Bantu bavula balangulukatu byonka bilanguluka ba Christopher, ba Hannah ne ba Gina. Bavula mwaya ntanda bashiinwa kuba’mba Lesa mulunda nabo. Nga anweba kiji byepi? Nanchi mulanguluka amba mwafwenya kwipi ne Lesa nyi? Nanchi mwakonsha kutemwa kufwenya kwipi ne Lesa nyi? Kampe mulanguluka kuba’mba: ‘Nanchi kyakonsheka muntu kwikala na bulunda bwawama na Lesa wa Bulume Bonse nyi? Kabiji mu ñanyi jishinda?’

MWAKONSHA KUFWENYA KWIPI NE LESA

Baibolo waamba’mba twakonsha kwikala na bulunda bwawama na Lesa. Waamba’mba Lesa watelele mushakulu Muhebelu aye Abalahama amba “mulunda nami.” (Isaya 41:8) Kabiji monai ne byambo biji pa Yakoba 4:8: “Fwenyai kwipi ne Lesa, ne aye ukafwenya kwipi ne anweba.” Kino kimwesha kuba’mba Lesa wakonsha kwikala mulunda nenu. Pano byo kiji kuba’mba Lesa kechi umweka ne, mwakonsha ‘kufwenya kwipi’ byepi kwi aye ne kwikala na bulunda bwawama nanji?

Pa kuba’mba tukumbule buno bwipuzho, twayai tulanguluke pa bitendeka bulunda bwa bantu. Patanshi, bantu babiji bafwainwa kwiyuka mazhina. Inge batwajijila kwisamba kimye kyonse bulunda bwabo bukoselako. Kabiji inge kebekwashe mu bintu, bulunda bwabo bukoselako. Byobyo kyafwainwa ne kwikala pa kwikala na bulunda bwawama ne Lesa. Twayai twisambe byo kyafwainwa kubiwa kino.

Nanchi mujipo na mulunda nenu ye mwaluba kuyuka jizhina nyi? Kino kechi kyakonsheka ne. Byonkatu byaambile mwanamukazhi wa ku Bulgaria amba, “Kechi kyakonsheka kufwenya kwipi ne Lesa inge kechi mwayuka jizhina janji ne.” Bino byonka byo kyaambiwa mu kibaaba kyafumako, Lesa ukeba’mba mufwenye kwipi ne aye. Onkao mambo, kupichila mu Baibolo ubena kwimubuula amba: “Amiwa yami Yehoba. Jino jo jizhina jami.”—Isaya 42:8.

Nanchi Yehoba ukeba amba muyuke ne kwingijisha jizhina janji nyi? Akilangulukai pa kino: Jizhina ja Lesa janembelwe na bisopelo bina bitelwa amba Tetragrammaton, jitanwamo pepi bimye 7,000 mu Binembelo bya Kihebelu bitanshi. Jo jizhina jitanwamo bimye byavula kukila mazhina onse. Kino kimwesha kuba’mba Yehoba ukeba kumuyuka ne kwingijisha jizhina janji.a

Bamo bakonsha kulanguluka kuba’mba Lesa wazhila kabiji wa bulume bonse, onkao mambo ke kubula mushingi kwingijisha jizhina janji. Kyakine kechi mwakonsha kwingijisha jizhina ja Lesa pabula kufwainwa ne, byonkatu byo mwakonsha kubula kwingijisha jizhina ja mulunda nenu pabula kufwainwa. Bino nangwa byonkabyo, Yehoba ukeba kuba’mba aba bamutemwa banemeke ne kuyukanyikisha jizhina janji. (Salamo 69:30, 31; 96:2, 8) Vulukai kuba’mba Yesu wafunjishe baana banji ba bwanga kulomba amba: “Tata wetu wa mwiulu, jizhina jenu jizhile.” Ne atweba twakonsha kuzhijika jizhina ja Lesa pa kwijiyukanyikisha. Kino kitulengela kufwenya kwipi ne aye.—Mateo 6:9.

Baibolo waamba’mba Lesa wata muchima ku ‘boba balanguluka [nangwa, “kunemeka”] pa jizhina janji.’ (Malakai 3:16; tubyambo twa panshi) Yehoba walaya bano bantu amba: “Nkamuzhikijila mambo wayuka jizhina jami. Aye ukangita, ne amiwa nkamwitaba. Nkekala nanji mu kimye kya bya malwa.” (Salamo 91:14, 15) Kyanema bingi kuyuka ne kwingijisha jizhina ja Yehoba umvwe tukeba kwikala na bulunda bwawama ne Aye.

