Nanchi Kusemwa Jibiji jo Jishinda ja Lupulukilo nyi?

MWAKONSHA kukumbula’mba ka umvwe bemwipuzha’mba, “Nanchi mwasemwa jibiji nyi?” Bantu bavula baya mu bipwilo bya bwina Kilishitu mwaya ntanda bakonsha kukumbula na jiwi jakosa amba, “Ee!” Baitabila kuba’mba kusemwa jibiji ke kayukilo ka bena Kilishitu bonse bakine kabiji amba jo jonkatu jishinda ja lupulukilo. Balondela byambo byaambile ntangi umo wa bupopweshi, aye Robert C. Sproul. Wanembele’mba: “Umvwe muntu ne kusemwa jibiji ne, . . . ko kuba’mba kechi mwina Kilishitu ne.”

Nanchi ne anweba mwaitabila kuba’mba kusemwa jibiji kwimutangijila mu jishinda ja lupulukilo nyi? Umvwe byo ibyo, kwa kubula nangwa kuzhinaukatu ne, mukeba kukwasha balongo benu ne bakwenu kutana jino jishinda kabiji ne kutendeka kwendamo. Nangwa byonkabyo, pa kuba’mba bobe bino bafwainwa kumvwisha lupusano luji pakachi ka muntu wasemwa jibiji ne yewa wabula kusemwa jibiji. Pano, mwakonsha kwibalumbulwila byepi mwatala kusemwa jibiji?

Bavula balanguluka’mba “kusemwa jibiji” kulumbulula muntu wipana kya kine kwingijila Lesa ne Kilishitu, ko kuba’mba wasankilapo byubilo byanji bya buntunshi ne kwitabilwa kwi Lesa. Kipongo kya byambo (Dikishonale) kya katataka kilumbulula muntu wasemwa jibiji kwikala “mwina Kilishitu wapimpula bwikalo bwanji nangwa wayukanyikwa amba uji na lwitabilo lwakosa, kikatakata panyuma ya kupita mu lweseko lukatampe na mambo a byo aitabilamo.”—Merriam-Webster’s Collegiate Dictionary—Eleventh Edition.

Nanchi mwakonsha kukumya kufunda’mba ino ndumbulwilo yapusanako na byaamba Baibolo nyi? Nanchi mukeba kuyuka bifunjisha Mambo a Lesa pa mambo a kusemwa jibiji nyi? Musakufunda byavula bingi mu kubalaula uno mutwe. Mambo ka? Ke na mambo a kuba’mba kumvwisha bulongo mwatala kusemwa jibiji kwanema bingi mu bwikalo bwenu ne mu bintu byo mubena kupembelela kulutwe.

Nanchi Baibolo Ufunjisha’mba Ka?

Kyambo kya “kusemwa jibiji” mwakonsha kwikitana mu Baibolo pa Yoano 3:1-12 kwapwa. Pano po paji mwisambo wa kwa Yesu na ntangi wa bupopweshi mu Yelusalema. Jino jishimikila ja mu Baibolo jiji mu kakitenguluzha. Mwane twimutundaika kwijitanga bulongo.

Mu jishimikila, Yesu waamba pa mbaji yavula ya “kusemwa jibiji.”a Uno mwisambo wa kwa Yesu witukwasha kukumbula ano mepuzho anema atanu:

◼ Kusemwa jibiji kwanemena ka?

◼ Nanchi atweba bene, yetu twafwainwa kwifuukwila bya kusemwa jibiji nyi?

◼ Kuji na nkebelo ka?

◼ Kusemwa jibiji kubiwa byepi?

◼ Kusemwa jibiji kulengela muntu kwikala byepi na Lesa?

Twayai twisambe pa ano mepuzho.

