Kupwila Kwaikelako ‘Kukomesha, Kukosesha, ne Kutekeneshañana’

13. (a) Kupwila kwafwainwa kulengela boba batanwako kuba ka? (b) Bwipuzho ka bwanema ku bakulumpe mu kipwilo?

¹³ Paulo waambile amba nkebelo ya kupwila kwa kipwilo ke ya ‘kukomesha, kukosesha, ne kutekenesha’ boba batanwako.b (1 Ko. 14:3) Bakulumpe mu kipwilo kya bwina Kilishitu lelo jino bakonsha kumona byepi kuba’mba majashi a kupwila kwabo abena kukosesha balongo ne banyenga ne kwibatekenesha? Pa kuba’mba tukumbule, twayai twisambe pa kupwila kwafunjishe Yesu byo asangwilwe.

14. (a) Bi ka byaubiwe akwa kupwila kwanengezhezhe Yesu saka kukyangye kwikalako? (b) Mambo ka batumwa o batekeneshiwe kimye ‘Yesu kyo aishile ko baji ne kwamba nabo’?

¹⁴ Patanshi monai bintu byaubiwe akwa kupwila saka kukyangye kwikalako. Yesu saka bakyangye kumwipaya, batumwa “bamulekele ne kunyema banyemene,” kabiji byonka byo kyaambijilwe jimo, ‘bapalañene, mpala, mpala kwabo.’ (Mako 14:50; Yoa. 16:32) Kabiji panyuma ya lusanguko lwanji, Yesu waichile batumwa banji bajinga na bulanda na kutanwa ku kupwila kukwabo.c Kepo ‘baana banji ba bwanga jikumi na umo, bayile ku Ngalilea, konka ku mutumba ye ebalayile Yesu.’ Byo bafikile kokwa, ‘Yesu waishile ko baji ne kwamba nabo.’ (Mat. 28:10, 16, 18) Akifwanyikizhai byo kyatekeneshe batumwa Yesu byo aubile bino! Yesu waambile amba ka?

15. (a) Mitwe ka yo aambilepo Yesu, bino ki ka kyo abujile kwambapo? (b) Akwa kupwila kwalengejile batumwa kumvwa byepi?

¹⁵ Yesu watendekele na byambo bya kuba amba, “lūsa lonse napewalo.” Kepo ebapele mwingilo amba: ‘Onkao mambo yainga na kwibasambisha bantu baluke ke baana ba bwanga.’ Kyapeleleko, wibalayile mu butemwe amba: “Amiwa nji nenu moba onse.” (Mat. 28:18-20) Nanchi mwayuka kintu kyo abujile kuba Yesu nyi? Kechi wakajipijile batumwa banji ne; nangwa kwingijisha kyokya kimye kya kupwila kuzhinaukilamo milanguluko yabo nangwa kwibazhachisha pa mambo a kimye kicheche kyo bakokele mu lwitabilo ne. Mu kifulo kya kuba bino, Yesu wibamwesheshe butemwe bwanji ne bwa Shanji kupichila mu kwibapa mwingilo mukatampe. Yesu byo aubile bino, walengejile batumwa kumvwa byepi? Wibatundaikile ne kwibakosesha bingi kya kuba panyuma ya kokwa kupwila, batendekele jibiji “kufunjisha ne kusapwila mambo awama.”—Byu. 5:42.

16. Bakulumpe mu kipwilo kya bena Kilishitu lelo jino balondela byepi byajinga Yesu pa kutangijila kupwila kukosesha bonse?

¹⁶ Mu kulondela Yesu, bakulumpe mu kipwilo lelo jino bamona kupwila kuba’mba kyo kimye kyo bafwainwa kubula bakwabo ba mu lwitabilo kuba’mba Yehoba watemwa bingi bantu banji. (Loma 8:38, 39) Onkao mambo, mu majashi o bamba, bakulumpe mu kipwilo batatu muchima pa kukosesha balongo babo, kechi bata muchima pa bilubo byabo ne. Kechi bazhinauka byuba bakwabo ne. Mu kifulo kya byobyo, byambo byabo bimwesha amba bamona bakwabo ba mu lwitabilo kuba’mba ke bantu batemwa Yehoba kabiji bakeba kuba byawama. (1 Tesa. 4:1, 9-12) Kya kine, bakulumpe mu kipwilo kimo kimye bakebewa kupana lujimuno ku kipwilo kyonse, pano inge kya kuba bantu bachechetu bo babena kukebewa kololwako, kyawama kupana luno lujimuno ku bonkabatu belufwainwa. (Nga. 6:1; 2 Timo. 2:24-26) Pa kwamba ku kipwilo kyonse, bakulumpe mu kipwilo bemena pa kutakaika po kyafwainwa. (Isa. 32:2) Bebikako bingi kwamba mu jishinda ja kuba pa kupwisha kupwila, bonse mu luonde bakoselako ne kutundaikwa.—Mat. 11:28; Byu. 15:32.