Bakwetu bo Bañanyi?

4. Kwesakana na Bena Levi kitango 19, Bayudea bafwainwe kutemwa bañanyi?

⁴ Byo abujilenga Mufaliseo amba mukambizho wa bubiji ke wa kutemwa muntu byonka byo witemwa, Yesu watazhizhenga ku muzhilo wapainwe ku bena Isalela wanembwa pa Bena Levi 19:18. Mu kino kyonka kitango, Bayudea bebambijile’mba bafwainwe kumona benyi amba nabo bakwabo, kechi bena Isalela bonkatu ne. Kyepelo 34 kyaamba’mba: “Pakuba awa mwenyi ye mwikala nanji akekale kwi anweba pamo nobe mwina kyalo, kabiji ukamutemwa pamo byonka byo witemwa obe mwine; mambo ne anweba mwajinga benyi mu ntanda ya Ijipita.” Onkao mambo, aba babujile kwikala Bayudea, kikatakata boba batambwijile mambo awama, bafwainwe kwibatemwa.

Kutemwa Bakwetu byo Kulumbulula

8. Bena Levi kitango 19 baambapo amba butemwe bwafwainwe kumweshiwa byepi?

⁸ Kutemwa bakwetu kuji byonka biji kutemwa Lesa, kechi ke kintutu kyo tumvwa mukachi ketu ne; butemwe bumwekela mu byubilo. Pa kuba’mba tumvwishe, twafwainwa kwambapo jibiji byambo byanembwa mu Bena Levi 19 byakambizha bantu ba Lesa kutemwa bakwabo byonka byo betemwa bene. Mu kino kitango tutangamo’mba, bena Isalela bakambizhiwe kuleka bayanji ne benyi kunowako kajo. Kino kyalengelanga kubula kwiba, kubepa, nangwa kuba bujimbijimbi. Bena Isalela kechi bafwainwe kutala ku bilungi pa kuchiba mambo mu bije ne. Nangwa kya kuba bafwainwe kukajipilañana umvwe kyafwainwe, bebambijile kikatakata amba: “Kechi ukamushikwe mulongo wobe mu muchima wobe ne.” Uno mukambizho ne mikambizhotu ikwabo beyambiletu mu byambo bimo amba: “Ukatemwe mukwenu pamo byonka byo witemwa obe mwine.”—Bena Levi 19:9-11, 15, 17, 18.

9. Mambo ka Yehoba o akambizhe bena Isalela kwipatula ku mikoka ikwabo?

⁹ Nangwa kya kuba bena Isalela bafwainwe kutemwa bakwabo, bino bafwainwe ne kwipatulako ku boba bapopwelanga balesa ba bubela. Yehoba wibajimwine pa bubi ne bintu byatama byakonsheshe kufumamo mu kupwanañana kubi. Kya kumwenako, pa mambo a yewa mukoka bena Isalela ye bafwainwe kupangamo, Yehoba wibakambizhe’mba: ‘Kechi mukasongozhane nabo ne, mu kupana baana benu ba bakazhi bakasongolwe ku baana babo ba balume ne, nangwa kutambula baana babo ba bakazhi amba bakebasongole ku baana benu ba balume ne. Mambo pa kuba byobyo bakebasendula baana benu ba balume, kya kuba’mba bakaleka kundondela amiwa ne kupopwela bakapopwela balesa bangi; kabiji bukaji bwa Yehoba bukemubukila.’—Mpitulukilo ya mu mizhilo 7:3, 4.