Kwikepesha Kwakatazha Bingi

BANTU bavula bamona kwikepesha nobe kintu kyabula kunema mu bwikalo bwa ano moba. Aba batangijila bakwabo ne kumwekana nobe bo baikala bulongo bo bene bakeba kujiila bakwabo makusu pa mutwe, kwilundumika, kabiji bo bantu bamo bakeba kuba bintu monka mo basakila. Bantu bavula bakumbwa bwikalo bwa banonshi ne kutumbalala kwabo, pano bino kechi bakumbwa bwikalo bwa boba bekepesha ne kukoka muchima ne. Javula bantu bekala bulongo betota amba bo bene balengela kuba amba bekalenga bulongo na mambo a kwingila na ngovu. Mu kifulo kya kuba’mba bekepeshe, bepa munema abo bene na mambo a kwikala bulongo.

Mwina Canada umo upesa bya kupesa pesa waambilepo pa “byubilo bya kwilundumika ne kwitota bibakumbane” mu kyalo kyanji. Bakwabo beumvwa amba tubena kwikala mu ntanda amo bantu mo banemeka bintu bya kisangajimbwe kukila bwikalo bwalumbuluka ne kwamba amba bantu bavula ano moba babena kuyatu na kwitemwa abo bene kwapwa. Mu bwikalo bwa uno mutundu, kyubilo kya kwikepesha kechi bekinemeka ne.

Bantu bamo bakonsha kwitaba’mba kwikepesha kwawama, mambo bantu bekepesha bawama kwikala nabo. Pano bino, mu ino ntanda muji bwitote, bamo bachina amba umvwe bekepesha, bakwabo bakebamona amba bazenzalala.

Mambo a Lesa Baibolo aambijile jimo’mba mu ano moba etu bantu bakekala “ba kwitota, ba kwilemena.” (2 Timoti 3:1, 2) Abya kuba mwaitaba amba buno bungauzhi bubena kufikizhiwa nenyi? Nanchi mulangulukapo’mba kyanema kwikepesha nyi? Inyi mulanguluka amba muntu wikepesha bakonsha kumumona ku bakwabo amba wazenzalala, kabiji amba kechi wakatazha kumujiila makusu pa mutwe ne?

Kishinka ke kya kuba’mba, Baibolo wapana bishinka byawama kutazha ku ene mambo o twafwainwa kunemekela kyubilo kya kwikepesha ne kwingila na ngovu kuba’mba twikale nakyo. Kabiji witukwasha kwikala na mweno yawama ya kino kyubilo ne kumwesha amba kwikepesha ke kiyukilo kya muntu wakosa, kechi kuzenzalala ne.

[Kipikichala pa peja 3]

Twafwainwa kwiumvwa byepi umvwe twaubapo bintu byanema mu bwikalo?