Balunda besamba javula kwingijisha foni, intaneti, vidyo nangwa nkalata. Onkao mambo, pa kuba’mba tukoseshe bulunda na Lesa twafwainwa kwisambanga nanji kimye kyonse. Twakonsha kuba byepi bino?

Twakonsha kwisamba ne Yehoba kupichila mu lulombelo. Kulomba kwi Lesa kwapusana na byo twakonsha kwisambatu na mukwetu. Twafwainwa kuyuka kuba’mba inge tubena kulomba, tubena kwisamba na Mulenga wetu, Mwine Wakila. Kino kyafwainwa kwitulengela kulombanga na mushingi. Pa kuba’mba milombelo yetu yumvwanyikenga kwi Lesa, twafwainwa kulondela bino bintu bisatu bikebewa.

Kitanshi, twafwainwa kulombangatu kwi Yehoba Lesa bunke—kechi kwi Yesu, ku bafu nangwa ku nkishi ne. (Kulupuka 20:4, 5) Baibolo waamba’mba: “Bino mu bintu byonse mu lulombelo ne milombelo ya misashijilo pamo na kusanta, saka musolola kwi Lesa.” (Filipai 4:6) Kya bubiji, twafwainwa kulomba kwingijisha jizhina ja Mwana wa Lesa, aye Yesu Kilishitu. Yesu waambile’mba: “Kafwako wiya kwi Batata ne, poso wapichila mwi amiwa.” (Yoano 14:6) Kya busatu, twafwainwa kulomba kwesakana na mwayila kyaswa muchima wa Lesa. Baibolo waamba’mba: “Kintu kyonse kyo twakonsha kumulomba mwayila kyaswa muchima wanji, aye witumvwa.”a—1 Yoano 5:14.

Bulunda kechi bwakonsha kutwajijila inge kya kuba muntu umo ye ubena kwambatu ne. Byonkatu balunda byo besamba, ne atweba twafwainwa kuswisha Lesa kwisamba ne atweba ne kuteleka ku byo abena kwamba. Nanchi mwayuka Lesa byo amba kwi atweba nyi?

Lelo jino, Yehoba Lesa “wamba” ne atweba kupichila mu Mambo anji Baibolo. (2 Timoti 3:16, 17) Mambo ka o twaambila bino? Twayai twambe bibye: Fwanyikizha kuba’mba mwatambwila nkalata kufuma ku mulunda nenu. Panyuma ya kwiitanga, mwakonsha kwambila bakwenu na lusekelo amba, “Naumvwa bingi bulongo pa kwisamba na mulunda nami!” Nangwa byonkabyo, bano balunda kechi babesambenga saka bemona ne, bino bakwisambanga kupichila mu nkalata. Popamotu, umvwe ke mutange Baibolo mwakonsha kuswisha Yehoba kwamba ne anweba. Gina watongolwa mu kibaaba kitanshi waamba’mba, “Inge kya kuba nkeba Lesa kuba’mba ekale mulunda nami, nafwainwa kutanganga ‘nkalata’ yanji ko kuba’mba Baibolo.” Wanungapo amba, “Kutanga Baibolo kimye kyonse kwandengela kufwenya kwipi ne Lesa.” Nanchi muswisha Yehoba kwamba kwi anweba kupichila mu kutanga Mambo anji, Baibolo moba onse nyi? Inge ke mube bino, mukafwenya kwipi ne Lesa.

“Umvwe kuji bintu byo mubena kukeba, mumbulengatu, nkemubilanga.” Kechi mwakonsha kwambila muntu ye mwabuula kuyuka nangwa wabula mulunda nenu bino byambo ne. Pano bino, kechi mwakonsha kukankazhama kwambila mulunda nenu bino byambo ne. Balunda beubila bintu bibena kukeba mukwabo.

