Banabankazhi Mwaya Ntanda Yonse Betemwa Bene na Bene
PAJI bantu babena kwiya bakiji palepa. Bavula bakikulumpe, bamo balemana kya kuba babena kukankalwa kwenda. Paji babakazhi baji na memi ne bakyanyike baji mu masongola baji na munongo wa baana. Bano bantu ke babipuluka—banabalume, banabakazhi ne banyike banyema kwabo na mambo a nkondo, bya malwa, ne makatazhotu akwabo alengela’mba bashe mazubo abo ne kuya na kumona kwakwikala mu kyalo kyobatentakana nakyo pa bwipi. Bamo monka bebatupenya pa mizhi yabo. Pa kutendeka kwa malwañano ne bya malwa, basendele tubipe twabo ne baana babo ne kuya na kukebapo mpunzha ikwabo yawama kwikalako. Binkunka byo byapwa, babipuluka bavula babwela kwabo na kushimukulula mazubo abo ne kutendeka kwikala byonka byo baikalanga kala.
Pa myaka yavula, kyalo kya Central African Republic kitambwila babipuluka bafuma mu byalo byavula. Katataka bantu bavula kubikapotu ne Bakamonyi ba kwa Yehoba banyemene nkondo mu kyalo kya Democratic Republic of Congo ne kuya na kwikala mu kyalo kya Central African Republic.
Balongo Bebakwashishe
Bakamonyi mu kyalo kya Central African Republic bekimwene kwikala jishuko ja kukwasha bakwabo. Bakokozhezhe mazubo mwakufikila balongo ba bwina Kilishitu baishilenga. Pa kutendeka balajilenga mu bibamba bya mazubo angi, bino kibelengelo kya babipuluka byo kyailenga na kubailako, mazubo avula akebewenga. Mazubo a Bufumu amo bealwile ke madomitale. Bakamonyi ba mu kino kyalo bepaine bene kubika malaichi, mipompi ya mema ne kubika shamende panshi kuba’mba mwikale mwawama ku basakwikalangamo. Babipuluka nabo baingijile pamo na bano balongo kutunga ano madomitale mwa kulaala. Mutanchi wa kupwila kwa bwina Kilishitu, wanengezhewe mu mulaka wa Lingala kuba’mba bano babipuluka baiya bapwilenga bulongo ne kuja kajo ka ku mupashi kapana bumi. Kukwatankana kwajingapo pakachi ka Bakamonyi ba kino kyalo ne babipuluka kwamwesheshe kuba’mba kya kine twi banabankazhi mu byalo byonse.
Bisemi bya babipuluka kechi byonse byafikijilenga pamo ne. Bimye bimo, ba mu kisemi kimo baabenejilemo betainenga ku mapunzha kobayilenga. Mutanchi wa bafikilenga mutende wasungilwe pa Nzubo ya Bufumu imo imo. Kabiji pajinga lunengezho lwa kuya na kukeba balubijilemo. Ofweshi ya musampi itala pa mwingilo wa Bakamonyi ba kwa Yehoba mu kino kyalo watuminenga myotoka isatu pa juba pa juba kuya na kusenda Bakamonyi bakijinga mu jishinda ne bonse balubijilemo. Ino myotoka yayukanyikilwenga mambo panembwa byambo bya kuba’mba “WATCH TOWER—Bakamonyi ba kwa Yehoba.”
Akifwanyikizhai lusekelo lwajinga na banyike babipuluka batanu na babiji baabenejilemo na bansemi yabo byo bamwene motoka mwajinga Bakamonyi ba kwa Yehoba. Bukiji-bukiji banyemejile konka ne kwiyukanyikisha’mba nabo Bakamonyi. Balongo bebabujile’mba bakanjile mu motoka ne kwibatwala pa Nzubo ya Bufumu po bataine ba mu bisemi byabo.
Kika kikwasha bano bena Kilishitu bakine kuchinchika ku makatazho a uno mutundu o batanyiwamo javula? Bashiinwa kuba’mba tuji mu moba akupelako aambijilwe jimo mu Binembelo Byazhila.—2 Timoti 3:1-5; Lumwekesho 6:3-8.
Bino nangwa byonkabyo, bayuka’mba katatakatu Yehoba Lesa afumyepo makondo, lupato, malwañano ne lutobo. Kafwako ukekala kipuluka jibiji ne. Bino pa kino kimye, kwesakana na byaambile mutumwa Paulo pa 1 Kolinda 12:14-26, Bakamonyi ba kwa Yehoba betemwa bene na bene. Nangwa kyakuba baabenamo mambo a mikola, mipaka, kupusana-pusana kwa mishobo ne misinso, beta muchima bene na bene kabiji umvwe umo wakajilwa kechi bamulekelela ne.—Yakoba 1: 22-27.
[Mapu pa paja 30]
(Umvwe mukeba bine byambo, monai mu buku)
AFRICA
Central African Republic
Democratic Republic of Congo
[Picture credit line on page 30]
Mountain High Maps® Copyright © 1997 Digital Wisdom, Inc.
[Bipikichala pa peja 30]
Mazubo a Bufumu asatu bealwile ke mwakufikila
[Kipikichala pa peja 31]
Bibamba mwa kutekela byanengezhewe bukiji-bukiji
[Kipikichala pa peja 31]
Babipuluka baishile bavula bingi
[Bipikichala pa peja 31]
Mwana wasemejilwe mu bukipuluka