Yehoba Watemwa Upana na Lusekelo
1. Mambo ka Yehoba o aikela Lesa wa lusekelo?
1 Yehoba walumbululwa’mba “Lesa wa lusekelo.” (1 Timo. 1:11, NW) Ki ka kilengela Yehoba kwikala wa lusekelo? Kintu kimo kimulengela kwikala wa lusekelo ke na mambo a kuba’mba mpanyi kabiji waswila jimo kupana ne ‘kuvungulula kuboko kwanji ne kwikusha michima ya byonse byumi.’ (Sala. 145:16) Bupe bwanji bukatampe ke Mwananji ye apaine kwikala bukuzhi bwa kwitukuula. (Yoa. 3:16) Kabiji akilangulukaipotu ne pa bintu bya ku mupashi ne bya ku mubiji byo etupa pa juba pa juba! Ee kine, Yehoba ye wa kumwenako wawama “upana na lusekelo.” (2 Ko. 9:7) Baibolo witukambizha’mba: “Ikalai ba kulonda Lesa.” (Efi. 5:1) Twayai tupituluke mu mbaji imo mo twakonshesha kulonda Yehoba ne kumona lusekelo lufuma mu kupana.—Byubilo 20:35.
2. Twiumvwa byepi umvwe twabulako bantu mambo awama a Bufumu?
2 Twikala bingi na lusekelo umvwe twabulako bantu baji mu nyaunda yetu mambo awama a Bufumu. Umvwe ke twingileko pakatampe mu uno mwingilo wa kusapwila ne kufunjisha bantu, lusekelo lwetu lubayilako. Pa mwaka pa mwaka, bantu ba Yehoba bengila maawala kukila pa bilyonyi umo mu uno mwingilo wa kupana. Mu mwingilo wetu wa busapwishi, tusha magazini, mabuloshuwa ne mabuku avula bingi kwa kubula kulipilisha.
3. Nga bipwilo biji mu byalo byakepelwa mali nabiji Zambia, byakwashiwa byepi?
3 Kunungapotu, mu byalo byakepelwa mali nabiji kyalo kyetu, jibumba ja Yehoba jakwasha bipwilo byavula kutunga Mazubo a Bufumu. Kino kitulengela kwikala na bishimikwa byawama bya kupwilamo. Lelo jino, Mazubo a Bufumu akila pa 6,000 atungiwa mu byalo byakepelwa mali bya mu Africa byonkatu. Pa myaka itanu na ibiji yapitapo, bipwilo 1,302 bya mu Zambia bebikwasha kwiikela na Mazubo abyo a Bufumu kupichila mu luno lunengezho. Bino bipwilo byakambizhiwa kulama bulongo bishimikwa byayo kabiji ne kupanako mali a kupingizha pa oa aingijishiwe kwesakana na ponka pakonsha kupelela bulume bwabo. Ano mali akwasha bipwilo bikwabo kwikala na mazubo a Bufumu.
4. Bintu ka bitaiwapo mali biji mu ma ofweshi a misampi mwaya ntanda yonse?
4 Jibumba Jitangijila kupichila mu misampi yakila pa 100 mwaya ntanda, jitangijila mwingilo wa Bufumu wa ntanda yonse. Mu ino misampi muji balongo ne banyenga bakila pa 20,000. Mu misampi imo muji minkinyi ya kupulintilako mabuku a kwingijisha mu bujimi. Katatakatu papo jibumba po japotele minkinyi ikatampe itanu na ibiji itelwa’mba MAN. Munkinyi umo wakonsha kupulinta magazini 90,000 pa awala umo. Akilangulukaipotu pa bintu bikebewa mu kwingijisha ino minkinyi ikatampe. Bishimikwa byabaya bikebewa mwa kubika ino minkinyi ikatampe. Mapepala avula bingi ne bintutu bikwabo bya mutengo bikebewa kuba’mba magazini ne mabuku apulintwe. Makompyuta ne biñambañamba bikwabo bikebewa kuba’mba mwingilo wa kutuntulula ne mingilotu ikwabo ya mu ofweshi ingijiwe. Kabiji kukebewa ne bibamba mwa kulaala bengijila pa Betele. Ino mingilo yonse ilengela mwingilo wa busapwishi kuyilako palutwe.
5. Bintu ka bikwabo mwaya ntanda bikebewa mali?
5 Jibumba jingijisha mali akwabo kukwasha bamishonale ne bapainiya beikajila batumwa kuya na kwingijila mu manyaunda muji kukajilwa kwa basapwishi. Kabiji kuji ne bakulumpe benda bafwakashisha bipwilo na kukosesha lwitabilo lwa balongo ne kwibatundaika kwingila mwingilo wa busapwishi. Twakonsha kubatu balaule bintu Yehoba byo abena kulengela bakalume banji kwingila, nangwa kya kuba bimwekanepotu kushupa byepi.
