Ingijishainga Maana Alumbuluka Pa Kwinengezhezha Jimo Bya Kwikala Kulutwe

Kishimpi kyaambile Yesu kya mwana waelekele kyafwainwa kyalengejile basonkeshi, banembeshi ne Bafaliseo batelekelenga kuyuka’mba Lesa akeba kulekelako mambo bandengamambo balapila. (Luka 15:1-7, 11) Yesu waambijile baana banji ba bwanga kishimpi kikwabo. Kino kishimpi kyajinga kya muntu wajinga nonshi watambwijile sawakya wa kuba’mba kalama wanji kechi waingijilenga bulongo ne.

Yesu waambile’mba uno kalama bamupelemo mambo a kuba’mba kechi walaminenga bulongo bintu bya nkambo yanji ne. Onkao mambo, nkambo yanji wafuukwilepo kupanga kalama nkito. Uno kalama waambile mu muchima wanji amba: “Nsakuba byepi nkambo yami byo asakumfumyapo pa bukalama? Kechi nji ne na bulume bwa kujima ne, kabiji nji bingi na bumvu bwa kulomba bintu.” Byo alangulukile pa bwikalo bwanji bwa kulutwe waambile’mba: “Nayuka byo nsakuba pa kuba’mba bantu bakantambwile mu mazubo abo umvwe bamfumyapo pa bukalama.” Ponkapo waichile bonse bajinga na nkongole ya nkambo yanji ne kwibepuzha’mba: “Nanchi wakongwele inga kwi nkambo yami?”—Luka 16:3-5.

Mutanshi wakumbwile’mba: “Kitota kimo kya bipimo bya manyi a maolivi.” Ko kuba’mba malita 2,200. Uno nonshi wafwainwe wajinga na bichi bya maolivi byavula bingi nangwa wajinga musulu wapoteshanga manyi. Kalama wamubuujile’mba: “Tambula pepala wobe wa nkongole wikale panshi unembepo bukiji 50 [malita 1,100].”—Luka 16:6.

Kabiji kalama waipwizhe wa bubiji amba: “Nga obewa, wakongwele inga?” Aye wamukumbwile’mba: “Kitota kimo kya bipimo bikatampe bya wichi.” Ko kuba’mba malita 22,000. Kalama wamwambijile’mba: “Tambula pepala wobe wa nkongole unembepo 80.” Wamufumisheko malita acheche ku o akongwele.—Luka 16:7.

Na mambo a kuba kalama wakijinga na luusa lwa kutala pa mali a nkambo yanji, onkao mambo, wajinga na ngovu ya kukepeshako nkongole yakongwele bakwabo kwi nkambo yanji. Kupichila mu kukepeshako nkongole, uno kalama walengele bulunda na boba bafwainwe kumulama umvwe bamupanga nkito.

Mu kuya kwa kimye nkambo yanji waishile kuyuka byamwekele. Nangwa kya kuba byo aubile byafwainwe kulengela nkambo yanji kubula kumwenamo mali avula, waumvwine bulongo pa byaubile kalama ne kumutakaika mambo “nangwa kya kuba kechi wajinga waoloka ne,” bino, “waubile bintu na maana.” Yesu waambile’mba: “Baana ba mu buno bwikalo bajimuka bingi pa bya kwingila na ba mu kisemi kyabo, kukila baana ba kyeya.”—Luka 16:8.

Yesu kechi waambile’mba byaubile uno kalama byawamine nangwa kutundaika mashinda a bujimuku a kubilamo busulu ne. Pano ñanyi kishinka kyo aambilengapo? Watundaikile baana banji ba bwanga amba: “Ikalai balunda na nsabo yabula koloka, pa kuba’mba umvwe yapwa, bakemutambule mu mapunzha a kwikalamo myaka ne myaka.” (Luka 16:9) Kya kine, kino kishimpi kitufunjisha kulanguluka pa bintu bya kulutwe ne kwingijisha maana alumbuluka. Bakalume ba Lesa, ko kuba’mba “baana ba kyeya” bafwainwa kwingijishanga bintu byabo bya ku mubiji mu jishinda jawama saka balanguluka pa bumi bwa myaka ne myaka buji kulutwe.

Yehoba Lesa ne Mwananji bo bonkatu bakonsha kutambwila bantu mu Bufumu bwa mwiulu nangwa mu Paladisa pano pa ntanda. Twafwainwa kwibikako kwikala na bulunda bwawama nabo kupichila mu kwingijisha bintu byetu bya ku mubiji mu kutundaika Bufumu. Tukekala na bumi bwa kulutwe inge ngolode, siliva ne bintu bikwabo bya ku mubiji byaonaika.

Yesu watwajijile kwamba’mba bantu bengijisha bintu byabo bya ku mubiji mu bukishinka, bakekala ba kishinka ne mu bintu byakilamo kunema. Wanungilepo amba: “Onkao mambo, umvwe kechi mwi ba kishinka mu nsabo yabula koloka ne, ñanyi ukemupa nsabo ya kine [nabiji mwingilo wa Lesa]?”—Luka 16:11.

Yesu wamwesheshe baana banji ba bwanga amba bafwainwe kuba bintu byavula pa kuba’mba bakebatambule “mu mapunzha a kwikalamo myaka ne myaka.” Muntu kechi wakonsha kwikala kalume wa Lesa wa kine kabiji pa kimye kimo na kwingijila bintu bya ku mubiji ne. Yesu wapezhezheko amba: “Kafwako kalume wa mu nzubo wakonsha kwingijila bankambo babiji ne, mambo ukashikwapo umo ne kutemwapo mukwabo, nangwa kukookela umo ne kukana mukwabo. Kechi mwakonsha kwikala bakalume ba Lesa ne ba Nsabo ne.”—Luka 16:9, 13.