Mepuzho Kufuma Kubatanga

Mu nkalata yanji yo anembejile Bahebelu, mutumwa Paulo waambilepo pa “kya kutulapo maboko.” Nanchi watazhizhenga pa kutongola bakulumpe mu kipwilo nyi, inyi bintu byapusanako?—Hebe. 6:2.

Kafwako kishinka kyakonsha kwitulengela kwikala balupata ne, bino Paulo wafwainwa watazhizhenga pa kutula maboko kimye kya kupana bya bupe bya mupashi.

Baibolo waambapo pa kutula maboko pa muntu pa kuba’mba atendeke kwingijila Yehoba. Mosesa “wamutentekele maboko anji” Yoshua pa kumutongola amba ekale ke nswanamumi wanji. (Mpitu. 34:9) Mu kipwilo kya bena Kilishitu, banabalume bafikapo bebatongolanga kupichila mu kwibatenteka maboko. (Byu. 6:6; 1 Timo. 4:14) Paulo wajimunañene pa kutenteka maboko pa mwanamulume bukiji bukiji.—1 Timo. 5:22.

Nangwa byonkabyo, Paulo wajimwine bena Kilishitu Bahebelu ‘kuyanga kulutwe kufika ne ku bukulumpe’ byo kiji kuba’mba bashile “mambo a bintu bitanshi.” Wabwelele watongola “lulapilo lwa ku mingilo ifu; lwitabilo lwa kwi Lesa; lufunjisho lwa mabatizhilo; nekutulapo maboko.” (Hebe. 6:1, 2) Nanchi kutongolwa kwa bakulumpe mu kipwilo kyo kintu kitanshi kyakonsha kulengela bena Kilishitu kuilako palutwe nyi? Ine. Kwikala mukulumpe mu kipwilo ke mwingilo balongo bonse bafikapo ye bafwainwa kukanamina kabiji ne kumutemwa umvwe bafikapo. Onkao mambo kino kechi kyo kintu kitanshi ne.—1 Timo. 3:1.

Bino kuji ne mbaji ikwabo mo bengijisha kutentekwa kwa maboko. Mu myaka kitota kitanshi, Yehoba wakaine bena Isalela ba kisemwa ne kutemwako bena Isalela ba ku mupashi, abo baikala ke kipwilo kya bena Kilishitu bashingwa. (Mat. 21:43; Byu. 15:14; Nga. 6:16) Bya bupe bya kukumya bya mupashi, nabiji kwamba mu njimi, byapaine kayukilo ka lolwa lupimpu. (1 Ko. 12:4-11) Koneleusa ne kisemi kyanji byo baitabijile, batambwijile mupashi wazhila kwesakana na byo kyamweshiwe byo bebomvwine kasa “bamba mu njimi ingi.”—Byu. 10:44-46.

Kimye kimo, bya bupe bya kukumya byapanwanga kupichila mu kutentekwa kwa maboko. Filipa byo asapwijile mambo awama mu Samaliya, bavula babatizwe. Jibumba jitangijila jatumineko mutumwa Petelo ne Yoano. Mambo ka? Tutanga kuba’mba: “Ponkapo [bano babiji] bebabikile maboko [bantu babatizwe katataka] ne kutambula batambwile Mupashi Wazhila.” Kino kyafwainwa kyalumbulwile kuba’mba batambwile bupe bwa mupashi wazhila, busendwe bwakonsheshe kumona bantu bonse. Twayuka kino mambo Shimona awo patanshi waubanga bingelekezha, wamwene bingila mupashi kabiji wakebeshe bingi kupota buno bulume pa kuba’mba akatentekenga maboko pa bantu ne kupana mupashi wazhila kuba’mba obenga bintu mu jishinda ja kukumya. (Byu. 8:5-20) Palutwe kacheche, bantu 12 babatizwe ku Efisesa. Tutanga amba: “Aye Paulo byo ebabikile maboko, Mupashi Wazhila waishile pe abo; ke bambe na njimi ingi ne kwaula na Mupashi.”—Byu. 19:1-7; esakanyaiko 2 Timoti 1:6.

Onkao mambo nanchi pa Bahebelu 6:2, Paulo watazhizhenga pa kutentekwa kwa maboko pa kupana bya bupe bya mupashi ku bantu baitabijile katataka.