[Tubyambo twa mushi]

[Kitenguluzha/Kipikichala pa peja 4]

‘Anweba Mwafwainwa Kusemwa Jibiji’

“Kabiji kwajinga muntu Mufaliseo, jizhina janji Nikodema, mukulumpe wa Bayudea. Uno waishile kwi Yesu bufuku, ne kumwambila’mba, Labi, twayuka anweba byo muji mufunjishi wafuma kwi Lesa; ke pakuba ka paji ukonsha kuba bino biyukilo byo muba anweba ne, poso Lesa uji nanji. Kumvwa Yesu amba, Kine, kine, nemwambila namba, inge muntu ne kusemwa jibiji ne, kechi akonshe kumona bufumu bwa Lesa ne. Nikodema wamwambile’mba, Nanchi muntu akonshe kusemwa byepi byo aji mukote? Akonshe kutwela munda mwa inanji jibiji, ne kusemwa nyi? Yesu wamukumbwile’mba, ‘Kine, kine, nemwambila namba, inge muntu ne kusemwa ku mema ne ku mupashi ne, kechi akonshe kutwela mu bufumu bwa Lesa ne. Akya kyasemwa ku buntunshi bo buntunshi, ne akya kyasemwa ku mupashi ye mupashi. Kange mukumye ne byo nemwambila namba, Anweba mwafwainwa kusemwa jibiji. Lubesha lupupila ko lusaka, obewa umvwa ne jiwi jalo, kabiji kechi wayuka ko lufuma ne ko luya ne; byo biji ne bonse basemwa ku mupashi. Kumvwa Nikodema wamwambile’mba, Lelo, bino bikonsheke byepi? Kumvwa Yesu amba, Anweba mwi mufunjishi wa bena Isalela, ne kwibiyuka mo byayila bino nenyi? Kine, kine, nemwambila namba, byo twayuka byo byonka byo twamba, ne byo twamona byo byonka byo tushimuna; ne anweba bonse ne kwitabila kushimuna kwetu ne. Lelo umvwe byo nemubula bya pano panshi anweba bonse ne kwitabila ne, muketabila byepi umvwe nemubula bya mwiulu?”—Yoano 3:1-12.

Kusemwa Jibiji Kwanemena ka?

YESU byo esambilenga ne Nikodema waambilepo bingi pa buneme bwa kusemwa jibiji. Walumbulwile byepi kino?

Akimonai Yesu byo alumbulwijile Nikodema buneme bwa kusemwa jibiji. Waambile’mba: ‘Inge muntu ne kusemwa jibiji ne, kechi akonshe kumona bufumu bwa Lesa ne.’ (Yoano 3:3) Byambo bya kuba’mba “inge ne” ne “kechi akonshe” bimwesha buneme bwa kusemwa jibiji. Kya kumwenako: Umvwe muntu waamba’mba, “pa kuba’mba kwikale kyeya poso juba jasama,” uno muntu ubena kulumbulula’mba juba jo jileta kyeya. Mu jishinda jimotu, ne Yesu waambilenga’mba kusemwa jibiji kwanema mambo ko kukalengela muntu kumona Bufumu bwa Lesa.

Pa kuba’mba akwashe bantu kubula kuzhinauka uno mutwe, Yesu waambile’mba: “Anweba mwafwainwa kusemwa jibiji.” (Yoano 3:7) Monka mwaambijile Yesu, kusemwa jibiji kyo kine kintu kikalengela muntu “kutwela” mu Bufumu.—Yoano 3:5.

Yesu byo aambilepo kuba’mba kusemwa jibiji kwanema bingi, bena Kilishitu bafwainwa kumvwisha bulongo mwatala uno mutwe. Kya kumwenako, nanchi mulanguluka’mba mwina Kilishitu wakonsha kwifuukwila mwine kusemwa jibiji nyi?

[Mabulañano pa peja 5]

“Pa kuba’mba kwikale kyeya poso juba jasama”

Kusemwa Jibiji? Nanchi Muntu ye Wifuukwila Mwine Nyi?

