Kupwila kwa Nkambi kwa Bakamonyi ba kwa Yehoba kwa “Kukokela Lesa” kwa mu 2005
1 Byo aji Mufunjishi wetu Mukatampe, Yehoba Lesa unengezha amba tupwile pamo na kwitufunjisha mashinda anji. (Isa. 30:20, 21; 54:13) Uba kino kupichila mu jibumba ja kalume wa kishinka ne wa maana, jinengezha kupwila nabiji kupwila kwa nkambi kubiwa jimo pa mwaka. (Mat. 24:45-47) Byambo byetu bijitu byonka byajinga bya kwa Davida nyimbi wa masalamo, waimbile’mba: “Monka mu bipwilo nkamutota Yehoba.” (Sala. 26:12) Davida wayukishetu buneme bwa kufunjishiwa na Yehoba kabiji wakebeshe bingi kwikala pa bantu ba Yehoba kimye kyonse umvwe bapwila pamo.
2 Nanchi mukekala monka “mu bipwilo” bya bakatanwa ku Kupwila kwa Nkambi kwa “Kukokela Lesa” uno mwaka nyi? Umvwe ibyo, byambo byalondelapo bisa kwimukwasha bingi byo mubena kunengezha kuba’mba mukatanweko.
3 Nengezhai Kutanwako Moba Onse: “Muntu ulangulukila jimo ne kukosakana pa kwingila ukamona bintu byavula.” (Mana. 21:5) Nanchi bino byambo kechi bibena kwambisha pa bunema bwa kunengezhezha jimo kwakubula kutaya kimye kuya na kutanwa ku kupwila kwa nkambi ne nyi? Pa kuba’mba mukabule kupuswako ku pologalamu wa ku mupashi, tendekai lonka luno kunengezhezha jimo kuba’mba mukatanweko moba onse asatu. Umvwe kibena kukebewa kulomba moba ku bakulumpe benu ba nkito, ubai lonka luno. Inge kibena kukebewa kwisamba byo mwanengezha na bena kwenu babula kwitabila, kechi mwafwainwa kupembelela’mba ku kikashale moba acheche apa bino mukesambe nabo ne. Makatazho onse o mwakonsha kupitamo, atongaulai mu lulombelo kwi Yehoba, ne kuketekela amba ‘byo mulanguluka bikalumbuluka’ na bukwasho bwanji. (Mana. 16:3) Kabiji kunungapo, kyawama bingi ne kukwashako bo mufunjisha Baibolo nabo kuba’mba benengezhe ne kukatanwako ku bipungu byonse.
4 Mwa Kulaala: Javula balongo benengezhezha bene kufikila ku balongo babo nangwa balunda nabo baji ku bwipi na mpunzha kwaikela kupwila. Mu mapunzha a mu mizhi balongo batunga tumisakuta nangwa kulaala mu misakuta ikatampe yatungwa na balongo bepana kwingila pa koko kupwila. Pa kupwila kwa nkambi kumo kumo bengijisha bibamba mulaala baana ba sukulu kuba’mba mulalenga bamo baiya na kupwila. Umvwe balongo ba ku mupashi nangwa balongo benu ba ku mubiji bo bemutambwila kwikala nabo, kechi kyawama kulanguluka’mba pano twashukwa betutambwila bulongo tunungeko ne tumoba twa kukokolokelako panyuma ya kupwila ne. Abino bibamba ke bya kulaalamotu pa moba a kupwila kwapwa. Aba babena kusungwa mu ano mazubo bafwainwa kumona’mba abo pamo ne baana babo banemeka nzubo ya muntu wibatambwila, kabiji kechi bafwainwa kwikala na kisuse kya konauna bintu nangwa kupalanguzha mu bipe nangwa kutwela ku bibamba bikwabo byo babula kwibaswisha ne. Umvwe bena mazubo batana makatazho a uno mutundu, bafwainwa bukiji bukiji kubuula balongo ba mu Dipatimenti Inengezha Bibamba Mwa Kulaala boba baiya na kupwila, kabiji balongo bakatemwa bingi kwimukwasha.
5 Kukajilwa Pakatampe: Mutumwa Paulo waambilepo pa balongo bamo amba bo ba ‘mukoseshanga muchima.’ (Kolo. 4:7-11) Jishinda jimo jo bamukwashijilemo Paulo ke kumunengezhezhapo bintu byo akajijilwe. Mwakonsha kwikala byepi ‘bakukosesha muchima’ bakwenu kimye kya kupwila kwa nkambi? Basapwishi bakikulumpe, balwazhi, aba baji mu mwingilo wa kimye kyonse, ne bakwabotu kimye kimo bakonsha kukebewa kwibakwashako mu ñendelo nangwa mwa kulaala. Bakilongo bo baji na mutembo wa kukwasha bano bantu. (1 Timo. 5:4) Pano bino umvwe bakankalwa kwibakwasha, balongo ba mu lwitabilo bafwainwa kwibakwasha. (Yako. 1:27) Bakulumpe ba lufunjisho lwa buku bafwainwa kumona amba aba baji mu jibumba jabo baji na makatazho benengezhezha jimo kupwila kwa nkambi saka kukyangye kufika.
