Kitango 13

Kufunjilako ku Meseko Apichilemo Yesu

PANYUMATU ya lubatizhilo lwanji, Yesu bamutwajile ku mupashi wa Lesa mu kiselebwa kya Yudea. Wajinga na bintu byavula bingi bya kulangulukapo mambo kimye kyo abatizhiwe “jiulu jashinkukile,” kuba’mba akwatakanye bintu bya mwiulu. Kine, wajinga na bintu byavula bingi bya kulangulukapo!

Yesu waikele mu kiselebwa moba 40 mute ne bufuku kabiji kafwako kyo ajiilepo pa oa moba ne. Yesu byo afwile nzala, Diabola waishile na kumweseka ne kumwambila’mba: “Umvwe wi mwana Lesa, ambila ano mabwe aluke ke bashinkwa.” Bino Yesu wayukile’mba kechi kyawama kwingijisha bulume bwanji mu jishinda ja kukumya kuba’mba esangajike aye mwine ne. Onkao mambo, aye wakaine.

Nangwa byonkabyo, Diabola kechi wikilekele ne. Waingijishe jishinda jikwabo. Waambijile Yesu amba eele panshi kufuma peulu ya nsakwa ya nzubo ya Lesa amba bamalaika ba Lesa basakumuzhikijila. Bino Yesu kechi waswile kumweseka’mba obe kino kintu kya kukumya ne. Kupichila mu kwingijisha Binembelo, Yesu wamwesheshe’mba kyatama kweseka Lesa mu jino jishinda.

Mu lweseko lwa busatu, Diabola wamwesheshe Yesu bufumu bonse bwa pano pa ntanda mu jishinda ja kukumya ne kumwambila’mba: “Abye byonse nsakukupa umvwe umfukamine ne kumpopwela.” Kabiji Yesu wakaine jibiji kumweseka amba obe kyatama, aye wafuukwilepo kwikala wakishinka kwi Lesa.

Twakonsha kufunjilako ku ano meseko apichilemo Yesu. Ano meseko amwesha’mba Diabola kechi bubi byonka byamba bantu bamo ne, bino ke muntu wakine ubula kumweka. Meseko apichilemo Yesu amwesha ne kuba’mba makafulumende onse a pano pa ntanda ke bintu bya kwa Diabola. Umvwe ano makafulumende kechi ajinga a kwa Diabola ne, inge kechi wiengijishe kwesekelamo Kilishitu ne.

Akilangulukai pa kino: Diabola waambile’mba wakonsheshe kufweta Yesu umvwe wamupopwela ne kumupatu bufumu bonse bwa pano pa ntanda. Diabola wakonsha kwitweseka ne atweba mu jishinda jimotu, kampe kupichila mu kwitutundaika kukebesha kwikala na bunonshi bwa pano pa ntanda, bulume nangwa bifulo. Bino kyawama bingi kulondela byajinga Yesu kupichila mu kwikala bakishinka kwi Lesa nangwatu tupite mu meseko a byepi! Mateo 3:16; 4:1-11; Mako 1:12, 13; Luka 4:1-13.

▪ Ñanyi bintu Yesu byo alangulukilengapo pa moba 40 o ajinga mu kiselebwa?

▪ Diabola waesekele byepi Yesu?

▪ Twakonsha kufunjilako ka ku meseko apichilemo Yesu?

Kitango 14

Baana ba Bwanga Batanshi ba kwa Yesu

PANYUMA ya moba 40 mu kiselebwa, Yesu wabwelele kwi Yoano wamubatizhe. Yesu byo anangijilenga pepi, kyamweka Yoano watanyikile kuboko kwi aye ne kubula bo ajinga nabo amba: “Talai, Mwana mukooko wa Lesa ukafumyapo bundengamambo bwa ba pano pa ntanda! Uno ye yewa ye naambilepo namba, Awa ubena kwiya panyuma yami watangilako kala, mambo aye wajinga mutanshi amiwa saka kyangye kwikalako.” Nangwa kya kuba Yoano wajinga mukulumpe pe Yesu nkasanji wa mu jivumo jikwabo, Yoano wayukile’mba Yesu wajingako kala saka aji kilengwa kya mupashi mwiulu aye saakyangye kwikalako.

Kabiji kimye Yesu kyo aishile na kubatizhiwa, kyamweka Yoano kechi wakiyukile bulongo amba Yesu ye ukekala Mesiasa ne. Yoano waambile’mba: “Ne amiwa kechi namuyukile ne, bino ene mambo o naishijile na kubatizha mu mema ajinga a kuba amba, aye asoloke ku bena Isalela.”