ÑANYI ulengela muntu kusemwa jibiji? Basapwishi bamo batundaika banteleki babo kwikala bena Kilishitu basemwa jibiji, bengijisha byambo bya kwa Yesu bya kuba’mba: “Anweba mwafwainwa kusemwa jibiji.” (Yoano 3:7) Bano basapwishi bengijisha bino byambo kukambizha bantu kuba’mba, “Semwai jibiji!” Byo bekimwena mu jino jishinda ko kuba’mba basapwila’mba mwine muntu waitabila ye wifuukwila kukokela Yesu ne kulondela mwapita kusemwa jibiji. Mu ñambilo ikwabo bamba kuba’mba muntu mwine wakonsha kufuukulapo kusemwa jibiji. Nanchi Yesu mo mo atazhizhe byo aambijile Nikodema kusemwa jibiji nyi?

Umvwe twapesapesa bulongo byambo byaambile Yesu, kechi bimweshapo’mba Yesu wafunjishenga’mba muntu mwine wafwainwa kwifuukwilapo kusemwa jibiji ne. Twaambila ka bino? Kyambo kya Kingiliki kyatuntululwa’mba “kusemwa jibiji” kyakonsha ne kutuntululwa’mba “kusemwa kufuma mwiulu.”a Onkao mambo, kwesakana na mwayila ino ntuntulwilo, kusemwa jibiji ‘kufuma mwiulu’ nangwa’mba “kufuma kwi Tata.” (Yoano 19:11; Yakoba 1:17) Ee, Lesa ye ulengela bantu kusemwa jibiji.—1 Yoano 3:9.

Umvwe twavuluka kuba’mba ñambilo ya kuba’mba “kufuma mwiulu,” ilumbulula kusemwa kufuma mwiulu, kyakonsha kwitupelela kumvwisha ene mambo kusemwa jibiji kyo kwabujila kwikela kwifuukwila kwa mwine muntu. Akilangulukaipotu pa byo tusemwa kufuma munda ya bainetu. Nanchi mwifuukwijile anwe bene kuba’mba musemwe nyi? Ine! Bashenu bo balengejile kuba’mba musemwe. Mu jishindatu jimo, Lesa, Shetu wa mwiulu ye wakonsha kwitulengela kuba’mba tusemwe jibiji. (Yoano 1:13) O ene mambo mutumwa Petelo o aambijile’mba: “Atotwe Lesa Shanja Nkambo yetu Yesu Kilishitu, ye witusemene jibiji monka mu lusa lwanji lukatampe.”—1 Petelo 1:3.

Nanchi Kusemwa Jibiji Mukambizho nyi?

Bamo balanguluka’mba, ‘Umvwe kya kine kuba’mba kafwako wakonsha kwifuukwila mwine kusemwa jibiji ne, pano nga mambo ka Yesu o akambizhizhe’mba: “Anweba mwafwainwa kusemwa jibiji”?’ Buno ke bwipuzho bwawama bingi. Umvwe byambo bya kwa Yesu byajinga mukambizho, ko kuba’mba witukambizhenga kuba kintu kyo twakonsha kukankalwa kuba mu bulume bwetu. Kino kechi byo byo kiji ne. Pano, nga byambo bya kuba’mba mwafwainwa kusemwa jibiji’ byatala mu ka?

Kino kipelu kwikipesapesa bulongo mu mulaka mutanshi mo kyanembelwa kimwesha’mba kechi mukambizho ne. Bino ke kishinkatu. Ko kuba’mba Yesu byo aambile’mba ‘mwafwainwa kusemwa jibiji,’ wabulañenenga kishinka, kechi mukambizho ne. Kwesakana na Baibolo wa Modern Young’s Literal Translation waamba’mba: “Kimuwamina anweba kusemwa jibiji kufuma mwiulu.”—Yoano 3:7.

