Wakwachile Kivwalo Kya Kwa Yesu Ne Kubukwa

Bayudea baikelanga ku muzhika buyeke bwa Kalunga ka Ngalilea baumvwine’mba Yesu wabwela kufuma ku Ndekapoli. Kyamweka bavula baumvwine’mba Yesu wakainye luvula kabiji wabukile ne bantu bajinga na bandemona. Onkao mambo, “jibumba jikatampe” jakonkene ku musezho wa kalunga, kampe mu mpuzha ya Kapenama na kumutundaila Yesu byo abwelele. (Mako 5:21) Byo atuntukijile ku kitulu, bantu bamubungile ne kukebesha kuteleka.

Umo wakebeshe bingi kumona Yesu wajinga Yelusa mukulumpe wa nshinagoga. Ino nshinagoga yafwainwa yajinga mu Kapenama. Yelusa waponejile ku maulu a kwa Yesu ne kumusashijila bimye byavula’mba: “Mwanami wa mukazhi wakolwa bingi. Mwane twayai mukamukwate maboko enu kuba’mba abukwe.” (Mako 5:23) Nanchi Yesu wakonsheshe kubapo ka pa byamusashijile Yelusa pa mwananji wamukazhi yenka umotu wajinga na myaka 12, kabiji ye atemenwe bingi?—Luka 8:42.

Yesu byo ayilenga ku nzubo ya kwa Yelusa, kwamwekele kintu kikwabo kyamufikile bingi pa muchima. Bantu bavula bamulondejilenga Yesu batemenwe bingi mambo batengejilenga kumonapo kya kukumya kikwabo. Bino, mwanamukazhi umo mu jino jibumba watele muchima pa kikola kyanji.

Uno mwanamukazhi mwina Yudea wakolelwe kikola kya kupita mashi pa myaka 12. Wayile ku bashayuka ba michi bapusana pusana kabiji waingijishe mali anji onse kuba’mba abukwe. Bino kafwako bukwasho bwafuminemo ne, pakuba kikola kyanji “kyaswezhezhe ne kuswezha.”—Mako 5:26.

Byonka byo mwayukila jimo, kikola kyanji kyamulengelanga kukooka bingi kabiji kyamulengeshanga ne bumvu. Javula muntu uji na kino kikola kechi ukasuluka kubuula bantu pa kikola kyanji ne. Kabiji kwesakana na Mizhilo ya Mosesa, mwanamukazhi uji na kikola kya kupita mashi waikalanga wa muzhilo. Muntu yense wamukwatanga nangwa wakwatanga ku kivwalo kyanji kiji na mashi wafwainwe kowa ne kwikala wazhila kufikatu ne mabanga.—Bena Levi 15:25-27.

Uno mwanamukazhi “byo aumvwine nkuwa ya kwa Yesu,” wakebeshe bingi kumumona. Na mambo a kwikala wa muzhilo, wapichile mukachi ka jibumba kwa kubula kumuyuka ku bantu, kabiji waishile kunyuma ya kwa Yesu saka amba’mba: “Umvwe nkwatetu ku kivwalo kyanji kya peulu, nsakubukwa.” Byo akwachile ku kivwalo kya kwa Yesu, ponkapotu waumvwine’mba mashi achibika. Wabukilwe ku “kikola kyanji kyamumanyikilenga.”—Mako 5:27-29.

Kepo Yesu aambile’mba: “Ñanyi waji kunkwata?” Abya mwalanguluka’mba uno mwanamukazhi waumvwine byepi pa kumvwa byaipwizhe Yesu? Petelo wamukumbwile Yesu aku nobe ubena kumukwasha kulanguluka bulongo, amba: “Mufunjishi, mabumba emubunga kabiji abena kwimufina.” Pano mambo ka Yesu o a ipwizhe’mba: “Ñanyi waji kunkwata?” Yesu waambile’mba: “Kuji waji kunkwata, mambo naumvwa bulume bwalupukamo mwi amiwa.” (Luka 8:45, 46) Kine, uno mwanamukazhi wabukilwe na mambo a bulume bwafumine mwi Yesu.

Uno mwanamukazhi byo amwene’mba Yesu wayuka kyamwekele, waishile saka azakama ne kufukama kwi Yesu. Ponkapotu waambile ku meso a bantu bonse pa mambo a kikola kyanji ne byo abukilwe. Bino Yesu wamutekeneshe na byambo bya kuba’mba: “Mwanami, lwitabilo lobe lwakulengela kubukwa. Yanga mu mutende, kabiji kikola kyobe kyatama kipwe.”—Mako 5:34.

Kwa kubula nangwa kuzhinaukatu ne, Muntu Lesa ye asala kulama ino ntanda wakasuluka bingi, uji bingi na lusa, kabiji kechi watatu bantu muchima ne, bino uji ne na bulume bwa kwibakwasha.