6 Mapepala a Kwipuzhizhapo Kibamba Mwa Kulaala: Umvwe musapwishi wapana pepala wa Kwipuzhizhapo Kibamba, Kometi ya Mwingilo mu Kipwilo ikapitulukamo kwingijisha mikambizho yanembwa pa uno pepala. Bafwainwa kumona umvwe luno lubaji lwakonsha kwingijiwa ponka pa kipwilo kyabo. Luno lunengezho ke lwa basapwishi bonkatu babula kaneneno pamo ne baana babo baji na byubilo byawama. Umvwe Dipatimenti Inengezha Bibamba Mwa Kulaala yaikala na mepuzho aji onse, ikashikisha munembeshi mu kipwilo.
7 Kuya na Kupwila ku Mpunzha Ingi: Pa kuba’mba kukekale mpunzha yabaya pa kwikala, mabuku avula, bibamba mwa kulaala, ne bikwabotu, basapwishi batundaikwa kutanwa ku kupwila kwa nkambi kipwilo kyabo ko kyatongwelwa kutanwa. Umvwe kya kuba’mba kuji bimo bikemulengela kupwila ku mpunzha ingi, mwane monai mutanchi uji pa peja 5 ubena kumwesha moba aji mu ndonda a kupwila kwa nkambi kwa uno mwaka kukekela muno mwetu mu Zambia. Tumai pepala wenu wa Kwipuzhizhapo Kibamba ku babena kunengezha kupwila kwa nkambi ku yoyo mpunzha ko mukeba kuya na kupwila. Umvwe mu yoyo mpunzha mukekala kupwila kwa nkambi kwavula, monai’mba pa pepala mwanembapo mulaka ne moba akekelamo kupwila kwa nkambi ko mukatanwa.
8 Kwivimbila ku Mapuso: Jibumba ja Yehoba mu butemwe jituvululako pa kimye kyafwainwa pa mambo a kupwila kwa nkambi. Ke kya bulanda bingi kushimuna’mba pa mapunzha amo pekela kupwila myaka ya kunyuma kwe, bamo batainweko bipe byabo byapile na mujilo wafwainwe kubula kwikalako. Kabiji bamo nabo bafwile mu mapuso a pa mukwakwa. Balongo bapewa mwingilo pa kupwila ne bansemi, bakambizhiwa kuteshako muchima ku bino bishinka pa kuba’mba kupwila kwetu kukekale kwa kwitukosesha ne kupwanañana kwawama, kechi kwa bulanda bwa mapuso aubiwa na mambo a muleele ne.
9 Kwakubula nangwa kuzhinaukatu ne, kilengela misakuta kupya pa kupwila kwa nkambi kechi kutekela kajo kwipi na misakuta ne, ke na mambo a kuleka baana sabakaisha nangwa kumona mujilo. Onkao mambo, pa kuba’mba mwivimbile ku mujilo anweba bene ne balongo benu, kange muleke baana saka bapitañana bunke bwabo ne; kabiji kange mushile baana mema abena kuselauka’mba batalengamo, nangwa kwibasha amba bamonenga mu mpoto ne. Kimo kimye ku nzubo kampepo bengilatu bulongo, bino mpunzha pa kupwila ke ingi kabiji pakebewa kutako bingi muchima pa kuba’mba mwivimbile ku mapuso. Bantu bavula bekala pamo, kabiji ne baana nabo batemwa kukaya bisela inge baji na bakwabo banyike. Balabikwa bingi kabiji kechi bayuka byakonsha kuleta mapuso ne, onkao mambo kechi twafwainwa kwibashila tundulu, mankishi nangwa malampi ne. Lukatazho lukwabo lwikalako inge bansemi baya na kupwila ne kusha baana bunke mu misakuta kwakubula wa kwibasopa. Baana bafwainwa kwikala pamo na bansemi babo kimye kya kupwila. Inge baasha bamona baana sabapitañana bunke kwakubula wa kwibasopa, bafwainwa kwibabwezha kuji bansemi babo. Twasasapo, anweba bansemi kwatankenai pamo na bapewa mingilo pa kupwila, mu jino jishinda tumwesha ‘butemwe ku balongo bonse.’—1 Pe. 2:17.
10 Bipwilo bimo bikeba myotoka ya kwibatwala ku mapunzha a kupwila. Motoka uji yense ubena kutwala bantu ku kupwila kwa nkambi wafwainwa kwikala wawama, waswishiwa kwenda pa mukwakwa. Myotoka kechi yafwainwa kusenda bantu bavula kukila pa kipimo ne. Kyawama kutongolapo mulongo umo wafwainwa kwikala kapitao wa kunengezha bya ñendelo. Ukabula jibumba bya lwendo, juba ne kimye kya kunyamuka apa kabiji ne pa mpunzha po bakapatamina. Umvwe jibumba jaikala na makatazho aji onse, kapitao wafwainwa kuyuka kino pa kuba’mba ebabule bya kuba. Umvwe kyatanyiwa’mba pa bena kukebewa bukwasho, kufundañana, nangwa jishinda mwakupwishila lukatazho lumo, balongo bafwainwa bakakonsha kwingijilapo.