Pa kuba’mba tumvwishe kana uno wajinga mukambizho nangwa ne, akimonai kino kya kumwenako. Fwanyikizhai muzhi mukatampe muji masukulu avula. Sukulu umo bamushimika amba pafundengatu banyike bena kyalo babula bangikazhi ba mu ye uno muzhi. Juba jimo, kalombwana umo wabula mwina kyalo waambila mukulumpe wa sukulu amba, “Mbena kukeba kutendeka kufunda pa sukulu wenu.” Uno mukulumpe wamubula’mba, “Pa kuba’mba ufundenga pano, wafwainwa kwikala mwina kyalo.” Bino byambo bya mukulumpe wa sukulu kechi mukambizho ne. Kechi ubena kukambizha mwanyike amba, “Ikala mwina kyalo ne!” Aye ubena kumubula byo kiji amba, “Pa kufunda pano, wafwainwa kwikala mwina kyalo.” Uno mukulumpe ubena kumubula kishinka, kuba’mba pa uno sukulu bakebatu bena kyalo. Kyo kimotu, ne Yesu kimye kyo aambile’mba “Anweba mwafwainwa kusemwa jibiji,” wabulañenenga muzhilo waamba pa mambo a ‘kutwela mu Bufumu bwa Lesa.’

Kipelu kyapelako kya kuba’mba Bufumu bwa Lesa, kyakwatankana bingi na lubaji lukwabo lwanema lwa kusemwa jibiji. Bwipuzho ke bwa kuba’mba, kusemwa jibiji kuji na nkebelo ka? Kuyuka mukumbu wa buno bwipuzho kukemukwasha kumvwisha bulongo kusemwa jibiji byo kulumbulula.

[Tubyambo twa mushi]

[Kipikichala pa peja 6]

Kusemwa jibiji kwipasha byepi na kusemwa kwa kufuma munda mwa bainetu?

Kusemwa Jibiji Kuji na Nkebelo ka?

BAVULA baitabila’mba muntu wafwainwa kusemwa jibiji pa kuba’mba akatambule bumi bwa myaka. Akyumvwai byaambile Yesu pa ene mambo kusemwa jibiji o kwanemena. Waambile’mba: “Inge muntu ne kusemwa jibiji ne, kechi akonshe kumona bufumu bwa Lesa ne.” (Yoano 3:3) Ibyo kuba’mba, muntu wafwainwa kusemwa jibiji pa kuba’mba akatwele mu Bufumu bwa Lesa, pano bino kechi amba akamone lupulukilo ne. ‘Bino’ bamo bakonsha kwamba’mba, ‘nanchi bino byambo bibiji, kutwela mu Bufumu ne kupuluka kechi byonse bibena kulumbulula mfweto imotu nenyi?’ Kechi ibyo ne. Pa kuba’mba tumvwishe lupusano lujipo, patanshi twayai tukimone kyambo kya “bufumu bwa Lesa” byo kilumbulula.

Bufumu ke kafulumende. Onkao mambo, kyambo kya kuba’mba “bufumu bwa Lesa” kilumbulula “kafulumende wa Lesa.” Baibolo ufunjisha’mba “mwana muntu,” aye Yesu Kilishitu ye Mfumu wa Bufumu bwa Lesa, kabiji Kilishitu uji ne na bo akalamanga nabo. (Danyela 7:1, 13, 14; Mateo 26:63, 64) Kunungapo, kimwesho kyo amwene mutumwa Yoano kyamwesheshe’mba bakalama ne Kilishitu, ke bantu basalwa kufuma mu “bisaka byonse, ne mu njimi yonse, ne mu mitundu yonse, ne mu mikoka yonse” kabiji bakekala ke ‘bamfumu bakalama panopantanda.’ (Lumwekesho 5:9, 10; 20:6) Mambo a Lesa aamba’mba aba bakekala bamfumu balenga “kajitanga kacheche” ka ba 144, 000 “bakujilwe panopantanda.”—Luka 12:32; Lumwekesho 14:1, 3.

