Twamupele Lesa Wetu Lukumo
Kibaba kiji mu Mwingilo Wetu wa Bufumu wa July kya kuba’mba “Ikwashainga Anwe Bene na Bene Kwingilanga Kimye Kyonse,” kitutundaikile bingi kupwisha mwaka wa mwingilo wa 2003 “na kizaku kya kwingijila Yehoba.” Byo tubena kumona pa mwingilo byo aingijiwe muno mwetu mu Zambia, twayai tumone ne pa mwingilo wetu wa pa kipwilo byo aendele. Kino kyafwainwa kwitutundaika kutwajijila kupa Lesa wetu lukumo kupichila mu kwingila papelela ngovu yetu mwingilo wa Bufumu.
Muno mwetu mu Zambia, basapwishi bonse pamo bafikile 114,757 kukila kibelengelo kya mwaka wapwa kyajinga 110,443. Kino kibena kumwesha kibelengelo kuyilako palutwe na mapesenti ana. Nga mu kipwilo kyenu, kibelengelo kya kuyilako palutwe kyajinga byepi kwesakana na kya mwaka wapwa? Bino kibelengelo kya babatizhiwe kyabweleleko panshi kufuma pa 10,941 kya mwaka wapwa kubwela pa 8,930 kya uno mwaka nangwa kyakuba mafunjisho a Baibolo afunjishiwe ayijileko palutwe na mapesenti atanu.
Nanchi mwafunjishepo lufunjisho lwa Baibolo lwa pa nzubo lumo nangwa avula pa kibelengelo kyatongolwa kya 172,914 kya mwaka wapwa nyi? Umvwe ibyo, abya ano mafunjisho a Baibolo abena kukomenako kufika ku kwipana ne kubatizwa pa kuba’mba bakizhemo kupa Yehoba Lesa lukumo nyi? Abya pajipo pamo pakebewa kuwamishako mu jishinda jo mufunjishishamo mafunjisho a Baibolo nyi? Uno ke mwingilo mukatampe kabiji ukebewa kutako maana pa kufunjisha bantu kwikala bakalume ba Yehoba. Umvwe tubena kunengezha bya kufunjisha lufunjisho lwa Baibolo, twafwainwa kwibikako kunengezha bulongo ponka papelela bulume bwetu.−1 Timo. 4:15, 16.
Maawala aingijiwe mu mwingilo wa mu bujimi, kubwelako kwaubiwe, magazini ne mabuku ashajikilwe, bino byonse byakijilekotu pacheche kibelengelo kya mwaka wapwa. Nangwa byonkabyo, bipwilo bimo bibena kukebewa kuvululwangako kuba’mba bitumenga masawakya abyo. Twatakaika mabumba avula a bakulumpe mu bipwilo batangijila na bukishinka, kukonkanya, kunemba ne kutuma masawakya a kipwilo ku ofweshi ya musampi bukiji bukiji.
Mwingilo uji yense ye mwaingijileko anweba basapwishi ba bukishinka ne bapainiya mu kusapwila mambo awama mu mwaka wa mwingilo wa 2003, kine ye walengejile sawakya kuluñama. Byo tubena kutengela na kizaku mwaka wa mwingilo wa 2004, twayai atweba bonse, basapwishi ne bipwilo, tunembenga masawakya a mwingilo ye twingila kimye kyonse. Twayai pano twibikisheko na mukoyo kwingila mwingilo wetu ye twapewa wa ‘kulenga baana ba bwanga,’ kwibafunjisha ‘kwakamwa Lesa ne kumupa lukumo.’—Mat. 28:19; Lum. 14:7.