Kitango 25

Waubijile Lusa Muntu wa Mbumba

YESU ne baana banji ba bwanga bana byo bayile ku Ngalilea, nkuwa ya bintu byawama byo aubile yakumbene monse mu kibunji. Byambo bya mingilo yanji byaumvwanyikile mu muzhi umo mwajinga muntu wa mbumba. Shayuka wa michi aye Luka walumbulwile uno muntu amba wakumbene “mbumba.” Kuswezha kwa kino kikola kwatatwile pachepache konauna binungwa bya mubiji. Onkao mambo, uno muntu wa mbumba wajinga mu misongo ikatampe bingi.

Yesu byo afikile mu muzhi, muntu wa mbumba waishile kwi aye. Kwesakana na mwaambijile Mizhilo ya Lesa, muntu wa mbumba wabijikanga’mba, “Ne wa muzhilo, ne wa muzhilo!” kuba’mba bantu bakwabo babule kwiya kwipi ne kusambula kikola kyanji. Uno muntu wa mbumba waponene kinkuvumene ne kusashijila Yesu amba: “Nkambo, umvwe mukeba, mbukai.”

Uno muntu kine waitabijile mwi Yesu! Nangwa byonkabyo, kino kikola kyanji kyamulengejile kwikala bingi na bulanda! Ñanyi kintu Yesu kyo aubilepo? Umvwe mwajinga anweba inge mwaubile byepi? Yesu wamubijile lusa, watanyikile kuboko kwanji ne kukwata uno muntu ne kumwambila’mba: “Naswa. Bukwa.” Ponkapotu mbumba yanji yapwile.

Nanchi mwakonsha kutemwa muntu uji na lusa lwa uno mutundu kwikala mfumu wenu nyi? Jishinda Yesu jo aubijilemo na yewa muntu wa mbumba jitukwasha kuketekela’mba mu Bufumu bwanji, bungauzhi bwa mu Baibolo bukafika bwa kuba’mba: “Ukebobila lusa bayanji ne bakajilwa, Ne myeo ya bakajilwa ukeipulusha.” Yesu ukafikizha biji ku muchima wanji wa kukebesha kukwasha bantu bonse babena kumanama.

Saka akyangye ne kubuka yewa muntu wa mbumba, mwingilo wa kwa Yesu wasangajikile bingi bantu bavula. Mu kufikizha kwa bungauzhi bwa kwa Isaya, Yesu wabujile yewa muntu ye abukile’mba: “Kange ubulepo muntu nangwa umo ne.” Kepo amukambizhe’mba: “Yanga ukemweshe ku bañanga ne kupana bya bupe na mambo a kubukwa kobe monka mwaambila Mizhilo ya Mosesa, kuba amba kikale kishiino kwi abo.”

Uno muntu wasangalele bingi kya kuba kyamukatezhe ne kufya kintu kya kukumya kyamumwekejile. Uno mwanamulume byo afumineko, watatwile kubulañana ne kukumbanya konse konse kintu kyamwekele, kino kyalengejile Yesu kubula kutwela mu muzhi saka bamumona ku bantu. Bino Yesu waikele ku mpunzha kwa bunke ne bantu baishilenga kwi aye kufuma konse konse kabiji wibabukile bikola byabo byonse. Luka 5:12-16; Mako 1:40-45; Mateo 8:2-4; Bena Levi 13:45; 14:10-13; Salamo 72:13; Isaya 42:1, 2.

▪ Ñanyi bintu byakonsha kufumamo ku muntu uji na mbumba, kabiji muntu wa mbumba wabijikanga’mba ka?

▪ Muntu wa mbumba waambile’mba ka kwi Yesu, kabiji twakonsha kufunjilako ka ku byaubile Yesu?

▪ Muntu ye babukile wakankelwe byepi kukokela byamubujile Yesu, kabiji ñanyi bintu byafuminemo?