Nanchi Bufumu bwa Lesa bukalaminanga kwepi? “Bufumu bwa Lesa” butelwa ne kuba’mba “bufumu bwa mwiulu,” kino kibena kumwesha’mba Yesu ne bakwabo bamfumu bakalaminanga mwiulu. (Luka 8:10; Mateo 13:11) Onkao mambo, Bufumu bwa Lesa ke kafulumende wa mwiulu muji Yesu Kilishitu ne jibumba ja bantu bo akalamanga nabo basalwa kufuma mu mitundu ya bantu.

Pano, nanchi Yesu watazhizhe mu ka byo aambile’mba muntu wafwainwa kusemwa jibiji pa kuba’mba “akatwele mu Bufumu bwa Lesa”? Watazhizhe mu kuba’mba muntu wafwainwa kusemwa jibiji pa kuba’mba akekale pamo ne Kilishitu mwiulu. Onkao mambo, nkebelo ya kusemwa jibiji ke ya kunengezha jibumba jicheche ja bantu bakalamanga mu bufumu bwa mwiulu.

Pa byonse byo twisambapo, twamona’mba kusemwa jibiji kwanema bingi, mambo kufuma kwi Lesa kabiji kubena kunengezha jibumba jicheche ja bantu bakalama mu bufumu bwa mwiulu. Pano, nga kusemwa jibiji kubiwa byepi?

[Mabulañano pa peja 7]

Nkebelo ya kusemwa jibiji ke ya kunengezha jibumba jicheche ja bantu bakalama mu bufumu bwa mwiulu

[Kipikichala pa peja 7]

Yesu Kilishitu ne jibumba ja bo akalamanga nabo basalululwa kufuma mu bantu, jo jalenga Bufumu bwa Lesa

Kusemwa Jibiji Kubiwa Byepi?

YESU kechi waambiletu ne Nikodema pa buneme ne nkebelo ya kusemwa jibiji ne, wamubujile ne muntu byo asemwa jibiji. Yesu waambile’mba: “Nemwambila namba, inge muntu ne kusemwa ku mema ne ku Mupashi ne, kechi akonshe kutwela mu bufumu bwa Lesa ne.” (Yoano 3:5) Ko kuba’mba muntu usemwa jibiji na mema ne na mupashi. Pano bino, byambo bya kuba’mba “mema ne mupashi” byatala mu ka?

Nanchi Onkae “Mema ne Mupashi” Nyi?

Nikodema byo ajinga shayuka mu bya bupopweshi bwa Bayudea wayukile Binembelo bya Kihebelu byo bilumbulula pa kwingijisha kyambo kya kuba’mba “mupashi wa Lesa,” amba ke bulume bwa Lesa bulengela bantu kuba bya kukumya. (Ntendekelo 41:38; Kulupuka 31:3; 1 Samwela 10:6) Yesu byo aambile pa “mupashi,” wafwainwa Nikodema wayukile’mba mupashi wazhila ke bulume bwa Lesa.

Yesu watazhizhe mwepi byo aambile pa mema? Mupashi byo babula ku mufwanyikizhapo ku kintu, ko kuba’mba ne mema nao kechi akifwanyikizho ne. Akilangulukai pa bintu byanembwa byamwekele Nikodema saka akyangye kuya na kwisamba na Yesu ne panyuma ya mwisambo. Bino byanembwa bimwesha kuba’mba Yoano Mubatishi ne baana ba bwanga ba kwa Yesu babatizhanga bantu mu mema. (Yoano 1:19, 31; 3:22; 4:1-3) Kafwako walubile kino mu Yelusalema ne. Onkao mambo, Yesu byo aambile pa mema, Nikodema wafwainwa wayukile kuba’mba lubatizhilo lwa mu mema lo lubena kwambapo Yesu kechi pa mema onka kwapwa ne.a

