Kumwenamo mu Majashi a Mvula Bantu
1 Bwikalo bwa Bakamonyi ba kwa Yehoba ba ano moba bwalondololwa bulongo byonka byo kyaambiwapo mu Byambo bya Mana 4:18 amba: “Jishinda ja baoloka jauba nobe kyeya kya kumakya, kyenda kisama ne kusamisha, kufika ne pa kushinkimana juba.”
2 Monka mwayila bino byambo, kipwilo kya bwina Kilishitu kyatwajijila na kutambwila ndumbulwilo yakatataka ifika pa kimye kyafwainwa ne byambo byakatataka byaamba pa mafunjisho a mu Baibolo. (Mat. 24:45-47) Nenuwa mwakonsha kushimikizhapo bya kumwenako byo mwimwena anwe bene kufuma kimye kyo mwatendekele kupwanañena pamo na Bakamonyi ba kwa Yehoba. Kupwila kwa kipwilo, kuvwangako ne majashi a mvula bantu, bitukwasha kwikala mu kyeya kya bukine kibena kuya na kusama.
3 Ma Autulaini Akatataka ne Anembululwa Jikwabo: Ofweshi wa musampi watuma ma autulaini avula a majashi a mvula bantu. Ma autulaini akwabo anembululwa ne kubikamo byambo byakatataka, kabiji ne bishinka byanema byalondololwa bulongo. Pa kuba’mba kipwilo kikamwenengamo mu bino byambo byakatataka, balongo bamba majashi a mvula bantu bafwainwa kwingijishatu ma autulaini akatataka.
4 Pa kuba’mba mukambenga bulongo majashi a mvula bantu, mwafwainwa kulangulukanga pa mitwe ya majashi akambiwanga. Saka mukyangye kutanwa ku Kupwila kwa Mvula Bantu, esekai kuvuluka byambo byakatataka kufuma mu mabuku a teokalasi byaamba pa yewo mutwe. Kimye kyo mubena kuteleka ku jashi, fwanyikizhainga bibena kwambiwamo. Teshaiko muchima mumvwe mashinda akatataka a kwambilamo buno bukine kuba’mba mukeengijishe kulutwe na lwendo. Kino kimwesha’mba mukamwenamo bingi mu ano majashi a mvula bantu anembululwa.
5 Majashi a Mvula Bantu Afwainwa Kufika Bantu pa Muchima ne Kwibatundaika: Yesu byo aambanga, wafikanga pa michima ya bantu bamutelekanga. Pa kupezhako Jashi janji ja pa Mutumba, jashi jayile bingi nkuwa byonka byashimuna Mateo 7:28, “Mabumba akuminye mo afunjishenga.”
6 Umvwe mabumba a bakulumpe mu bipwilo saka avuluka kya kumwenako kya kwa Yesu, bafwainwa kusala bulongo bañambi bakatataka bakwamba pa mvula bantu, bayuka kufunjisha bulongo, bakalondelanga byambo byanembwa pa autulaini, kabiji bakonsha kulengela luonde kutenkamenamo na kuteleka. Balongo batongolwa kwamba majashi a mvula bantu bafwainwa kutwajijila na kuwamishako busendwe bwabo bwa kwamba, saka baswa kwibafundako ne mashinda mwakubila kufuma ku bakulumpe mu kipwilo. Umvwe mukulumpe mu kipwilo kechi wafikapo kwamba majashi a mvula bantu ne, kyawama kwisamba nanji mu meso anteka.
7 Byonka byo kyaambijilwe jimo mu Isaya 65:13, 14, kuyilako palutwe kwa bantu ba Lesa kwatwajijilatu na kumwekana patoka. Lunengezho lwa majashi a mvula bantu jo jishinda jimo pa mashinda avula o tubena ‘kufunjishiwamo kwi Yehoba.’—Isa. 54:13.