Twajijilai Kwendanga na Lesa

Mutumwa Paulo waambile pa buneme bwa kukelwa kwendanga na Lesa byo anembele’mba: “Monka mo mwatambwijile kwi atweba mwafwainwa kwendela ne kutokesha Lesa pa muchima . . . mukijishemo ne kukijishamotu.” (1 Tesa. 4:1) Byo twasangalalapo kwikala pakachi ka bantu bavula batwajijile kwenda na Lesa mwaka wa mwingilo wapwa! Byo tubena kumona pa byo twaingila mu kino kyalo, twayai tulangulukepo ne pa byo twaingila pa kipwilo kyetu. Mu kuba bino kwa kubula nangwa kuzhinauka ne kuketulengela kumona mbaji yo twakonsha kutwajilamo palutwe mwingilo wa Bufumu byonka byo betubujile pa kupwila kwa nkambi kwa mu 2004.

Bipwilo byonse biji muno mu Zambia biji 2,136, kabiji mwaka wa mwingilo wa 2004 wapwile na kibelengelo kyawama bingi kya basapwishi 118,068 batuma masawakya abo pa ñondo pa ñondo. Kino kibena kumwesha kuyilako palutwe na mapesenti asatu. Kya lusekelo ke kya kuba’mba kibelengelo kya mafunjisho a Baibolo kyafikile 203,691, nangwa kya kuba kwajinga kubwelako panshi kwa kibelengelo kya boba babatizwe kufuma pa 8,930 mwaka wapwa kubwela pa 7,758. Nanchi kujipo mbaji imo ya mwingilo wetu ibena kukebewa kwingijilapo nyi?—Mat. 28:19, 20.

Nanchi mubena kuvuluka Enoka byo aendelenga na Lesa nyi? Kechi waikeletu bwikalo bwa byubilo byawama ne. Lesa wamuketekejile’mba wafwainwa kusapwila. (Yuda 14, 15) Enoka byo aingijile na ngovu kufika pa michima ya bantu boajimwinenga, ‘wamutokeshe Lesa pa muchima.’ (Hebe. 11:5) Ne atweba umvwe saka twingila na ngovu kusapwila ne kufunjisha, tukapeshiwa.

Tubena kusanchila mabumba avula a bakulumpe mu bipwilo abena kwingila mu bukishinka kutangijila mwingilo wa kusapwila ne kukonkanya bukiji bukiji masawakya abo a kipwilo ne kwiatuma ku ofweshi wa musampi. Tubena kutengela kwingila pakatampe mu mwaka wa mwingilo wa 2005 bantu bakwabo bavula byo babena kukwatankena pamo ne atweba mu kwendanga mwafwainwa Yehoba kabiji ne kulanguluka pa bumi bwa myaka ne myaka!