Kubula Kutala ku Bilungi bya Bantu mu Mwingilo Wetu

¹ Petelo waambile’mba “Lesa kechi utala ku bilungi bya bantu ne,” pakuba “aye wamwakamwa, ne kuba byaoloka, ye waitabilwa kwi aye.” (Byubilo 10:34, 35) Buno bukine bo bwitulengela kwingila bulongo mwingilo wetu lelo jino. Onkao mambo, twafwainwa kwingila na ngovu ne kufumyapo lukatazho luji lonse lwakonsha kwitulengela kubula kusapwila mambo awama ku bantu bonse.

² Byo tuya na kusapwila ku nzubo ne nzubo mu mapunzha amo, tutana bantu bamba mulaka ye tubula kwingijisha mu kipwilo. Luno lukatazho lwa mulaka lulengela bantu bamo kubula kutambwila mambo a Bufumu o tusapwila. Mu bano muji ne boba bashinka matwi, kabiji ne bengijisha maboko pa kwamba. Ki ka kyafwainwa kubiwa pa kuba’mba tushinde luno lukatazho lwa mulaka lwitulengela kubula kusapwila bulongo mambo awama ku bano bantu?

³ Mu 2000, Sosaiti yatumine kapepala ka Twapaapaata Fwayeni Uyu Muntu (S-43), ku bipwilo byonse. Nkebelo ya kano kapepala ke ya kwitukwasha kumona’mba bantu babula kwamba mulaka wingijishiwa mu kipwilo kyaikela mu yoyo nyaunda, kubikako ne bantu bengijisha mulaka wa kwamba na maboko, bapewa jishuko ja kutambwila mambo a Bufumu mu mulaka wabo.

⁴ Umvwe mwatana muntu washinka matwi mu nyaunda yenu nangwa ubula kumvwa mulaka wingijishiwa mu kipwilo, mwafwainwa kunemba bulongo kano konka kapepala. Mwafwainwa kunemba nangwa kya kuba muntu kechi wamwesha lusekelo mu bukine ne. Kechi kimye kyonse kyo mwakonsha kuyuka jizhina ja muntu ne, pano bino mwafwainwa kunemba keyala ne mulaka ye amba. Mwafwainwa kubika kano kapepala mu kabokoshi ko tubikamo masawakya a mwingilo wa mu bujimi pa Nzubo ya Bufumu. Munembeshi ukasenda tuno tubipepala, ne kupitamo kumona’mba twanembwa bulongo kabiji ne byambo bibena kutangiwa bulongo, apa bino aketutume ku kipwilo kiji pepi nangwa ku jibumba jitala pa bantu bamba yewo mulaka wanembwapo.

⁵ Kimo kimye kino kechi kyafwainwa kwikala bino ne. Kya kumwenako, bipwilo byamba mulaka wa Kitonga mu Zambia byayuka kutanwa bantu bamba mulaka wa Kitonga mu nyaunda yabyo. Kabiji kimo kimye bantu bamba mulaka umo bakonsha kwikala mwalepalepa. Kipwilo nangwa jibumba jamba yewo mulaka jafwainwa kwingijila mu manyaunda akatampe ne kuyuka kuji bantu bo bakonsha kukwasha.

⁶ Umvwe kafwako kipwilo nangwa jibumba mu yoyo mpunzha bakonsha kusapwila mu mulaka wambiwa ne, kampe kwakonsha kwikalapo musapwishi mu kipwilo kya konkako wayuka mulaka wafwainwa kwisamba nabo. Nangwa panyuma ya kwipuzha mukulumpe wa muzhi kyatanyiwa kuba’mba kafwako nangwa umo wamba yewo mulaka ne, balongo bakonkako bafwainwa kwingila papelela bulume bwabo kumona’mba mambo awama asapwilwa. Buloshuwa wa Ilemenai Bumi Pano Pantanda Myaka Yonse! wingila bingi bulongo mu bimye bya uno mutundu.

⁷ Musapwishi yense wafwainwa kumona’mba ubena kwingijisha tupepala tumwesha bya kubwelako jibiji. Umvwe kipwilo kechi kiji na tupepala twa S-43 ne, byambo bijipo byafwainwa kunembwa nangwa pa kakipepala kacheche ne kwikapana byonka byo kyaambiwapo kala. Umvwe saka twingila na ngovu kusapwila bantu bonse mambo awama nangwa bamba mulaka wa mutundu ka nangwa ka, tukamweshanga butemwe bwa Lesa wetu, Yehoba, “wasaka’mba, bantu bonse bapuluke, bakayukishe bya bukine.”—1 Timo. 2:4.