Yoano watwajijile kulumbulwila bantu bamutelekelenga kintu kyamwekele kimye kyo abatizhe Yesu amba: “Namwene mupashi saka ekila nobe nkunda kufuma mwiulu, kabiji waikajile pe aye. Ne amiwa kechi namuyukile ne, bino Awa yenka wantumine na kubatizha mu mema, wañambijile amba, ‘Yenka ye ukamona saka bamwikijila ku mupashi ne kwikala pe aye, uno ye ukabatizhanga na mupashi wazhila.’ Ne amiwa namumwene, kabiji nashimwine ne kushimuna namba uno ye Mwana Lesa.”

Juba jalondejilepo, Yoano waimene na baana banji ba bwanga babiji. Kabiji Yesu byo anangijilenga, Yoano waambile’mba: “Talai, Mwana mukooko wa Lesa!” Yoano byo aambile bino, bano baana ba bwanga babiji ba kwa Yoano Mubatizhi bamulondejile Yesu. Umo wajinga Andeleo, kabiji mukwabo ye wanembele bino bintu ye batelanga’mba Yoano. Kwesakana na byo aubilenga, uno Yoano wajinga nkasa ne kolo ne Yesu mu jivumo jikwabo, kyamweka wajinga mwana Salome bankasa ne kolo ne Maliya.

Byo aalulukile ne kumona ba Andeleo ne Yoano saka bamulondela, Yesu wibashikishe’mba: “Nanchi mubena kukeba ka?”

Nabo bamushikishe’mba: “Labi, mwikala kwepi?”

Yesu wibakumbwile’mba: “Twayai mukamone ko ngikala.”

Kyajinga nobe ku ma 4 koloko a mabanga, ba Andeleo ne Yoano baikele ne Yesu pa joja juba jonse. Panyuma ya kino, Andeleo wasekejile bingi ne kuya lubilo na kukeba mulongo wanji watelwanga’mba Petelo. Wamubujile’mba: “Twatana Mesiasa.” Kabiji wamutwajile Petelo kwi Yesu. Pa kyokya kimye kampe Yoano naye wataine kolojanji aye Yakoba ne kumuleta kwi Yesu. Pano bino, Yoano washapo bino byambo mu Mambo anji Awama.

Juba jalondejilepo, Yesu wataine Filipa wafumine ku Beteseda, monka mu muzhi umo mwafumine ba Andeleo ne Petelo. Wamwichile’mba: “Ikala mwanami wa bwanga, undondelenga.”

Kepo Filipa ataine Natanela watelwanga’mba Batolomo ne kumubula’mba: “Twatana awa ye baambilepo kwi Mosesa mu Mizhilo ne mu byanembele Bangauzhi, Yesu, mwana Yosefwa wa ku Nazala.” Natanela wazhinaukile. Washikishe’mba: “Nanchi mu Nazala mwakonsha kufuma muntu wawama nyi?”

Filipa wamutundaikile’mba: “Twaya, ukamumone.” Byo banangijilenga kwajinga Yesu, Yesu waambile pe Natanela amba: “Talai, mwina Isalela wakine wabula bujimbijimbi.”

Natanela wamushikishe’mba: “Mwangyuka byepi?”

Yesu wamukumbwile’mba: “Filipa saka akyangye kukwita, byo wakijinga munshi ya kichi kya mukuyu, naji kukumona.”

Natanela wakuminye bingi. Waambile’mba: “Mufunjishi, anweba mwi Mwana Lesa kabiji mwi Mfumu wa bena Isalela.”

Yesu wamushikishe’mba: “Nanchi wangitabila na mambo a kukubula amba naji kukumona munshi ya kichi kya mukuyu nyi? Ukamona ne bintu byakila pa bino.” Kepo alayile’mba: “Nemubula kine namba, mukamona jiulu saka jashinkuka ne bamalaika ba Lesa saka bakanjila ne kwikila ku Mwana muntu.”

Panyumatu ya kino, Yesu pamo na baana banji ba bwanga batanshi bafumineko ku Kimpachiko kya Yodano ne kuya ku Ngalilea. Yoano 1:29-51.

▪ Baana ba bwanga batanshi ba kwa Yesu bajinga bañanyi?

▪ Petelo ne Yakoba baishile byepi kwi Yesu?

▪ Ñanyi kintu kyalengejile Natanela kushiinwa’mba Yesu Mwana Lesa?