Yesu Wakainye Luvula Pa Kalunga Ka Mema

Yesu wakookele bingi na mambo a kwingila juba jonse. Byo afikile, waambijile baana banji ba bwanga amba: “Twayai twabukile ku bushiya,” kufuma mu Kapenama.—Mako 4:35.

Ku bushiya bwa Kalunga ka Ngalilea na ku musela kwajinga kibunji kya Bangalasene, kyo batelanga’mba Ndekapoli. Mu mizhi ya Ndekapoli mo mwavujile bisho bya Bangiliki nangwa kya kuba mwaikalanga ne Bayudea bavula.

Kimye Yesu kyo afuminenga mu Kapenama, bantu bavula bamumwene. Kabiji kwajinga ne maato akwabo amulondejilenga. (Mako 4:36) Kabiji ko bayilenga kechi kwalepele ne. Kalunga ka Ngalilea kabayile bingi, mubula kajinga makilomita 21 ne mu bwipi makilomita 12. Kabiji kechi kasebalele ne.

Nangwa kya kuba Yesu wajinga muntu walumbuluka, bino wakookele bingi na mambo a mwingilo ye aingijile wa kusapwila. Onkao mambo, byo bayilenga, aye walaajile mu bwato kunyuma saka ashakamina pa mushamino.

Batumwa bavula bayukile bingi kuvuwa maato, bino luno lwendo kechi lwibapelejile ne. Kalunga ka Ngalilea bekazhokolokele ku mitumba, kabiji pa kano kalunga ka mema papitanga mwela wa kyuya. Bimye bimo, mwela wa mashika wafumanga mu mitumba wapuupilanga pa kalunga inge wasambakana na mema atwa kyuya, pa kalunga paikalanga luvula mukatampe. Akino kyo kyamwekele. Kechi papichile ne kimye kyabaya ne, manyaki atatwile kwipuma ku bwato. Kabiji “bwato bwabo bwatendekele kuyula mema kabiji bajinga mu kizumba.” (Luka 8:23) Bino pa kikye kimye, Yesu saka alaala.

Aba banabalume bayukile kuvuwa bwato baesekele kwibuzhalulula, byonka byo baubanga kala. Bino pa kikye kimye, bakankelwe bya kuba. Byo baakaminwe na mambo a bumi bwabo, babushishe Yesu ne kumwambila’mba: “Nkambo, tupulushai, tusakufwa!” (Mateo 8:25) Baana ba bwanga baakaminwe’mba basakuloba.

Yesu byo abukile, waambijile batumwa banji amba: “Mambo ka o mwaubila moyo, anweba baji na kalwitabilo kacheche?” (Mateo 8:26) Kepo Yesu akainye luvula ne kalunga ka mema amba: “Zhindama!” (Mako 4:39) Luvula wikilekele ne pa kalunga ka mema paubile ne nzoo. (Mako ne Luka balumbulula kino kyamwekele. Kitanshi, balumbulula kuba’mba Yesu wakainye luvula mu jishinda ja kukumya, kepo baamba pa kubula lwitabilo kwa baana ba bwanga.)

Akifwanyikizhai byalangulukilenga baana ba bwanga. Bamwenetu kalunga kazhindama, ne luvula mukatampe waleka. Baakaminwe bingi kabiji beambijilenga mulwabo amba: “Nanchi uno muntu ye ñanyi? Mambo luvula ne kalunga ka mema nabyo bibena kumukookela.” Kabiji bafikile ku kitulu mu mutende. (Mako 4:41–5:1) Kampe maato akwabo ajinga pa kalunga ka mema abwelele ku kitulu kya ku muzhika.

Kitutekenesha bingi pa kuyuka kuba’mba Mwana Lesa uji na bulume bwa kukanya luvula. Kabiji kimye kyo akatatula kulama ino ntanda mu Bufumu bwanji, bantu bonse bakazhikijilwa, mambo kechi kukekalapo bintu bikaletanga bya malwa ne.