Kitango 23

Bya Kukumya Bikwabo mu Kapenama

PA JUBA ja Sabado Yesu saka aita kala baana banji ba bwanga bana, ba Petelo, Andeleo, Yakoba ne Yoano, abano bonse batwelele mu nshinagoga yajinga mu Kapenama. Akwa Yesu watatwile kwibafunjisha kabiji bantu bakuminye bingi jishinda jo afunjishishengamo, mambo wibafunjishenga na lūsa lwamupele Lesa kupusanako na byafunjishanga banembeshi.

Pa jino juba ja Sabado pajinga ne muntu wajinga na ndemona. Palutwe kacheche wabijikile’mba: “Mambo ka o mubena kwitukabishisha anweba Yesu mwina Nazala? Nanchi mwaiya na kwitonauna nyi? Nemuyukishatu bulongo namba mwi Wazhila wa Lesa.”

Malaika wa Satana ye ndemona wamanyikilenga uno muntu. Yesu wamukajipijile ndemona amba: “Zhindamapo, lupukamo mwi aye!”

Uno ndemona wavulañenye yewa muntu ne kubijika. Bino walupukilemo mu yewa muntu kwa kubula kumukozha. Bantu bonse bakuminye bingi! Beambijile mulwabo amba: “Mfunjishisho yanji yapusana bingi! Mambo ukambizha ne bandemona, ne abo bamukokela.” Ponkapo nkuwa yanji yakumbene monse mu mapunzha.

Byo balupukile mu nshinagoga, Yesu ne baana banji ba bwanga bayile ku nzubo ya kwa Shimona nangwa’mba Petelo. Bako babakazhi ba kwa Shimona bakolelwe bingi. Bamusashijile’mba: ‘Bakwashai.’ Onkao mambo, Yesu wayile kwi abo, wibakwachile pa kuboko ne kwibabusha. Ponkapotu mashika apwile kabiji batatwile kwibanengezhezha kajo!

Byo kyafikile ke mabanga, bantu kufuma mu mapunzha onse bamuletejilenga ku nzubo ya kwa Petelo aba bakolelwe. Kabiji bantu bonse mu muzhi bakonkene konka ku kibelo! Ne Yesu wabukile bantu babo bonse bakolelwe bikola byapusana pusana. Kabiji wapangilemo bandemona mu bantu. Bandemona bo apangile mu bantu balupukilemo saka babijika’mba: “Anweba mwi Mwana Lesa.” Bino Yesu wibakajipile ne kwibakanya kwamba, mambo bamuyukile’mba ye Kilishitu. Mako 1:21-34; Luka 4:31-41; Mateo 8:14-17.

▪ Ñanyi kintu kyamwekele mu nshinagoga pa juba ja Sabado panyuma ya kuba Yesu waita kala baana banji ba bwanga bana?

▪ Kwepi kwayile Yesu kimye kyo alupukile mu nshinagoga, kabiji ñanyi kya kukumya kyo aubile?

▪ Ñanyi kintu kyamwekele byo kyafikile ke mabanga?

Kitango 24

Ene Mambo Yesu o Aishijile Pano pa Ntanda

YESU ne baana banji ba bwanga bana bapayankene bingi mu Kapenama. Mwingilo ye apezhezheko kuba wajinga wa kubuka bantu bakolelwe bo bamuletejile ku bantu ba mu Kapenama mu kimye kya mabanga. Kechi wajingapo na kimye kya kwikala bunke ne.

Juba jalondejilepo lukelokelo saka pakifitafita, Yesu wabukile ne kuya pangye kwa bunke. Wayile ku mpunzha kwa bunke na kulomba kwi Shanji. Bino Yesu kechi waikele kikupu bunke ne, mambo Petelo ne bakwabo byo bayukile’mba ufwapo, batatwile kumukeba.

Byo bamutaine, Petelo waambile’mba: “Bonse babena kwimukeba.” Bantu ba mu Kapenama bakebeshe bingi amba Yesu ekale nabo. Basekejile bingi pa bintu byo ebobijile! Nanchi Yesu waishile pano pa ntanda na kubuka bantu mu jishinda ja kukumya nyi? Pano waambilepo amba ka pa kino?

Kwesakana na jishimikila jimo ja mu Baibolo, Yesu wakumbwile baana banji ba bwanga amba: “Twayai tuyenga kukwabo, mu mizhi iji pepi, kuba amba nako nkasapwileko, mambo kyo kyo naishijile.” Nangwa kya kuba bantu bamusashijilenga amba Yesu ekale nabo, aye wibambijile’mba: “Ne ku mizhi ikwabo nafwainwa kusapwila mambo awama a Bufumu bwa Lesa, mambo kino kyo kyo natumijilwe.”

Yesu waishile pano pa ntanda kikatakata na kusapwila pa mambo a Bufumu bwa Lesa, bukazhijika jizhina ja Shanji ne kupwisha bikola byonse ku bantu. Nangwa byonkabyo, pa kuba’mba eyukanyikishe amba Lesa ye wamutumine, Yesu wabukile bantu mu jishinda ja kukumya. Mu moba a kala, Mosesa naye waubile bya kukumya pa kuba’mba eyukanyikishe amba kalume wa Lesa.

Yesu byo afumine mu Kapenama ne kuya na kusapwila ku mizhi ikwabo, baana banji ba bwanga bana bayile nanji. Bano bana bajinga ba Petelo ne Andeleo bankasa ne kolo, Yoano ne Yakoba bankasa ne kolo. Vulukai’mba papichile mulungu umo kufuma po ebechile Yesu kwikala bamingilo batanshi.

Mwingilo wa kwa Yesu wa kusapwila mu Ngalilea pamo na baana banji ba bwanga bana waendele bingi bulongo! Kabiji wayile nkuwa monse mu Silya. Mabumba akatampe afumine mu Ngalilea, mu Yudea ne ku bushiya bwa Yodano alondejilenga Yesu ne baana banji ba bwanga. Mako 1:35-39; Luka 4:42, 43; Mateo 4:23-25; Kulupuka 4:1-9, 30, 31.

▪ Ñanyi kintu kyamwekele juba jalondejilepo panyuma ya kupayankana kwa kwa Yesu mu Kapenama?

▪ Mambo ka Yesu o bamutumijile pano pa ntanda, kabiji bya kukumya byanji byaingijile ñanyi mwingilo?

▪ Bañanyi bayile ne Yesu ku Ngalilea na kusapwila, kabiji bantu baubilepo byepi pa mingilo ya kwa Yesu?