lota wamwene mpunzha yawama yajinga kwipi na muzhi wa Sodoma. Mwajinga tukola twa mema ne nsono ya munyevu. Lota wasajile ino mpunzha ne kuvilukilako na kisemi kyanji.

Bantu baikalanga mu muzhi wa Sodoma ne Gomola baubanga byatama bingi. Onkao mambo, Yehoba waambile’mba usakonauna ino mizhi yonse. Bino Lesa wakebelenga kupulusha Lota ne kisemi kyanji. Watumine bamalaika na kwibambila’mba: ‘Pelawizhai! Fumaimo mu uno muzhi. Yehoba usakonauna uno muzhi.’

Lota kechi wafuminemo ponkapotu ne. Wakankazhaminenga. Kino kyalengejile bamalaika kwibakwata ku maboko, aye ne mukazhanji ne baana babo babakazhi babiji, ne kwibafumya mu muzhi. Bebambijile’mba: ‘Nyemai! Mupulushe bumi bwenu. Kutala kunyuma ne. Inge mutale kunyuma musakufwa!’

Byo bafikile mu muzhi wa Zoala, Yehoba wanokeshe mabwe ateema mujilo mu Sodoma ne mu Gomola. Ino mizhi yonse beisokeletu pelu. Muka Lota kechi wakookejile byaambile Yehoba ne. Watajile kunyuma. Onkao mambo, waalukile ke nsumba ya mukele. Bino Lota ne baana banji babakazhi bapulukile mambo bakookejile Yehoba. Bafwainwa baumvwine bingi bulanda bainabo byo babujile kukookela byaambile Lesa. Bino abo bapulukile mambo bakookejile bibabujile Yehoba.

Abalahama wafunjishe mwananji Izaka kutemwa Yehoba ne kuketekela mu milaye yanji. Izaka byo afikizhe myaka 25, Yehoba wabuujile Abalahama kuba kintu kyakatazha bingi. Ñanyi kintu kyo amubujile kuba?

Lesa wabuujile Abalahama amba: ‘Senda mwanobe yenkawa umotu ye watemwa, uye na kumulambula pa mutumba uji mu kyalo kya Moliya.’ Abalahama kechi wayukile ene mambo Yehoba o amwambijile kuba bino ne. Nangwa byonkabyo, Abalahama wakookejile byamubujile Yehoba.

Juba jalondejilepo lukelokelo, Abalahama wasendele Izaka ne bakalume babiji ne kutendeka kuya ku Moliya. Byo baendele moba asatu, batendekele kumona mitumba palepa byobya. Abalahama wabuujile bakalume banji amba bashale, pa kuba’mba aye ne Izaka baye na kupana mulambo. Abalahama wasendele mupenyi, kabiji wapeele Izaka nkunyi amba asende. Izaka waipwizhe bashanji amba: ‘Tata, nga nyama ye tusakulambula uji pi?’ Abalahama wamukumbwile’mba: ‘Mwanami, Yehoba usakwitupa.’

Byo bafikile pa mutumba, balengele kya kusokelapo bitapisho. Kepo Abalahama akashile Izaka ku maboko ne ku maulu ne kumubika pa kya kusokelapo bitapisho.

Abalahama watolele mupenyi. Ponkapo, malaika wa Yehoba wabijikile kufuma mwiulu amba: Abalahama! Kange umube kyatama mwanobe ne! Pano nayuka’mba uji na lwitabilo mwi Lesa, mambo wakookela byo akubuujile’mba ulambule mwanobe.’ Kabiji ponkapotu, Abalahama wamwene mukooko mulume wipikankenye nsengo mu kisakasaka. Wakasulwile Izaka bukiji bukiji, ne kulambula mukooko mulume.

Kufumatu joja juba, Yehoba watendekele kutela Abalahama amba mulunda nanji. Mambo ka? Mambo Abalahama waubanga byonse byamubuulanga Yehoba, nangwa kechi wayukile ene mambo Yehoba o aambila byobyo ne.

Yehoba waambile jikwabo mulaye wanji kwi Abalahama amba: ‘Nkakupesha kabiji nkalengela baana bobe kuvula bingi.’ Kino kyalumbulwilenga’mba Yehoba ukapesha ne bantu bonse bawama na mambo a kisemi kya kwa Abalahama.