Kubatizwa “mu Mupashi Wazhila”

Umvwe “kusemwa ku mema” kujitu pamo na kubatizwa mu mema, nga ‘kusemwa ku mupashi’ kulumbulula ka? Nikodema saka akyangye kuya na kwisamba ne Yesu, Yoano Mubatishi wataile mbila ya kuba’mba kubatizwa mu mema kechi ko konka ne, kuji ne kwa mu mupashi. Waambile’mba: “Amiwa nemubatiza mu mema; pakuba aye ukemubatiza mu mupashi wazhila.” (Mako 1:7, 8) Mambo awama anembele Mako amwesha kimye kitanshi kya luno lubatizhilo. Wanembele’mba: “Kabiji ponkapo mu oa moba, Yesu wafumine mu Nazala, muzhi wa mu Ngalilea, ne kubatiza bamubatizhile kwi Yoano mu Yodano. Kabiji ponkapotu pa kutuntuka mu mema, wamwene jiulu kasa jaabana, ne mupashi pamo ne nkunda kasa amwikijila.” (Mako 1:9, 10) Kimye Yesu kyo bamwibizhe mu Yodano, bamubatizhe mu mema. Kimye kyo atambwijile mupashi kufuma mwiulu po po abatizhilwe mu mupashi wazhila.

Panyuma ya myaka isatu kufuma po abatizwe, Yesu wabujile baana banji ba bwanga kuba’mba: “Anweba mukabatizwa mu mupashi wazhila, bino kechi kwashala moba avula ne.” (Byubilo 1:5) Kino kyamwekele ñanyi kimye?

Pa juba ja Pentekosta mwaka wa 33 C.E., baana ba bwanga ba kwa Yesu 120 bapwijile mu nzubo mu Yelusalema. “Ponkapo mwafumine kilulumo mwiulu nobe luvula mukatampe upupa, kyayuzhizhe nzubo yonse mo baikajile. Ponkapo kwibamwekejile njimi kasa yaabana, nobe mujilo . . . , ne abo bonse bayujile na mupashi wazhila.” (Byubilo 2:1-4) Kabiji pa jonkaja juba ne bakwabo bajinga mu Yelusalema bebakambizhe kubatizwa mu mema. Mutumwa Petelo wibambijile’mba: “Lapilai, ne kubatizwa bonse mu jizhina ja Yesu Kilishitu mu lulekelo lwa mambo enu; kabiji mukatambula wa bupetu mupashi wazhila.” Bantu baubilepo ka pa byo baumvwine? “Abo batambwile mambo anji babatizhilwe: kabiji mu jonkaja juba babikilweko kwi abo kampe biumbi bisatu.”—Byubilo 2:38, 41.

Lubatizhilo Lubiji

Nanchi kuno kubatizwa kubiji kubena kulumbulula byepi kusemwa jibiji? Kubena kumwesha’mba muntu usemwa jibiji umvwe wabatizwa mu mema ne mu mupashi. Yesu wakibatizwe mu mema patanshi. Kepo atambwijile mupashi wazhila. Mu jishinda jimotu, ne baana ba bwanga batanshi bakibatizwe mu mema (bamo bebabatizhe kwi Yoano Mubatishi), kabiji kepo batambwijile mupashi wazhila. (Yoano 1:35, 36) Baana ba bwanga 3,000 babatizwe mu mema kabiji kepo nabo batambwijile mupashi wazhila.

