BUTALA BWA MABUKU BWA PA INTANETI

Nanchi Munemeka Bumi Byonka Lesa byo Ebunemeka Nyi?

‘Ikalai mu Butemwe bwa Lesa’
- 5, 6. Mizhilo Lesa yo apele Mosesa yamwesheshe byepi kuba’mba mashi azhila ne kunema? (Monai kakitenguluzha “Nemekainga Bumi bwa Banyama.”)
  
  ⁵ Bino bishinka bibiji byanema, bebimwesha mu Mizhilo Lesa yo apele Mosesa. Pa Bena Levi 17:10, 11 paamba’mba: “Muntu yense . . . waja mashi a byepi nangwa a byepi, nkakana awa yense ukaja mashi kabiji nkamuchibako ku balongo banji. Mambo bumi bwa kintu kyumi buji mu mashi, kabiji amiwa neapana pa kya kusokelapo bitapisho kwikala a kufuchilako mambo enu, mambo mashi o afuchilako mambo na mambo a bumi buji mu mashi.”a—Monai kakitenguluzha kaamba’mba “Mashi Aji Bingi na Bulume bwa Kufuchilako Mambo.”
  
  Nakonsha kulumbulwila byepi dokotala byo nafuukulapo pa bya kwingijisha tubibese twa mashi?
  
  MASHI AJI BINGI NA BULUME BWA KUFUCHILAKO MAMBO
  
  Mu Mambo a Lesa, mashi beambapo kuba’mba bumi. Onkao mambo, mu jishinda ja kumuzhachisha na mambo a kubula kulondela mikambizho ya Yehoba, ndengamambo walapila mu bena Isalela ba kala wapananga nyama kwikala kitapisho pa kya kusokelapo bitapisho kya Lesa. (Bena Levi 4:27-31) Kino kitapisho kyamufuchilanga mambo anji bino pa kakimyetu kacheche.
  
  Byonka byo bekingijisha mu Baibolo, kyambo kya “kufuchila mambo” kilumbulula “kupingizhapo” nangwa “kuvweta,” byonka byo tuvweta pa mpuki na tampa waesakana bulongo. Nangwa byonkabyo, kafwako nyama wakonsheshe “kuvweta” bulongo nangwa’mba kufuchila bantu mambo ne. Pano bino, bitapisho bya banyama byaimenejilengako kitapisho kyalumbuluka kyaishilenga kya kufuchila mambo.—Bahebelu 10:1, 4.
  
  Kuno kufuchila kwa mambo bekunengezhezhe pa “kulambulwa kwa mubiji wa kwa Yesu Kilishitu ye alambwile jimotu.” (Bahebelu 10:10) Bumi bwa Kilishitu bwalumbuluka, bwaimenejilengako “mashi anema aji nobe mashi a mukooko wabula bulema ne biko,” bwajingatu pamo na bumi bwaelele Adama. (1 Petelo 1:19) Byonkabyo, mu jishinda ja kukumya kabiji ja butemwe, Yehoba waingijile mu bololoke ne kunengezha “kwitupokolola myaka ne myaka.”—Bahebelu 9:11, 12; Yoano 3:16; Lumwekesho 7:14.

Nanchi Munemeka Bumi Byonka Lesa byo Ebunemeka Nyi?

‘Ikalai mu Butemwe bwa Lesa’
- a Kwamba pa byambo byaambile Lesa bya kuba’mba, “bumi bwa kintu kyumi buji mu mashi,” magazini umo wa Scientific American waambapo’mba: “Nangwa kya kuba kyakonsha kwambiwa’mba mashi emenako bumi, bino byambo bya kuba’mba bumi bwa kintu kyumi buji mu mashi, bya kine: maselo onse a mashi akebewa bingi pa kuba’mba muntu ekale na bumi.”