6. Kwepi kufuma mali onse engijishiwa ku ino mingilo yonse ya ku mupashi?
6 Inge amba mutaletu pa mwingilo mukatampe ubena kwingijiwa mwaya ntanda yonse, mwakonsha kuba ke mwiipuzhe kufuma mali engijishiwa ku bino bintu byaambiwapo. Ano onse mali kechi afumatu ku balongo banonshi nangwa ku byalo byanonka kwapwa ne. Afuma ku balongo banonka ne bayanji kabiji ne ku boba bamwesha lusekelo banemeka uno mwingilo mukatampe wanema Yesu ye etukambizhe kwingila. (Mat. 24:14; 28:19, 20) Buno bupe bonse buji nobe miso ya mvula ilenga kakola kacheche ne kukonkolokela mu mukola. Uno mukola ukonkolokela mu mukola mukatampe kabiji ne kulenga kalunga. Bakamonyi ba kwa Yehoba kechi bapishamo nsanyi pa kupwila nangwa kulombalomba mali ne. Aba bonse batundaika uno mwingilo kupichila mu kupanako mali boba bino na mambo a kutemwa Yehoba.
7. Kimye kyonse bantu ba Lesa beumvwa byepi pa mambo a kuleta bya bupe ku mwingilo wa Yehoba?
7 Kimye kyonse bapopweshi ba kine ba Yehoba mu kwitemenwa bapana bintu bya ku mubiji kutwajilamo palutwe mpopwelo ya kine ya Yehoba. Abalahama byo ashinjile balwanyi basendele mwipwa wanji Lota, wapaine bupe ku ñanga Melekizedeke. (Nte. 14:18-20) Mfumu Davida wapaine ngolode yavula bingi, siliva, lubemba, bichi ne bya buneme bikwabo bya kutungila nzubo ya Lesa yaishile kutungiwa na mwananji Solomone. (1 Moba. 29:1-5) Kimye Yehoba kyo akambizhe Mosesa kutunga tente wa lusambakeno mu kiselebwa, bantu bapaine bya bupe na muchima yense. Jishimikila jiji mu Kulupuka 35:21 jaamba’mba: “Bonse bajinga na michima yasumininwa ne na mipashi yaswa kuleta baishile ne kuleta bya bupe bya Yehoba [bya kulengela tente wa lusambakeno].” Kya kine, ‘michima yabo yasumininwe’ ne ‘mipashi yabo yaswile,’ ibalengejile kupana na muchima yense bya bupe bya kwikobaika kobaika ne bintu bikwabo bya ku mubiji byakonsheshe kubula kupingizhiwapo na bintu bikwabo kulutwe. Nkebelo yabo yajinga ya kutwala palutwe mpopwelo ya kine.
8. Ñanyi lufunjisho lwanema lo tufunda mu jishimikila jiji mu Luka 21:1-4?
8 Byo byo kiji ne lelo. Bya bupe bya kukwasha mwingilo wa Bufumu wa ntanda yonse bifuma ku boba baji na michima yasumininwa ibalengela kupana. Bavula bayanji bino bapanako mali kutundaika mwingilo wa busapwishi, javula kushalatu kwa kubula kaji konse, nobe byonka byaubile mwanamukazhi wafwilwa mulanda wa mu kimye kya kwa Yesu. Jishimikila jiji mu Luka kitango 21 jalumbulula Yesu ne baana banji ba bwanga byo bamwene bantu batayilenga bya bupe byabo mu kilambwilo ku nzubo ya Lesa. Kabiji mwanamukazhi wafwilwa mulanda waishile ne kutayamo tundalama tubiji tucheche. Pa kumona bino, Yesu waambijile batumwa banji amba: “Amiwa kine nemwambila namba, uno mulanda mwanamukazhi wafwilwa watayamo byakila bya bonse: mambo abo bonse batayamo mu bya bupe bya mu kuvula kwabo; pakuba aye mu kukajilwa kwanji watayamo byonse byo aji nabyo.” (Luka 21:2-4) Watakaikilwe bingi mambo mu kukajilwa kwanji wapaine byonse byo ajinga nabyo. Jino jishimikila jimwesha’mba nangwatu mali acheche apana balongo bakajilwa, anema bingi kabiji atokesha Yehoba ne Mwananji Yesu Kilishitu pa muchima.
9. Bintu bya ku mubiji twafwainwa kwibipana na ñanyi muchima?
9 Pa kupana bya bupe bya kutundaikilamo mpopwelo ya kine ya Yehoba, twafwainwa kupana na muchima yense. Bena Isalela byo balekele kunemeka nzubo ya Yehoba, mu kifulo kya kupana milambo ya banyama bawama, baletelenga yoya ya banyama bo balengulwile bene, banyama babela, babula meso ne boba balemana. Nanchi Yehoba wakonsheshe kuswa milambo ya uno mutundu nyi? Kwalepeshatu! Waambilenga’mba bamubile mwenga pa kumuletela ino milambo. (Levi. 1:10; Mala. 1:13) Kino kilumbulula’mba kechi twafwainwa kupana bya bupe bya kutundaikilamo mpopwelo ya kine amba kikulu kupanatu ne. Kukeba kwetu kwa kutwala palutwe mpopwelo ya kine kwafwainwa kwitutundaika kupana; ee michima yetu yafwainwa kwitulengela kupana milambo yalumbuluka nobe byonka byaubile mwanamukazhi wafwilwa mulanda. Yehoba uketupesha, byonka byo akonsheshe kupesha bena Isalela umvwe kya kuba batundaikilenga mpopwelo yanji ya kine kupichila mu kupana bya bupe.—Mala. 3:10.