Umvwe mwalanguluka pa lubatizhilo lwajingako pa Pentekosta mu 33 C.E., mwalanguluka amba kusemwa jibiji kumweka byepi lelo jino? Byonka byo kyamwekele ne ku batumwa ba kwa Yesu ne ku baana ba bwanga batanshi. Patanshi, muntu wafwainwa kulapila ku bundengamambo bwanji, kuleka byubilo byatama, kwipana mu kupopwela Yehoba ne kumwingijila kabiji ne kuyukisha kwipana kwanji kupichila mu kubatizwa mu mema. Umvwe Lesa wamusala amba akalamenga mu Bufumu bwanji, ushingwa na mupashi wazhila. Muntu mwine ye wifuukwila lubaji lutanshi (lubatizhilo lwa mu mema); lwa bubiji (lubatizhilo lwa mu mupashi) lufuma kwi Lesa. Umvwe muntu wapita mu lubatizhilo lonse lubiji, ko kuba’mba wasemwa jibiji.

Pano mambo ka Yesu mu mwisambo wanji ne Nikodema o aingijishe byambo bya kuba’mba “kusemwa ku mema ne ku mupashi”? Walumbulwilenga kuba’mba aba babatizwa mu mema ne mu mupashi bapimpulwa. Mutwe walondelapo walumbulula luno lupimpu lwa kusemwa jibiji.

[Tubyambo twa mushi]

[Kipikichala pa peja 9]

Yoano wabatizhe bena Isalela balapijile mu mema

Kusemwa Jibili Kulengela Muntu Kwikala Byepi?

MAMBO ka Yesu o aingijishe kyambo kya kuba’mba ‘kusemwa ku mupashi’ kimye kyo aambilenga pa kubatizwa mu mupashi? (Yoano 3:5) Kyambo kya kuba’mba “kusemwa” mu ñambilo ya kifwanyikizho kilumbulula’mba “ntendekelo” nabiji ñambilo ya “kusemwa kwa mukoka.” Ko kuba’mba, kyambo kya “kusemwa jibiji” kilumbulula’mba “ntendekelo ipya.” Onkao mambo, ñambilo ya kifwanyikizho ya kwamba’mba “kusemwa jibiji” ibena kulumbulula kishinka kya kuba’mba kukekala ntendekelo ipya ya bulunda pakachi ka Lesa ne bantu babatizwa mu mupashi wazhila. Nga buno bulunda butendeka byepi?

Pa kulondolola Lesa byo anengezha bantu kwikala bakalama ba mwiulu, mutumwa Paulo waingijishe kya kumwenako kya bwikalo bwa kisemi. Wanembejile bena Kilishitu ba mu moba anji amba ‘bakatambulwa bubwana’ kabiji amba Lesa ‘wimuba byo boba na baana.’ (Ngalatiya 4:5; Bahebelu 12:7) Pa kuba’mba tumvwishe mwatala kya kumwenako kya kutambula mwana byo kilumbulula bulongo lupimpu lwikalapo umvwe muntu wabatizwa mu mupashi wazhila, akilangulukai jibiji pa kya kumwenako kya mwana ukeba kutendeka kufunda pa sukulu pafundatu bene bena kyalo kwapwa.

Lupimpu lwa Kutambulwa Bubwana

Mu kya kumwenako, kalombwana wakankalwa kutendeka kufunda pa sukulu mambo kechi mwina kyalo ne. Pano fwanyikizhai kuba’mba juba jimo, bintu byapimpulwa. Auno mwana bamutambula kwi nsemi wa mulume wa ku yoyo mpunzha kuba’mba ekale mwananji kwesakana na mwayila mizhilo. Nga kino kyakonsha kulengela mwana kwikala byepi? Na mambo a kutambulwa bubwana, auno mwana wikala pamotu na baana bakwabo bena kyalo, kabiji wafwainwa ne kutendeka kufunda pa sukulu wa bena kyalo. Kutambulwa bubwana kwamulengela kuba kyo afwainwe kubula kuba.

