Kitango 3

Wanengezhezhe Jishinda Wasemenwe

ELISABETA wajinga pepi kupapa. Maliya waikajile nanji bañondo basatu. Pano kimye kyafikile kya kuba’mba Maliya amushajikepo ne kubwela kwabo ku Nazala. Pa bañondo pepi na batanu na umo naye ukasema mwana.

Aku Maliya uyatu, Elisabeta wapapile. Kyaletele bingi lusekelo Elisabeta byo apapiletu bulongo kabiji aye ne mwananji byo bajingatu bulongo! Elisabeta byo amwesheshe uno mwananji ku bakwabo ne balongo banji, bonse basekejile bingi pamo ne aye.

Pa juba ja butanu na busatu panyuma ya kusemwa kwa mwana, kwesakana na Mizhilo ya Lesa, mwana wamulume mu bena Isalela bamutwalanga ku mukanda. Pa kikye kimye balunda nanji ne balongo banji baishile na kumupempula. Baambile’mba uno mwana bafwainwa kumutumba jizhina ja shanji amba, Zekaliya. Pano bino Elisabeta wakaine. Waambile’mba: “Ine mwane ne! Usakutelwa amba Yoano.” Vulukai’mba jino jo jizhina malaika Ngabaliela jo aambile’mba jo jo bafwainwa kutumba uno mwana.

Nangwa byonkabyo, balunda nanji bakaine’mba: “Mu balongo bobe kafwamo uji na jino jizhina ne.” Onkao mambo, kupichila mu kwingijisha maboko, bashikishe shanji jizhina jo akebele’mba atumbe mwananji. Byo ebalombele kya kunembapo kyapapakana, bonse bakuminye bingi Zekaliya byo anembelepo amba: “Jizhina janji Yoano.”

Aku unembatu, Zekaliya watatwile kwamba. Vulukai kuba’mba walekele kwamba mambo kechi waswile byamubujile malaika amba Elisabeta ukasema mwana ne. Zekaliya byo atatwile kwamba, bonse baikalanga kipikipi bakuminye bingi ne kwishikisha bene mulwabo amba: “Nanchi uno mwana ukekala muntu wa mutundu ka?”

Zekaliya wayujile na mupashi wazhila ne kwamba’mba: “Atotwe Yehoba, Lesa wa Isalela mambo wavuluka bantu banji ne kwibapokolola. Kabiji wituletela lusengo wa lupulukilo mu nzubo ya Davida kalume wanji.” Uno “lusengo wa lupulukilo” ye Nkambo Yesu waishile kusemwa. Kupichila mwi aye, Zekaliya waambile’mba, Lesa “panyuma ya kwitupokolola mu maboko a balwanyi, witupa kimye kya kwingijila Lesa kwa kubula moyo na bukishinka ne bololoke ku meso anji mu moba etu onse.”

Kepo Zekaliya aambijile jimo pa mwananji Yoano amba: “Pakuba obewa Mwana Mucheche, ukatelwa amba ngauzhi wa Mwine Wakila, mambo Yehoba ukakutangizhako na kunengezhezha jimo mashinda anji, kusapwila byambo bileta lupulukilo ku bantu kupichila mu kwibalekelako mambo abo na mambo a lusa lwine lwa Lesa wetu. Na mambo a luno lusa lwine, tukamona kyeya kufuma mwiulu kikasama pamo nobe juba ne kupana kyeya ku baji mu mfishi ne ku baji mu kimvule kileta lufu, ne kutangijila maulu etu mu jishinda ja mutende.”

Pa kikye kimye, kyamweka Maliya saka akiji muzhike, wafikile mu muzhi wa Nazala. Ñanyi kintu kikamweka umvwe kikayukanyikwe amba waimita? Luka 1:56-80; Bena Levi 12:2, 3.

▪ Yoano wakijileko Yesu na bañondo banga?

▪ Ñanyi bintu byamwekele kimye Yoano kyo afikizhe moba atanu na asatu?

▪ Lesa wavulukile byepi bantu banji?

▪ Ñanyi mwingilo waambijilwe jimo Yoano ye aingijile?

Kitango 4

Waimichile Saka Abula Kusongolwa

MALIYA wajinga na jimi ja bañondo basatu. Vulukai’mba waikajile ne Elisabeta mu bañondo batanshi, bino pa kino kimye wabwelele ku muzhi wa Nazala. Kechi papichile kimye kyabaya kuba’mba bantu bayuke’mba waimita ne. Wakakijilwe bingi!

Kyakijishepo kutama ke kya kuba’mba Maliya bamwipangwizhe kwi Yosefwa kalipentala. Kabiji wayukile’mba kwesakana na mizhilo ya Lesa ku bena Isalela, mwanamukazhi ye baipanguzha inge waswa kulaala na mwanamulume ungi bamwasanga mabwe ne kufwa wafwa. Pano walumbulwijile byepi Yosefwa pa mambo a jimi jo ajinga najo?

Byo kiji kuba’mba Maliya wafuminepo bañondo basatu, kyamweka Yosefwa wakebeshe bingi kumumona. Byo basambakene, Maliya kyamweka wamubujile bintu byo byajinga. Kampe wamulondolwejile amba mupashi wa Lesa ye walengela amba emite. Bino byonka byo mwayuka, kechi kyamupelejile Yosefwa kuswa ne.

Yosefwa wayukile byubilo byawama byajinga na Maliya. Kabiji wamutemenwe bingi. Nangwa kya kuba Maliya walondolwele byepi nangwa byepi, kwi aye kyamwekele nobe bamwimishe ku mwanamulume ungi. Pano bino, Yosefwa kechi wakebele’mba Maliya bamwase mabwe amba afwe nangwa kumulengesha bumvu ku bantu ne. Onkao mambo, wafuukwilepo kumukana mu bufyamfya. Mu oa moba, banabakazhi bo baipanguzha bebamonanga’mba basongolwa kabiji kyakebewanga kwibakana umvwe kebakebe amba kupwe.

Palutwe kacheche, Yosefwa byo akilangulukilenga pa bino bintu, waponejile mu tulo. Malaika wa Yehoba wamwekele kwi aye mu kiloto ne kumwambila’mba: “Yosefwa, mwana Davida, kange uchine kusenda Maliya mukazhobe ku nzubo ne, mambo awa ye aimita wamwimita na mupashi wazhila. Ukasema mwana wamulume kabiji wafwainwa kumutumba jizhina amba Yesu, mambo aye ukapulusha bantu ku bundengamambo bwabo.”

Yosefwa byo abukile watemenwe bingi! Ponkapotu waubile monka mwamubujile malaika. Wasendele Maliya ku nzubo yanji. Kino kyo aubile kyamwesheshe patoka’mba Yosefwa ne Maliya pano besongola. Pano bino, Yosefwa kechi wilaajilepo na Maliya byo akijinga na jivumo ja kwa Yesu ne.

Akitalai! Maliya jivumo jakoma, bino Yosefwa wamukanjizha pa mbongolo. Kwepi ko babena kuya, kabiji mambo ka o babena kuyila Maliya saka aji pepi kupapa? Luka 1:39-41, 56; Mateo 1:18-25; Mpitulukilo ya mu Mizhilo 22:23, 24.

▪ Yosefwa waumvwine byepi byo ayukile’mba Maliya waimita kabiji mambo ka?

▪ Yosefwa wakonsheshe kukana byepi Maliya saka bakyangye kwisongola?

▪ Ñanyi kintu kyamwesheshe’mba Yosefwa ne Maliya besongwele patoka?