Twakonsha Kukwasha Byepi Bantu Babula Bakamonyi Besongola na Bakamonyi?
1 Bakalume ba Yehoba bavula, besongola na bantu baji bingi bulongo babula Bakamonyi, kabiji batemwa bingi kutanwa ku kipwilo, pano bino kyo bakankalwakotu ke kuba’mba bekale bakalume ba Lesa. Wamulume umo wasongola Kamonyi waitabile’mba: “Mulanguluko wa kuyanga na kusapwila ku nzubo ne nzubo wambwezhanga bingi panyuma.” Bakwabo nabo kampepo bajipo na byubilo byabula kuswañana na Binembelo byo bakeba amba bakikebipwishe, nangwa kampe bakonsha kwiumvwa amba kechi bakakonsha kwingila mwingilo wa Teokalasi bulongo byonka byuba bena kwabo ne. Nanchi twakonsha kwibakwasha byepi?
2 Teshai Muchima ku Bantu: Kutesha muchima ku bantu bakwetu ne kwibakwasha mu bintu bibaletela bijikila mu bumi bwabo kwakonsha kwibashinkwila jishinda ja kufunjilamo bukine bwa mu Baibolo. (Fili. 2: 4) Aba babujile kwikala mu lwitabilo lumo na bena kwabo, pano luno byo babaikale Bakamonyi javula bashimikizha bingi lusekelo lwibamweshanga bakwabo Bakamonyi. Wamulume umo ye twaambapo kala walondolwele amba, “José, mukulumpe mu kipwilo, wantele bingi muchima. Nalanguluka namba kunkosesha ko ankoseshe ko kwandengejile amba ntendeke kutesha muchima ku kufunda.” Wamulume mukwabo wasongola uvuluka amba, balongo bamufwakeshanga baesekele bingi kwamba pa bintu byamutokeshanga pa muchima. Waambile’mba, “Natendekele kumona lwitabilo lwa mukazhami mu jishinda jingi. Balunda nanji bajinga bantu bajimuka bingi besambanga pa mitwe yapusana pusana.”—1 Ko. 9:20-23.
3 Bakwashai mu Mingilo: Bantu babula Bakamonyi besongola na Bakamonyi bakonsha kumvwa bingi bulongo kupichila mu kwibakwashako mingilo yapusana pusana. (Mana. 3:27; Nga. 6:10) Kimye motoka ya mwanamulume umo wabula Kamonyi byo yafwile, Kamonyi umo wakyanyike wamukwashishe kulungisha. Uno mwanamulume uvuluka amba, “Naumvwine bingi bulongo na buno bukwasho.” Mulongo mukwabo wazhikishe juba jonse na kukwasha mwanamulume umo wabujile kwikala Kamonyi wasongwele nyenga yetu Kamonyi, kutunga luvimba lwa nzubo yabo. Olo, monka mu kwingila ne kwisambila pamo, besampile bulunda. Byo papichiletu milungu ibiji, uno mwanamulume wakasolomokele mulongo ne kumwambila’mba: “Pano kyafika kimye kya kuba’mba pimpule bwikalo bwami. Mwane kana mwakonsha kutendeka kumfunjisha Baibolo nyi?” Uno mwanamulume wanungulukile bingi mu kufunda Baibolo, kabiji pa kino kimye kyo tubena kwamba ke Kamonyi wabatizwa.
4 Byo tuya mu nyaunda yetu na kukebamo bantu bafwainwa, twayai tutwajijile kukwasha boba bonse basongola nangwa basongolwa ku bakwetu ba mu lwitabilo.—1 Timo. 2:1-4.