Kino kya kumwenako kibena kulumbulula kintu kyanema bingi kimwekela boba basemwa jibiji. Monai byo byaesakana. Uno kalombwana mu kya kumwenako bafwainwa kumuswishatu kufunda pa sukulu kanatu waikala mwina kyalo, muzhilo wa kutendekelapo sukulu. Bino, aye mwine kechi wakonsha ne. Po pamotu, bantu bamo bakekala bakalama mu kafulumende wa mwiulu, kanatu umvwe balondela muzhilo wa kwibaswisha’mba ‘basemwe jibiji.’ Pano bino, abo bene bunke bwabo kechi bakonsha ne, mambo kusemwa jibiji kufuma kwi Lesa.

Ki ka kyapimpwile bwikalo bwa uno kalombwana? Kulondela muzhilo wa kutambulwa bubwana. Bino, uno muzhilo kechi wapimpwile mwekelo ya uno kalombwana ne. Panyuma ya kutambulwa bubwana, wajingatu byonka byo amwekenga ne kala. Nangwa byonkabyo, panyuma ya kulondela muzhilo wa kutambulwa bubwana auno kalombwana watambwile kifulo kipya. Kya kine, wajinga na ntendekelo ipya nangwa’mba kusemwa jibiji. Waikele ke mwana mwina kyalo, kyo kyamulengejile kutendeka sukulu ne kwikala wa mu kisemi kya nsemi wamutambwile kwikala mwana.

Po pamotu, Yehoba wapimpwile bwikalo bwa jino jibumba ja bantu babula kulumbuluka pa kubikako muzhilo wa kwibatambula bubwana. Mutumwa Paulo, wajinga umo wa mu joja jibumba wanembejile bakwabo ba mu lwitabilo amba: ‘Mwatambwile mupashi wa bwana bwa bene, mo mo tutachila’mba, Abba, Tata! Aye mupashi mwine ushimuna pamo ne mipashi yetu, amba twi baana ba Lesa.’ (Loma 8:15, 16) Ee, na mambo a kulondela jino jishinda ja kutambulwa bubwana, abano bena Kilishitu baikala ke baana ba mu kisemi kya Lesa, nangwa amba “baana ba Lesa.”—1 Yoano 3:1; 2 Kolinda 6:18.

Pano bino, kutambulwa bubwana kechi kwapimpwile bano bantu ne, bajingatu babula kulumbuluka byonka byo bajinga ne kala. (1 Yoano 1:8) Nangwa byonkabyo, Paulo walumbulwile’mba panyuma ya kulondela mizhilo ya kutambulwa bubwana, batambwile bifulo bipya. Kabiji pa kimye kimotu, mupashi wa Lesa wibalengejile kusumininwa kuba’mba bakekala ne Kilishitu mwiulu. (1 Yoano 3:2) Kabiji kuno kusumininwa kwa na mupashi wazhila kwibalengejile kumona’mba bwikalo bwabo bwapimpulwa. (2 Kolinda 1:21, 22) Ee, bajinga na ntendekelo ipya nangwa amba kusemwa jibiji.

Baibolo waamba pa batambulwa bubwana bwa Lesa amba: “Bakekala bañanga ba Lesa ne ba Kilishitu, ne kwikala nanji na bufumu myaka kiumbi kimo.” (Lumwekesho 20:6) Kilishitu ne boba batambulwa bubwana bakekala ke bamfumu mu Bufumu bwa kwa Lesa, nangwa amba mu kafulumende wa mwiulu. Mutumwa Petelo wanembejile bakwabo ba mu lwitabilo amba buno bukalama ke “buswanyi bubula kubola, bubula kutamishiwa, bubula kwaluka, bo bemulamina mwiulu.” (1 Petelo 1:3, 4) Ke buswanyi bwakila bingi mu kunema!

Nangwa byonkabyo, ano mambo a bukalama aleta buno bwipuzho. Inge kya kuba aba basemwa jibiji bakekala bamfumu mwiulu, bañanyi bo bakalamanga? Buno bwipuzho bwakumbulwa mu mutwe walondelapo.

[Kipikichala pa peja 10]

Paulo waambilepo’mba ka pa kutambulwa bubwana?