10. Lumbululai lunengezho lwa kupana bupe bwa kukwasha kusampanya mabuku byo luji.
10 Bantu bamo kechi bakonsha kuyukisha bulongo lunengezho lwa kupana bupe byo lukwasha mwingilo wa kusampanya mabuku ne magazini ne. Umvwe twatambula mabuku nangwa magazini pa Nzubo ya Bufumu, ke jishuko jetu ja kupanako bupe pa bintu byo twasenda. Mu jino jishinda, tweseka kupana mali kupingizhapo pa oa aingijishiwe. Umvwe twashila bantu mabuku mu mwingilo wetu wa mu bujimi, twakonsha kwibabula luno lunengezho lwa kupanako bupe kimyetu kitanshi kyo twasambakana nabo. Kyanema bingi kulumbulula luno lunengezho ne kwibalengela kupanako bupe ku Mwingilo wa Ntanda yonse. Bavula umvwe bayuka mwingilo wetu byo aji, batemwa bingi kupanako bupe.
11. Twafwainwa kumonanga byepi kwingijisha bintu byetu bya ku mubiji kutundaikilamo mpopwelo ya Yehoba?
11 Umvwe twalangulukishapotu bulongo pa kwipana kwetu kwi Yehoba, tuvuluka kuba’mba twipana atweba bene ne bintu byonse byo tuji nabyo kwi Yehoba. Panopantanda ne byonse bijipo, bya Yehoba. (Sala. 24:1) Onkao mambo, umvwe twapana bupe ku mwingilo wa ntanda yonse, ko kuba’mba tubena kumubwezhezhatu Yehoba bintu byo etupa kala. Mfumu Davida walumbulwile bingi bulongo kino kimye aye ne mukoka wa bena Isalela kyo bapaine na muchima yense bya bupe bya kutungila nzubo ya Lesa. Mu lulombelo waambile’mba: “Amiwa yami ñanyi, kabiji ne bantu bami bo ba byepi, byo twakonsha kupana na muchima yensetu byonkabye? Mambo bintu byonsetu bifuma kwi anweba, kabiji mu bya kwenu anwe bene mo mo twimupa.” (1 Moba. 29:14) Muntu yense wafwainwa kwifuukwila mu muchima wanji kupana byo asaka kwesakana na pakonsha kupelela bulume bwanji. Yehoba ukobila bibusa bonse bapana na lusekelo kufuma panshi ya muchima.
12. Mambo ka o twafwainwa atwe bene kwipesapesa kumona umvwe tubena kutundaika mwingilo wa Bufumu?
12 Twafwainwa atwe bene kwipesapesa kumona umvwe tubena kutundaika mwingilo wa Bufumu. Bimye bimo balongo bamba’mba bafwabyo bya bupe bya kupanako ku mwingilo wa ntanda yonse nangwa bya kuwamisha Nzubo ya Bufumu, pano bino bekala na mali a kwingijisha ku bintu byabulapotu ne nkito. Pa kunengezha masongola, javula muzema wa mali utayiwa pa masongola ekalakotu juba jimo. Nanchi kino kechi kimwesha amba bamo baluba bya kutangizhako pa mambo a kupanako mali a kukwasha mwingilo wa Bufumu nenyi?—Fili. 1:10.
13. Twakonsha kupana byepi bupe ku mwingilo wa ntanda yonse, kabiji kipwilo kyafwainwa kuba byepi na buno bupe?
13 Mali a kupana ku mwingilo wa ntanda yonse akonsha kutumwa ku ofweshi wa musampi nangwa kwiabika mu kabokoshi ka bupe kaji mu Nzubo ya Bufumu. Ku mpelo ya kupwila konse balongo babiji bafwainwa kubala mali ne kunemba lishichi ya oo mali. Umvwe balongo balama mali baikala ba bukishinka mu mwingilo wabo, kino kikalengela balongo mu kipwilo kubika mali mu tubokoshi twa kubikamo bupe tuji mu Nzubo ya Bufumu kwa kubula kuzhinauka. (1 Ko. 4:2) Bupe bonse bwa mwingilo wa ntanda yonse butambwila kipwilo, bwafwainwa kutumwa ku ofweshi wa musampi ku mpelo ya ñondo.
14. Ki ka kyo twakonsha kuketekela umvwe mu bukishinka saka tutundaika mwingilo wa Bufumu kupichila mu kupanako mali?
14 Yehoba waubijile bibusa mukoka wa bena Isalela kimye kyo batundaikilenga mpopwelo yanji ya kine mu bukishinka na bintu byabo bya ku mubiji. Ne atweba twakonsha kuketekela kuba’mba uketubila bibusa umvwe mu bukishinka saka tutundaika mwingilo wa kusapwila Bufumu ne ‘kunemeka Yehoba na bintu byetu.’—Mana. 3:9, 10.