Kitango 7

Yesu ne Bashayuka Batubangabanga

BANABALUME bavula bafumine ku Musela. Bano bajinga bashayuka batubangabanga balumbululanga byajinga tubangabanga. Byo bajinga kwabo ku Musela, bamwene kabangabanga kangi, kabiji bekalondejile museke walepa kuya ku Yelusalema.

Bashayuka batubangabanga byo bafikile ku Yelusalema, bashikishe’mba: “Kwepi kwasemekelwa mfumu wa Bayudea? Mambo twaji kumona kabangabanga kanji kimye kyo twajinga ku Musela, kabiji twaiya namba tumulambile.”

Mfumu Heloda wajinga mu Yelusalema byo aumvwine kino, wazhingijile bingi. Onkao mambo, waichile bañanga bakatampe ne kwibashikisha kwasemekelwe Kilishitu. Abo bakumbwile monka mwaambila Binembelo amba: “Mu Betelema.” Kepo Heloda aichile bashayuka batubangabanga ne kwibambila’mba: “Yainga mukakebe bulongo kwasemekelwa uno mwana, kabiji umvwe mwamutana, mwafwainwa kubwela kuno nakumbula pa kuba amba ne amiwa nkayeko na kumulambila.” Bino Heloda wakebelenga’mba epaye mwana!

Byo bayile, kwamwekele kintu kya kukumya. Kabangabanga ko bamwene kimye kyo bajinga ku Musela, katangijileko kulutwe yabo. Kano kechi kajinga kabangabanga konkake ko twayuka ne, bino kuji wikanengezhezhe kwibatangijila. Bashayuka batubangabanga batwajijile kwikalondela posotu ne byo kaimene peulu ya nzubo mwajinga Yosefwa ne Maliya.

Bashayuka batubangabanga byo batwelele mu nzubo, bataine Maliya ne mwananji aye Yesu. Kabiji bonse bafukamine kwi aye. Kepo bakasulwile mafukuta abo ne kumupa bya bupe bya ngolode, binunka bulongo ne mola. Byo baubile’mba babwele na kubula Heloda kuji mwana, bebajimwine kwi Lesa mu kiloto amba babule kubwela kwi Heloda. Onkao mambo, bapichile jishinda jingi pa kubwela ku kyalo kyabo.

Ñanyi ye mwalanguluka amba ye wanengezhezhe kano kabangabanga kapichilenga mwiulu kutangijila bashayuka batubangabanga? Vulukai’mba kano kabangabanga kechi kakibatangijile kwajinga Yesu ku Betelema ne. Bino patanshi kebatangijile ku Yelusalema ko bamonañene na Mfumu Heloda wasakilenga kwipaya Yesu. Inge Lesa wabujile kujimuna bano bashayuka batubangabanga amba kange babule Heloda kwajinga Yesu ne, inge wamwipayile. Mulwanyi wa Lesa aye Satana Diabola ye wakebelenga kwipaya Yesu, kabiji waingijishe kano kabangabanga kuba’mba obe kyo akebelenga. Mateo 2:1-12; Mika 5:2.

▪ Ñanyi kintu kimwesha’mba aka kabangabanga kamwene bashayuka batubangabanga kechi kajinga konkake ko twayuka ne?

▪ Yesu wajinga kwepi kwamutaine bashayuka batubangabanga?

▪ Mambo ka o twayukila’mba Satana ye wanengezhezhe aka kabangabanga katangijile bashayuka batubangabanga?

Kitango 8

Banyemene Mfumu Wakanama

YOSEFWA wabushishe Maliya amba amubule byambo byanema. Mambo malaika wa Yehoba wamwekele kwi aye ne kumwambila’mba: “Imana, usende mwana ne inanji munyemene ku Ijipita, mukekalenga konkakwa poso nkakubule, mambo Heloda ubena kukeba amba epaye uno mwana.”

Ponkapotu bano basatu banyemene. Kabiji baubile kino pa kimye kyafwainwa mambo Heloda wayukile’mba bashayuka batubangabanga bamubepa kabiji bafumamo mu kyalo. Vulukai amba bafwainwe kubwela na kumubula ko bataine Yesu. Heloda wazhingijile bingi. Onkao mambo, byo akebele kwipaya Yesu wakambizhe’mba bepaye baana babalume bonse ba myaka ibiji ne kubwela panshi ba mu Betelema ne mu mapunzha monse. Wabajile ino myaka kwesakana na kimye kyo bamubujilemo bashayuka batubangabanga bafumine ku Musela.

Kwipaya bano baana babalume kyajinga kintu kyakankamikile bingi bantu! Bashilikale ba kwa Heloda bayilenga pa nzubo pa nzubo. Kabiji byo batainenga baana babalume, bebasompwelenga mu maboko a bainabo. Kechi twayuka kuvula kwa baana bo baipayile ne, bino kujila majilo ne mabingo akatampe a bainetu kwafikizhe bungauzhi bwa mu Baibolo bwaawile ngauzhi wa Lesa aye Yelemiya.

Pa kyokya kimye, Yosefwa ne kisemi kyanji bafikile mutende ku Ijipita, kabiji baikajilenga konkakwa. Bino juba jimo bufuku, malaika wa Yehoba wamwekele jibiji kwi Yosefwa mu kiloto. Malaika wamwambijile’mba: “Imana usende mwana ne inanji ubwele ku ntanda ya Isalela, mambo aba bakebelenga mweo wa mwana bafwa.” Onkao mambo, mu kufikizha bungauzhi bukwabo bwa mu Baibolo bwaamba’mba Mwana Lesa bakamwita kufuma mu Ijipita, kisemi kyabwelele ku kyalo kyabo.

Kyamweka Yosefwa wakebele kwikala mu kyalo kya Yudea, mo baikelenga mu muzhi wa Betelema saka bakyangye kunyemena ku Ijipita. Bino waumvwine’mba Akeleusa mwana wakanama wa kwa Heloda ye waikala ke mfumu mu Yudea, kabiji mu kiloto kikwabo bamujimwineko kwi Yehoba pa mambo a kino. Onkao mambo, Yosefwa ne kisemi kyanji bayile ku kabeta ka buyeke ne kukekala mu muzhi wa Nazala wa mu Ngalilea. Mu uno muzhi wajinga kwalepa na mpunzha ya bupopweshi bwa Bayudea, mo mwakomejile Yesu. Mateo 2:13-23; Yelemiya 31:15; Hoseya 11:1.

▪ Bashayuka batubangabanga byo babujile kubwela, ñanyi kintu kyatama Mfumu Heloda kyo aubile, bino Yesu wazhikijilwe byepi?

▪ Byo babwelelenga kufuma ku Ijipita, mambo ka Yosefwa o abujile kwikala jibiji mu Betelema?

▪ Ñanyi bungauzhi bwa mu Baibolo bwafikile pa kikye kimye?