Baibolo umwesha kuba’mba Yehoba ubila bapopweshi banji bintu byawama. Kya kumwenako, Mfumu Davida wajinga na bulunda bwawama na Lesa waambile’mba: “Byo byavulapo bintu byo mwauba, Anweba Yehoba Lesa wami, mingilo yenu ya kukumya ne bintu byo mwitulangulukila. . . . Byavujisha kabiji byakukankalwa kubala!” (Salamo 40:5) Yehoba ubila bintu byawama ne bantu babula kumuyuka ‘kupichila mu kwibapa mvula ne kimye kipilamo kajo saka ebapa kajo kavula ne kulengela michima yabo kusangalala.’—Byubilo 14:17.

Byo kiji kuba’mba Yehoba usekela kubila bantu byawama, ko kuba’mba aba bakeba kwikala balunda nanji bafwainwa kubanga bintu ‘bisangajika muchima wanji.’ (Byambo bya Maana 27:11) Pano ñanyi bintu byo mwafwainwa kuba pa kuba’mba mutokeshe Lesa ku muchima? Baibolo wakumbula’mba: “Kabiji kange muvulamenga kuba byawama ne kupapo bakwenu bintu byenu ne, mambo bitapisho bya uno mutundu bitokesha Lesa ku muchima.” (Bahebelu 13:16) Nanchi kino kyalumbulula amba kubila bakwenu byawama ne kupapo bakwenu bintu byo bakeba byo bikebewa pa kutokesha Yehoba ku muchima nyi?

Baibolo waamba’mba, “kwa kubula lwitabilo kechi kyakonsheka kutokesha Lesa ku muchima ne.” (Bahebelu 11:6) ‘Abalahama byo aitabijile mwi Yehoba, kepo atelelwe’mba mulunda ne Yehoba.’ (Yakoba 2:23) Yesu Kilishitu naye waambilepo pa byo kyanemena ‘kwitabila mwi Lesa’ pa kuba’mba etupeshe. (Yoano 14:1) Pano mwakonsha kwikala byepi na lwitabilo mwi Lesa pa kuba’mba mufwenye kwipi ne aye? Mwakonsha kutendekelapo kufunda Mambo a Lesa, Baibolo kimye kyonse. Kuba bino kukemulengela ‘kuyukisha bulongo kyaswa muchima wanji’ ne “kumutokeshesha ku muchima.” Inge mwatwajijila mu kuyukisha Yehoba ne kulondela byo mufunda byaamba pa bololoke bwanji, lwitabilo lwenu mwi aye lukakoselako kabiji ukafwenya kwipi ne anweba.—Kolose 1:9, 10.

Mwakonsha kuba byepi pa kuba’mba mufwenye kwipi ne Lesa? Twisamba pa bintu byavula bingi byo mwafwainwa kuba pa kuba’mba mwikale balunda na Lesa. Bintu byo twisambapo ke bino:

1. Yukai jizhina ja Lesa ja Yehoba ne kwijingijishanga.

2. Isambainga nanji kimye kyonse kupichila mu lulombelo ne kufunda Mambo anji, Baibolo.

3. Twajijilai kuba bitokesha Yehoba ku muchima.

Kwesakana na bino bishinka bisatu, nanchi mwakonsha kwamba’mba mubena kuba bimukebela Lesa pa kuba’mba mufwenye kwipi ne aye nyi? Nanchi kujipo mumo mo mwafwainwa kupimpulako nyi? Ibyo kuba’mba mwafwainwa kwibikako pa kuba’mba mube bino, pano bino monai bikafumamo.

Ba Jennifer ba ku United States baambile’mba: “Inge twibikako pa kuba’mba twikale na bulunda bwawama na Lesa mufuma byawama. Mu buno bulunda mufuma bintu byawama bingi: kuketekela mwi Lesa, kumuyuka bulongo byo aji, ne kyakilapo ke kumutemwa. Kufwenya kwipi ne Lesa kyo kintu kyawama!”

Umvwe mukeba kwikala na bulunda bwawama na Lesa, Bakamonyi ba kwa Yehoba bakatemwa kwimukwasha. Bakonsha kwiyanga na kwimufunjisha Baibolo kyatutu. Kabiji mwaitwa kwiya na kupwila nabo pa Nzubo ya Bufumu, po mukapwanañana na bantu baji na bulunda bwawama na Lesa.a Inge ke mube bino, mukamba byonka byaambile nyimbi wa masalamo amba: “Pakuba amiwa, kyangwamina kufwenya kwipi ne Lesa.”—Salamo 73:28.