Mepuzho Kufuma Kubatanga

Mu Nehemiya 8:10, Bayudea bebambijile’mba “mukaje byanuna,” nangwa kya kuba Muzhilo wanembwa pa Bena Levi 3:17 waambile’mba: “Kechi mukaje nangwa mafuta” ne. Bino byambo byakonsha kuswañana byepi?

Mu mulaka mwine mutanshi, kyambo kyatuntululwa’mba “byanuna” kyanembwa mu Nehemiya 8:10 ne kyambo kya “mafuta” kyanembwa mu Bena Levi 3:17 byapusana. Kyambo kya Kihebelu kya kuba’mba cheʹlev, kyatuntululwa’mba “mafuta” mu Bena Levi 3:17, kyaamba kutazha ku mafuta a banyama nangwa a bantu. (Levi 3:3; Mito. 3:22, NW) Byambo biji pa kyepelo 17 bimwesha’mba bena Isalela kechi bafwainwe kuja mafuta a ku bya munda ne ku mafyo a banyama bo balambulanga ne, kabiji kechi bafwainwe kuja mafuta a kwipi na musana ne, mambo “mafuta onse o a kwa Yehoba.” (Levi 3:14-16) Onkao mambo, mafuta ajinga mu mubiji wa banyama afwainwe kupanwa kwi Yehoba, kechi kwiaja ne.

Pano kyambo kyatuntululwa’mba “byanuna” kyanembwa mu Nehemiya 8:10 kitelwa’mba mash·man·nimʹ, kabiji pa kino kinembelo po ponkatu po kyanembwa mu Binembelo bya Kihebelu. Kyatuntululwa kufuma ku kyambo kya sha·menʹ, kilumbulula’mba “nunai, ikalai banuna.” Mulanguluko mwatala byambo bikwabo byaamba pa kino kyambo byalumbulula kwikala bulongo. (Esakanyaiko Isaya 25:6.) Kyambo kimo kyaingijishiwa kufuma ku kino kyambo kya sha·menʹ, ke sheʹmen, kyatuntululwa javula’mba “manyi” kabiji kino kyonka kyambo kya manyi kiji ne mu ñambilo ya kuba’mba ‘manyi a maolivi.’ (Mpitu. 8:8; Levi 24:2) Byonka byo kyaingijishiwa mu Nehemiya 8:10, kyambo kya mash·man·nimʹ kyaamba kutazha ku kajo kanengezhiwa na manyi avula bingi kabiji kano kajo kakonsha kuvwangamo ne nyama iji na tumafuta bino kechi bikasa bya mafuta avula a nyama ne.

Nangwa kya kuba bena Isalela bebakainye kuja nyama wa mafuta, bakonsheshe kuja kajo kawama bulongo. Bintu nabiji keke walengwa na kajo ka museke kechi bamoshanga na mafuta a nyama ne, kana na manyi aengulwa ku bijimwa, kikatakata manyi a maolivi. (Levi 2:7) Buku wa Insight on the Scriptures walondolola’mba bintu “byanuna” byalumbulula “bintu byakabanda, byabula kukaka nangwa kuminina, bya mabwenge, kubikakotu ne bintu byonse biji na mulowelenge byanengezhiwa na manyi engulwa ku bijimwa.”

Pano bena Kilishitu bayuka’mba muzhilo waambile pa kukanya kuja mafuta wajinga lubaji lwa Mizhilo. Bino abo kechi batangijilwa na ino Mizhilo kubikakotu ne bintu byonse byaamba pa milambo ya banyama ne.—Loma 3:20; 7:4, 6; 10:4; Kolo. 2:16, 17.