BUTALA BWA MABUKU BWA PA INTANETI

“Telekai byo Nsakwiambila”

“Kushimuna Bulongo” Mambo a Bufumu bwa Lesa
- 11. Paulo bamujimwineko’mba ka ku bakulumpe mu kipwilo, kabiji wafwainwe kuba byepi pa kuba’mba obile monka bamubujile? (Monai ne tubyambo twa munshi.)
  
  ¹¹ Onkao mambo, nangwa kya kuba mañwiñwi ajinga a bubela. Bayudea baitabijile kechi baswile kino kishinka. Na mambo a kino, bakulumpe mu kipwilo bakambizhe Paulo amba: “Tuji na banabalume bana bechipisha luchipoc abo bene. Yai na bano banabalume ne kwitokesha anwe bene pamo nabo monka mwayila mizhilo ne kwibalipililako kuba’mba bakebatende nsuki. Ne bantu bonse bakayuka’mba bintu byo baumvwine pe anweba kechi bya kine ne, bino bakayuka’mba byubilo byenu byawama, ne kuba’mba ne anweba mubena kulondela Mizhilo.”—Byu. 21:23, 24.
  
  12. Paulo wamwesheshe byepi muchima wa lukokelo ku bakulumpe mu kipwilo mu Yelusalema pa byo bamukambizhe kuba?
  
  ¹² Kyamweka Paulo wayukile’mba mañwiñwi bantu o baumvwine pe aye kechi o alengejile makatazho ne, pakuba kyalengejile kyajinga lupata lwa Bayudea bakakachijile ku Mizhilo ya Mosesa. Pano bino, wipaine kulondela byonse byamubujile bakulumpe mu kipwilo kikulutu kechi walajile mikambizho ya Lesa ne. Patanshi wanembele’mba: “Ku baji mu mizhilo naalukile ke wa mu mizhilo nangwa kya kuba amiwa kechi najinga mu mizhilo ne, pa kuba’mba mmwenemo aba baji mu mizhilo.” (1 Ko. 9:20) Pa kyokya kimye, Paulo walondejile byamubujile bakulumpe mu kipwilo mu Yelusalema ne kwikala “ke wa mu mizhilo.” Kukookela kwanji kwamwesheshe’mba ne atweba lelo jino twafwainwa kukokela bakulumpe mu kipwilo kechi kwiubilatu bintu atwe bene ne.—Hebe. 13:17.
  
  Nanchi ne anweba mukokela byonka byaubile Paulo umvwe mafunde a mu Baibolo kechi azhilululwa nenyi?
  
  MIZHILO YA BENA LOMA NE BANGIKAZHI BAJINGAMO
  
  Kafulumende wa bena Loma wapele luusa bakalama ba bibunji lwa kutala pa makatazho a mu kibunji. Bano balondelanga mizhilo ya Bayudea. Nangwa byonkabyo, bena Loma bebikile mu mambo a kwa Paulo na mambo a kuba bakebelenga kupwisha kiwowo kyabukile Paulo byo ajinga mu nzubo ya Lesa.
  
  Kafulumende wa bena Loma kechi wapele bangikazhi babujile bena Loma luusa lonse ne. Pano bino, bangikazhi bena Loma bajinga na luusa lwabujilepo boba babujile bena Loma.f Bena Loma bajinga na bwana bwa bene kabiji bebanemekele bingi mu Loma monse. Mizhilo kechi yaswishishe kukasa nangwa kupuma mwina Loma wabula mambo ne, mambo bazha bo bonkatu bo bafwainwe kuba bino. Kabiji bena Loma bajinga na luusa lwa kutwala mambo abo ku kije kya ndamakyalo inge babula kutondwa na byo bebachibila kwi kalama wa kibunji.
  
  Bantu baingijishe mashinda avula pa kutambula luusa lwa kwikala bena Loma. Jishinda jitanshi ja kwikelamo na luusa lwa kwikala mwina Loma, ke kusemenwa monka. Ndamakyalo javula wapanga luno luusa ku bantu bonse nangwa ku baiyanga mu uno muzhi na kwingila. Bapananga ne byete ku bazha bapotele bwana bwa bene ku bena Loma, bazha bo bakasulwile nangwa bashilikale babujile bena Loma baingijile pa myaka yavula. Kabiji kimye kimo bantu bapotanga luusa lwa kwikala ngikazhi. Mwine mukulumpe wa bashilikale aye Kaludiusa Lisiasa kyo kyo abujile Paulo amba: “Amiwa napotele na mali avula luno luusa lwa kwikala ngikazhi mwina Loma.” Paulo naye waambile’mba: “Bino amiwa nasemekelwe nalo.” (Byu. 22:28) Onkao mambo, mushakulu wa kwa Paulo wafwainwa watambwile luusa lwa kwikala mwina Loma, nangwa kya kuba jishinda jo atambwijilemo luno luusa kechi jayukanyikwa ne.
  
  f Mu myaka kitota kitanshi C.E., mu Yudea kechi mwajinga bena Loma bavula ne. Mu myaka kitota kya busatu, bangikazhi bonse po po bebapele luusa lwa kwikala bena Loma.

“Telekai byo Nsakwiambila”

“Kushimuna Bulongo” Mambo a Bufumu bwa Lesa
- c Bashayuka bamba’mba bano banabalume bachipile luchipo lwa kwikala Banazili. (Bala. 6:1-21) Pano bino, Mizhilo ya Mosesa yaingilanga ku luchipo lwa uno mutundu yalekele kwingila. Kyamweka Paulo walangulukilenga’mba kechi kyatamine bano banabalume kufikizha luchipo lo bachipile kwi Yehoba ne. Onkao mambo, kechi kyatamine kwi aye kwibalipililako mali ne kuya nabo ne. Kechi twayuka bulongo bintu byo bachipile ne, bino kyamweka Paulo kechi wapaineko milambo ya banyama (byonka byaubanga Banazili) balangulukanga’mba kuba bino kwatokeshanga bantu ku bundengamambo ne. Kitapisho kyalumbuluka kya kwa Kilishitu kyo kyalengejile bitapisho byonse bya kwitokesha ku bundengamambo kuleka kwingila. Kechi twayuka bintu byonse Paulo byo aubile ne, pano bino twafwainwa kuketekela’mba Paulo kechi waswile kuba kintu kyo ayukile’mba kyafwainwe jiwi janji ja mu muchima ne.