11 Ba Mwingilo ba Kwitemenwa Bakebewa: Yesu wamwesheshe kya kumwenako kyawama bingi kya kuta muchima ku byakajijilwe bakwabo. (Luka 9:12-17; Yoa. 13:5, 14-16) Ne boba bepana kwingilako mingilo ya kwitemenwa pa kupwila kwa nkambi bamwesha muchima wajingapo ne Yesu. Pa kuba’mba mingilo ya mu madipatimenti a pa kupwila ingijiwe, Makometi a Kupwila kwa Nkambi bukumotu atendeke kwita ba kwiya na kwibakwashako. Kikatakata bakulumpe mu bipwilo bafwainwa kwipana ne kwingila mingilo yo bapewa. Muchima wabo wa kwitemenwa wikala wa kumwenako bonse baji mu kipwilo.—1 Pe. 5:2, 3.
12 Kupichila mwi “kalama wa kishinka,” Yehoba Lesa wanengezha amba bantu banji bakapwile pamo ne kufunjishiwa ku mupashi. (Luka 12:42) Kikebewa kwibikako bingi pa kuba’mba munengezhe kukatanwako moba onse asatu kabiji kuno kwibikako kwanema bingi. Kupwila kwa Nkambi kwa uno mwaka kwa “Kukokela Lesa” kine kuketukosesha byo twafuukulapo kwingijila Yehoba ano moba ne myaka yonsetu. Twayai tumvwine byambo bya nyimbi wa masalamo bya kuba’mba: “Totai Lesa mu bipwilo.”—Sala. 68:26.
[Kitenguluzha pa peja 3]
Bimye bya Kupwila
Juba Jitanshi ne ja Bubiji
8:45 hrs. - 16:05 hrs.
Juba ja Busatu
8:45 hrs. - 15:30 hrs.
[Kitenguluzha pa peja 4]
Mutanchi wa Kupwila kwa Nkambi kwa “Kukokela Lesa” kwa mu 2005
MOBA MPUNZHA MULAKA
AUG. 12-14 CHILILABOMBWE CW
KABWE CW
KAFUE CN
KITWE (Buchi) CW
KITWE (Chamboli) E ne ASL
LUSAKA Assembly Hall (EC-03, E-09d) E ne ASL
MUFULIRA CW
SOLWEZI KD
AUG. 15-17 MALAMBANYAMA CG
AUG. 16-18 KASEMPA KD
LUSWISHI CW
AUG. 17-19 NYIMBA CN
AUG. 19-21 CHINSALI CW
KAFUE CG
KAOMA SK
LUSAKA Assembly Hall (LK-06) CW
MANSA CW
NDOLA CW
AUG. 20-22 KABOMPO LV
AUG. 21-23 MUTENDA CW
AUG. 22-24 LUNDAZI CN ne TB
NSAMA (Chintalima) CW
AUG. 23-25 SAMFYA CW
SENANGA SK
AUG. 24-26 LUWINGU CW
MUTOYA LD
MUYOMBE TB
AUG. 26-28 CHINGOLA CW
CHIPATA CN
KALOMO CN ne CG
KASAMA CW
LUSAKA Assembly Hall (EC-01, W-03d) E ne ASL
Independence Stadium CN
AUG. 28-30 MWANGE (Mporokoso) SW
SIKUNDU (Kalabo) SK
SOLWEZI CW
AUG. 29-31 KALUNGU CW
LUALABA CW
AUG. 30–SEP. 01 MULILIMA CW
AUG. 31–SEP. 02 MAPANZA CG
SEP. 01-03 KABULA CW
MWEWA CW
SEP. 02-04 KASHITU CW
KATETE CN
LUSAKA Assembly Hall (LK-07a) CW
LYENGA CN
MBALA CW
MONGU SK
MPIKA CW
MPONGWE CW
SEP. 05-07 KALA (Kawambwa) SW
KAZEMBE CW
MULOBEZI SK
SEP. 06-08 MATAMBAZI CN
SEP. 09-11 KAWA CW
LUANSHYA CW
MKUSHI CW
MUMBWA CN ne CG
MUNUNGA CW
MWANDI SK
PETAUKE CN
[Kitenguluzha pa peja 5]
ASL - Mulaka wa kina America wa Kwamba na Maboko CG - Kitonga
CN - Kichewa CW - Kibemba E - Kizungu KD - Kikaonde
LD - Kilunda LV - Kilubale SK - Kiloshi SW - Kiswaili TB - Kitumbuka