Bena Kilishitu bamo ba mu Kolinda kechi bayukile kishinka pa kino ne, bakwabo nabo kechi baitabijile mu lusanguko ne. Mu nkalata itanshi yo anembejile bena Kilishitu ba kokwa, mutumwa Paulo wanembele pa bintu byakonsha kufumamo inge kya kuba lusanguko kechi lwajinga lwa kine ne. Wanembele’mba: “Umvwe kafwako lusanguko, ko kuba amba ne Kilishitu kechi wasangwilwe ne. Bino umvwe Kilishitu kechi wasangwilwe ne, ko kuba amba kusapwila kwetu ko kwatu ne lwitabilo lwetu lo lwatu. Kabiji twakonsha kwikala batumonyi babubela ba Lesa . . . Lwitabilo lwenu lo lwatu; mukiji mu bundengamambo bwenu. . . . Ne aba bafwila mwi Kilishitu ko kuba amba nabo baonaika.”—1 Kolinda 15:13-18.

Kwakonsha kwikala ne makatazho akwabo. Umvwe Kilishitu kechi wasangwilwe ku bafwa ne, lwitabilo lwa bena Kilishitu lwakonsha kwikala lwatu, lwabula nkito, lwa bubela. Paulo ne bakwabo inge kechi baambiletu bubela pa lusanguko lwa kwa Yesu ne, bino inge babepele ne pa wamusangwile, aye Yehoba Lesa. Ne kyakilamo, lufunjisho lwa kuba’mba Kilishitu “witufwijile na mambo a bundengamambo bwetu” nabo inge lwa bubela, mambo inge kya kuba Mupulushi mwine kechi wasangukile ku bafwa ne, kechi wakonsha kupulusha bakwabo ne. (1 Kolinda 15:3) Kino kyakonsha kulumbulula kuba’mba bena Kilishitu bo baipayile na mambo a lwitabilo lwabo, bafwile na luketekelo lwa bubela lwa kuba’mba bakasangulwa.