Kuzhila Mashi kya Kine

Byambo byalondelapo byanembululwa jibiji kufuma mu Kyamba kya Usopa kya October 15, 2000 kya Kibemba. Bino byambo kechi byanembelwe mu milaka imo ya muno mwetu ne. Pa kuba’mba mufuukule bulongo pa mambo a kubula kubukwa na mashi nangwa na michi ijimo tumashi tucheche, twimutundaika bonse kulangulukalangulukapo pa mizhilo ne mafunde a mu Baibolo. Mitwe ya bisemi yafwainwa kukosako kukwasha baana bayo kumvwisha lufunjisho lwa mu Baibolo pa mambo a mashi.

¹ Kutazha ku Mikambizho ya mu Baibolo Yaamba pa Buneme bwa Mashi, nga Bakamonyi Bakwa Yehoba Bamona Byepi Mbukilo ya Kwingijisha Mashi Anji Mwine Muntu? Kukila kufuukwila muntu bya kuba nangwa jishinda ja kubukilwamo, mwina Kilishitu yense wafwainwa kulangulukishapo mu kukosa pa mambo a Baibolo byo yambapo. Ke mambo aji pakachi ka aye ne Yehoba.

² Yehoba, yenka witupa bumi bwetu, wakambizhe amba mashi kechi afwainwa kujiwa ne. (Ntendekelo 9: 3, 4) Mu mizhilo ya bena Isalela, Lesa wibazhijikile kuja mashi mambo aimenejilengako bumi. Wakambizhe amba: “Bumi bwa mubiji buji mu mashi; ne amiwa neapana kwi anweba pa kyakusokelapo bitapisho, namba ekale ke a kwimufuchila mambo.” Ibyepi umvwe muntu waipaya nyama wa kuja? Lesa waambile’mba: “Bakasumishe mashi abo panshi, ne kwiazhika na maloba.”a (Bena Levi 17: 11, 13) Yehoba wabwezhezhengapo uno mukambizho pa kimye ne pa kimye. (Mpitulukilo ya mu mizhilo 12: 16, 24; 15:23) Mwina Yudea wa jizhina ja Soncino Chumash waambile’mba: “Mashi kechi afwainwa kusungiwa nangwa kujiwa ne, bino afwainwa kusumishiwa panshi.” Kafwako mwina Isalela wafwanyijile kusunga mashi ne kwingijisha mashi a kilengwa kikwabo ne, mambo bumi bwakyo bwafuma kwi Lesa.

³ Mutembo wa kulama Muzhilo wa Mosesa wapwile kimye kyafwile Mesiasa. Bino mweno ya Lesa ya byo amona kuzhila kwa mashi ne luno ikingila. Batumwa byo batangijilwe na mupashi wazhila wa Lesa, bakambizhe bena Kilishitu ‘kuzhila mashi.’ Uno mukambizho kechi wafwainwe kumusula ne. Wanemene bingi byonka byanema muzhilo wa kuchinuzhuka bulalelale ne kupopwela bankishi. (Byubilo 15: 28, 29; 21:25) Kisela kya kupana ne kubikwa mashi byo kyakumbene mu myaka kitota kya bu 20, Bakamonyi bakwa Yehoba bekimwene kuba’mba kechi kyaswañene na Byambo bya Lesa ne.b

⁴ Bimye bimo, dokotala utundaika mulwazhi kufumishiwa mashi anji saka kwakishala milungu kumuba opaleshonyi pa kuba’mba umvwe kekukebewe mashi, bafwainwatu kumubikamo mashi anji o basungile. Pano kuno kufumya kwa mashi, kwiasunga, ne kubwela kwiabwezhamo, kechi kuswañanapotu nangwa pacheche na byaambiwa mu Bena Levi ne mu Mpitulukilo ya mu mizhilo ne. Mashi kechi afwainwa kusungiwa ne; bino afwainwa kusumishiwa panshi, ko kuba’mba kubwezhiwa kwi Lesa, byonka byo kyajinga kukala. Kya kine kuba’mba, Mizhilo ya Mosesa kechi ingila lelo jino ne. Bino Bakamonyi bakwa Yehoba abo banemeka mafunde Lesa o aambilemo, kabiji bafuukulapo ‘kuzhila mashi.’ Onkao mambo, kechi tuswa kwitufumya mashi nangwa kusunga mashi etu kuba amba abwezhiwemo afwainwa ‘kusumishiwa panshi’ ne. Kino kisela kechi kiswañana na mizhilo ya Lesa ne.

