BUTALA BWA MABUKU BWA PA INTANETI

“Batwajijile Kwikala na Lusekelo Lukatampe ne Kuyula Na Mupashi Wazhila”

“Kushimuna Bulongo” Mambo a Bufumu bwa Lesa
- 5. Lumbululai byavwangilwemo mu kusapwila pa jikuji ja Kipilusa.
  
  ⁵ Panyuma ya kuya ku Selukya, kiito kyajinga pepi na Antioka, ba Banabasa ne Saulo bayile na bwato ku jikuji ja Kipilusa, palepele makilomita 200.d Byo ajinga ngikazhi wa ku Kipilusa, Banabasa kwa kubula nangwa kuzhinauka ne, wakebeshe bingi kuleta mambo awama ku bantu bajinga mu ino nyaunda mo aikalanga. Byo bafikile ku Salamisa, muzhi wajinga ku musela wa jino jikuji, bano banabalume kechi baikele na kuba bintu bikwabo ne. Ponkapotu, “batendekele kusapwila mambo a Lesa mu mashinagoga a Bayudea.”e (Byu. 13:5) Banabasa ne Saulo bafumine kwatendekela jikuji ja Kipilusa kufika ko japelela saka basapwila mu mizhi ikatampe. Kechi na mambo a jishinda jo baingijishe ne, bano bamishonale baendele makilomita nobe 160.
  
  MU MASHINAGOGA A BAYUDEA
  
  “Nshinagoga” ilumbulula “kukonkanya pamo.” Yalumbululanga ne kuba’mba kubuñana nangwa kipwilo kya Bayudea kabiji yalumbululanga mpunzha nangwa kishimikwa mwabuñenanga bantu.
  
  Bavula bamba’mba mashinagoga atendekele kimye kyayile Bayudea mu buzha mu Babilona pa myaka 70 nangwa panyumatu ya kufuma mu buzha. Mashinagoga ajinga mapunzha mo bafunjishishanga bantu, kupopwelamo, kutangilamo Binembelo ne kutundaikilamo bantu kulondela byaamba Binembelo. Mu myaka kitota kitanshi C.E., muzhi yense mu Pelisitina wajinga na nshinagoga. Mizhi ikatampe yajinga na mashinagoga kukila pa imo kabiji mu Yelusalema mwajinga avula.
  
  Nangwa byonkabyo, Bayudea bonse kechi babwelele ku Pelisitina panyuma ya kufuma mu buzha mu Babilona ne. Bavula bayanga mu byalo bingi na kuba busulu. Ku ntendekelo ya myaka kitota kitanshi kya butanu, Bayudea baikalanga mu bijiiji 127 bya Bufumu bwa Pelisha. (Esh. 1:1; 3:8) Pa kupitapo kimye, Bayudea batatwile kwikala mu mizhi yazhokolokele Meditelanya. Bano Bayudea bapalañenejilemo, balenganga mashinagoga konse ko bayanga na kwikala.
  
  Mu mashinagoga, batanganga Mizhilo ne kwiilumbulula pa juba ja Sabado. Muntu watanganga ino Mizhilo pa mutuntamo wazhokolokelwe na bipona byo batanchikile mu mbaji isatu. Banabalume Bayudea bepaine, bo batanganga, kusapwila ne kutundaika bantu.

“Batwajijile Kwikala na Lusekelo Lukatampe ne Kuyula Na Mupashi Wazhila”

“Kushimuna Bulongo” Mambo a Bufumu bwa Lesa
- d Mu myaka kitota kitanshi, bwato bwaendanga makilomita 150 pa juba jimo umvwe mwela washikimana. Bino, umvwe mwela kechi washikimana ne, bwaendanga moba avula.