Kitango 26

Wabwelele mu Kapenama Muzhi mo Aikalanga

PA KIKYE kimye nkuwa ya kwa Yesu yakumbene konse konse ne bantu bavula bafumine ku mapunzha akwabo kwiya ko aikelenga. Nangwa byonkabyo, byo papichile moba amo wabwelele ku Kapenama kuya ja Kalunga ka Ngalilea. Kabiji nkuwa yaumvwanyikile mu muzhi yense amba wabwela ne bantu bavula baishile ko ajinga. Bafaliseo ne bafunjishi ba Mizhilo bafumine ku Yelusalema kwiya kwi aye.

Bantu bavula bakonkene mukachi, kya kuba kafwapo ne pashajile ne, bafikile ne mu kibelo. Pa kikye kimye, pamwekele kintu kya kukumya kimo. Kintu kyamwekele pa jije juba kyanemene bingi, mambo kitukwasha kuyuka’mba Yesu uji na bulume bwa kufumyapo kintu kilengela bantu kumanama ne kupana butuntulu bwa mubiji ku bonse bo akeba.

Yesu byo afunjishenga jibumba, banabalume bana baletele muntu wa kalepu ye batembekele pa musengele. Bakebele Yesu amba abuke mulunda nabo, bino na mambo a jibumba bakankelwe kutwela mu nzubo mo ajinga. Baumvwine bingi bibi ku muchima! Nangwa kyajinga bino, kechi bekilekele ne. Bakanjijile pa musemi ne kusabapo kabiji bazenzumwijile muntu wa kalepu pa musengele na pajinga Yesu.

Nanchi Yesu wibazhingijile byo baubile kino nyi? Ine! Bino aye wasekejile na mambo a lwitabilo lwabo. Waambijile muntu wa kalepu amba: “Mambo obe alekelwa.” Nanchi Yesu wakonsha kulekela bantu mambo nyi? Banembeshi ne Bafaliseo kechi mo mo bekimwenejile ne. Baambilenga mu michima yabo amba: “Mambo ka uno muntu o abena kwambila bino? Awe muntu ubena kuba mwenga Lesa. Kafwako wakonsha kulekela muntu mambo ne, kanatu Lesa yenka kwapwa.”

Yesu byo ayukile byo balangulukilenga, wibashikishe’mba: “Mambo ka o mubena kulangulukila bino bintu mu michima yenu? Nanchi kyepi kyapela, kwambila muntu wa kalepu amba ‘Mambo obe alekelwa’ nyi, inyi amba, ‘Imana ne kusenda musengele wobe uyenga’?”

Yesu byo apwishishe kwamba bino, waambijile jibumba kuvwangakotu ne bamulengulwilenga kuba’mba bayuke’mba uji na lūsa lwa kulekela bantu mambo pano pa ntanda kabiji amba ye muntu waya nkuwa. Byo aalulukile waambijile wa kalepu amba: “Imana, usende musengele wobe uyenga ku nzubo yobe.” Kabiji waimene ne kusenda musengele wanji ne kulupukamo bonse saka bamutala. Bonse bakuminye bingi ne kutumbijika Lesa saka bamba amba: “Tukyangye kumonapo kintu kya uno mutundu!”

Nanchi kechi mwamona’mba Yesu waambile pa bundengamambo pamo na kukolwa ne pa kulekelwa kwa mambo pamo na kwikala na butuntulu bwa mubiji nyi? Baibolo walumbulula’mba nsemi wetu mutanshi Adama, walengele mambo kabiji atweba bonse twaswana bundengamambo, ko kuba’mba tukolwa ne kufwa. Bino mu Bufumu bwa Lesa, Yesu ukalekela mambo bantu bonse batemwa Lesa ne kumwingijila kabiji ukapwisha bikola byonse. Kino kintu byo kikawamapo! Mako 2:1-12; Luka 5:17-26; Mateo 9:1-8; Loma 5:12, 17-19.

▪ Ñanyi kintu kya kukumya kyamwekele?

▪ Nanchi muntu wa kalepu waishile byepi kwi Yesu?

▪ Mambo ka atweba o twaikela bandengamambo, bino Yesu wanengezha byepi jishinda ja kwitulekelako mambo etu ne kuketupa butuntulu bwa mubiji bwalumbuluka?