⁵ Mashinda akwabo a kwingijishishamo mashi a muntu mwine nangwa kwiapima kechi alwañana mu kushinkamika na mafunde a Lesa ne. Kyakumwenako, bena Kilishitu bavula baswisha kwibafumya mashi abo kuba’mba beapime nangwa kwiatala bulongo, panyuma ya bino babwela beechila. Ne mashindatu akwabo akatazha kwingijishishamo mashi anji muntu nao akonsha kwingijishiwa.

⁶ Kyakumwenako, pa kwingijisha mashinda amo a kubukañenamo, mashi amo bakonsha kwiafungila mu mashinyi kufuma mu mubiji. Mashi acheche ashala mu mubiji wa uno mulwazhi avwangakana na mema afuma monka mu mubiji. Panyuma ya kuba bino, mashi anji o bafungila mu mashinyi abwezhiwa jibiji mu mubiji. Mu jino jishinda, mashi abwela avula jibiji kunangijila ku kipimo kya mashi anji ekalamo. Kikwabo, mashi afuma pa kilonda bakonsha kwiabika mumo ne kwengulako maselo achila beabwezha mu mubiji wa uno mulwazhi. Mu jishinda jikwabo japusanako, mashi bakonsha kwiapompela pa kimye kicheche mu mashinyi yingila nobe bibese bimo bya mubiji (nabiji, muchima, mapwapwa, nangwa mafyo). Panyuma ya bino, mashi kufuma mu mashinyi beabwezha jibiji mu mubiji wa uno mulwazhi. Mu mashinda akwabo, mashi kufuma mu mubiji apita mu mashinyi yo basokeka ku mubiji kabiji pa kupita aa achimba afumamo apa bino aji bulongo atwajijila kupita ne kubwela jibiji mu mubiji. Nangwa kampe bakeba amba bafumyemo bibese bimo bya mu mashi ne kwibibika mu kibese kikwabo kya mubiji wanji. Kabiji kuji ne mpimino ya kuba bafumyamo mashi amo mu mubiji kuba’mba bavwangeko muchi, kabiji inge bapwisha beabwezha jibiji mu mubiji wa mulwazhi.

⁷ Mashinda akonsha kupusana pusana, kabiji kwakonsha kwikala ne mashinda akwabo akatataka a kubukañenamo, ne kupiminamo mashi. Kechi ke mutembo wetu wa kufuukwilako muntu jishinda jo akonsha kusalapo ne. Mwina Kilishitu wafwainwa kwifuukwila aye mwine jishinda jo akonsha kusalapo kwingijisha mashi anji umvwe babena kumuba opaleshonyi, kumupima nangwa kumubuka na muchi. Saka kwakishala kimye, wafwainwa kumonañana na dokotala kuba’mba amubule bikobiwa ku mashi anji kimye kya kumwingijilapo. Apa bino mwine wafuukulapo jishinda jo akeba kwesakana na mwamuswishisha jiwi ja muchima wanji. (Monai kabokoshi)

⁸ Bena Kilishitu bafwainwa kuvulukanga kwipana kwabo kwi Lesa ne mutembo wa ‘kumutemwa na muchima wabo yense, ne na mweo wabo yense, ne na bulume bwabo bonse, ne na maana abo onse.’ (Luka 10:27) Kupusanako na bavula panopantanda, Bakamonyi bakwa Yehoba banemeka bingi bulunda bwabo bwawama na Lesa. Aye Upana Bumi witutundaika atweba bonse kuketekela mu mashi aichikile a kwa Yesu. Tutanga kuba’mba: “Mwi aye [Yesu Kilishitu] mo muji bukuzhi bwetu bwa mu mashi anji, lo lulekelo lwa mizhilulwila yetu, monka mwayila bunonshi bwa bupe bwanji.”—Efisesa 1:7.

[Tubyambo twa mushi]

[Kitenguluzha pa peja 4]

MEPUZHO A KWIIPUZHA ANWEBA BENE

◼ Umvwe mashi ami beapompela mu mashinyi yo basokeka ku mubiji wami, kampepo beachibikizhako ne pacheche kubula kubwela mu mubiji, abya jiwi ja muchima wami jakonsha kunswisha kumona ano mashi amba akiji mwi amiwa, onkao mambo kechi afwainwa ‘kusumishiwa panshi’ ne nyi?

◼ Nanchi jiwi ja muchima wami jafunjishiwa na Baibolo, jakonsha kunkatazha umvwe pa kuba opaleshonyi nangwa pa kubukwa na muchi bafumyamo mashi ami amo, beawamisha, babwela beabwezhamo mu mubiji jibiji nyi?