Yesu Ye “Kajo Ka Bumi”

Yesu wajishishe biumbi mu jishinda ja kukumya ku musela wa Kalunga ka Ngalilea kabiji wanyemene kimye bantu kyo bakebelenga kumukwata’mba ekale mfumu. Pa jonka ja juba bufuku, waendele pa kalunga pajinga luvula kabiji wapulwishe Petelo wakebelenga kwibila lwitabilo lwanji byo lwakepele kimye kyo aendele pa mema. Kabiji Yesu wakainye luvula kuba’mba apulushe baana banji ba bwanga bajinga mu bwato bwakebelenga konaika.

Yesu wabwelele ku muzhika wa kalunga, ku mpunzha ya Kapenama. Bantu bo ajishishe mu jishinda ja kukumya bamutaaine ne kumushikisha’mba: “Ñanyi kimye kyo mwaji kwiya kuno?” Yesu pa kwibanena, wibambijile’mba baishile kwi aye na mambo a kukeba’mba ebajishe jikwabo. Wibakambizhe’mba kange ‘bengijilenga kajo konaika ne, bino bengijilenga kajo ka myaka kakebalengela kwikala na bumi bwa myaka ne myaka.’ Onkao mambo, bamushikishe’mba: “Nanchi twafwainwa kuba byepi pa kuba’mba twingile mingilo ya Lesa?”—Yoano 6:25-28.

Kyamweka abo balangulukilenga pa mingilo yanembwa mu Mizhilo, bino Yesu waambilenga pa mwingilo umo wanema bingi. Waambile’mba: “Uno ye mwingilo wa Lesa, wa kuba’mba mumwitabile awa ye atumine.” Bino, nangwa kya kuba bantu bamwene bya kukumya byaubile Yesu, kechi bamwitabijile ne. Bakebelenga’mba obepo kiyukilo kimo pa kuba’mba bamwitabile. Bamushikishe’mba: “Ñanyi mwingilo ye mubena kuba?” Kabiji banungilepo amba: “Bashakulu betu bajiilenga manna mu kiselebwa byonka byo kyanembwa’mba: ‘Wibapele kajo ka kuja kufuma mwiulu.’”—Yoano 6:29-31; Salamo 78:24.

Pa kukumbula byo bamushikishe pa mambo a kiyukilo, Yesu wibalumbulwijile kwafumine kajo ko ebapele mu jishinda ja kukumya amba: “Nemwambila namba, Mosesa kechi wimupele kajo kufuma mwiulu ne, bino Batata bemupa kajo ka kine kufuma mwiulu. Mambo kajo ka Lesa, ye yewa ufuma mwiulu ne kupana bumi ku ba pano pa ntanda.” Na mambo a kuba’mba kechi bakwatakenye kishinka kyo aambilengapo ne, bamwambijile’mba: “Nkambo, mwitupenga koko kajo kimye kyonse.” (Yoano 6:32-34) Ñanyi “kajo” Yesu ko aambilengapo?

Walumbulwile’mba: “Amiwa yami kajo ka bumi. Yense wiya kwi amiwa kechi ukafwa nzala ne, kabiji yense ungitabila amiwa kechi ukafwa kilaka ne. Bino byonka byo naji kwimwambila, anweba mwammona, bino kechi mwaitabila ne. . . . Naiya kufuma mwiulu, kechi na kuba kyaswa muchima wami ne, poso kuba kyaswa muchima wa yewa wantumine. Kino kyo kyaswa muchima wa yewa wantumine, kya kuba’mba kechi ngelepo nangwa umo pa boba bo ampele ne, bino nafwainwa kwibasangula mu juba jikapelako. Mambo kino kyo kyaswa muchima wa Batata, kuba’mba yense wayuka Mwana ne kumwitabila, akekale na bumi bwa myaka ne myaka.”—Yoano 6:35-40.

Bantu byo baumvwine bino, bazhingijile bingi, kabiji Bayudea batatwile kumunyinyita. Beipwizhenga’mba wakonsha kwikala byepi “kajo kafumine mwiulu”? (Yoano 6:41) Abo bamumwenenga’mba mwana wasemwa ku bantu ba mu Nazala, muzhi wa mu Ngalilea. Onkao mambo, batatwile kushikisha’mba: “Nanchi uno kechi ye Yesu mwana wa kwa Yosefwa, shanji ne inanji bo twayuka nenyi?”—Yoano 6:42.

Yesu wibakumbwile’mba: “Kilekai kunyinyita mukachi kenu. Kafwako muntu wakonsha kwiya kwi amiwa ne, poso Batata bantumine bamukokela ko nji, kabiji nkamusangula mu juba jikapelako. Kyanembwa mu buku wa Bangauzhi amba: ‘Bonse bakebafunjisha kwi Yehoba.’ Yense umvwa kwi Batata ne kufunda, wiya kwi amiwa. Kafwako muntu wamonapo kala Batata ne, kanatu yenkawa wafuma kwi Lesa; uno ye wamonapo Batata. Kinetu nemwambila namba, yense witabila ukekala na bumi bwa myaka ne myaka.”—Yoano 6:43-47; Isaya 54:13.

Kimye kyo esambile ne Nikodema, Yesu walumbulwile’mba muntu pa kuba’mba ekale na bumi bwa myaka wafwainwa kwitabila mu Mwana muntu. Waambile’mba: “Bonse bamwitabila [Mwana Lesa yenkawa umotu] kechi bakonaike ne, poso bakekale na bumi bwa myaka ne myaka.” (Yoano 3:15, 16) Pano Yesu waambilenga ku jibumba jikatampe, kwibabuula kuba’mba aye ye wafwainwa kwibalengela kwikala na bumi bwa myaka, kechi manna nangwa shinkwa wajinga mu Ngalilea ne. Onkao mambo, muntu wakonsha kwikala byepi na bumi bwa myaka ne myaka? Yesu wabwezhezhepo kwamba’mba: “Amiwa yami kajo ka bumi.”—Yoano 6:48.

Bino uno mwisambo wa pa kajo kafuma mwiulu watwajijile kufikatu ne kimye Yesu kyo afunjishenga mu nshinagoga yajinga mu Kapenama.