Kitango 27

Waichile Mateo

BYO abukile muntu wa kalepu, Yesu wafumine mu Kapenama ne kuya ku Kalunga ka Ngalilea. Kabiji bantu bavula bamulondejile ne aye watatwile kwibafunjisha. Byo apichilenga, wamwene Mateo watelwanga’mba Levi saka aikala po basonkeshanga misonko. Yesu wamwichile’mba: “Ikala mwanami wa bwanga, undondelenga.”

Kyamweka Mateo wayukile mafunjisho a kwa Yesu byonkatu byajinga ba Petelo, Andeleo, Yakoba ne Yoano kimye kyo ebechile. Byonkatu byo kyajinga kwi abo, Mateo waswile luno lwito. Waimene ne kusha mingilo yanji ya kusonkesha ne kulondela Yesu.

Palutwe kacheche, Mateo watekele kijiilo kikatampe mu nzubo yanji kampe kusekelela pa byo bamwichile. Kabiji Yesu ne baana banji ba bwanga ne balunda mo baingijilanga kala na Mateo nabo bajinga ponka. Bano banabalume bebalengulwile bingi ku bakwabo Bayudea mambo batambwilenga misonko ya bantangi bena Loma bo bashikilwe. Kabiji bimye bimo kechi bajinga bakishinka ne, mambo batambulanga mali avula kufuma ku bantu kukila o basonkeshanga kimye kyonse.

Byo bamwene Yesu pa kino kijiilo na bano bantu, Bafaliseo bashikishe baana banji ba bwanga amba: “Mambo ka mufunjishi wenu o ajiila pamo na basonkeshi ne bandengamambo?” Yesu byo ebomvwine nakwamba bino, wakumbwile Bafaliseo amba: “Bantu batuntulu kechi bakeba shayuka wa michi ne, poso aba bakolwa. Yainga mukafunde kino mo kyatala: ‘Amiwa nkeba lusa kechi kitapisho ne.’ Naishijile bandengamambo kechi bantu baoloka ne.”

Kyamweka Mateo waichile bano basonkeshi ku nzubo yanji kuba’mba bomvwe kwi Yesu ne kubukwa ku mupashi. Onkao mambo, Yesu waikele nabo kuba’mba ebakwashe kwikala balunda bawama ne Lesa. Yesu kechi walengulwile bano bantu byonka byaubile Bafaliseo bemwenenga bene koloka ne. Pakuba aye byo ebobijile lusa, waikele wa kwibabuka ku mupashi.

Onkao mambo, lusa lwa Yesu lo amwesheshe bandengamambo kechi lwamwesheshe amba waswishishe bubi bwabo ne, bino lwajingatu pamo na lolwa lusa lo amwesheshe bantu bakolelwe. Kyakumwenako, vulukai kimye kyo atanyikile kuboko kwanji ne kukwata muntu wa mbumba ne kumwambila’mba: “Naswa. Bukwa.” Ne atweba saka tumwesha lusa ne kukwasha bantu bakajilwa kikatakata kwibakwasha ku mupashi. Mateo 8:3; 9:9-13; Mako 2:13-17; Luka 5:27-32.

▪ Mateo wajinga kwepi kimye Yesu kyo amumwene?

▪ Ñanyi mwingilo waingilanga Mateo, kabiji mambo ka bantu ba uno mutundu o bebalengulwijile ku bakwabo Bayudea?

▪ Bantu bamunyinyichile amba ka Yesu, kabiji wibakumbwile byepi?

▪ Mambo ka Yesu o aikajile pamo na bandengamambo?

Kitango 28

Bamushikishe pa Mambo a Kuzhikilwa na Nzala

PAPICHILE nobe mwaka umo kufuma kimye Yesu kyo atainwe ku Kijiilo kya Lupitailo mu 30 C.E. Pa kyokya kimye saka papita ne bañondo bavula kufuma po bamukashijile mu kaleya Yoano Mubatizhi. Nangwa kya kuba wasakishe bingi amba baana banji ba bwanga balondelenga Kilishitu, kechi bonse baubile kino ne.

Baana ba bwanga bamo ba kwa Yoano ye bakashile baishile kwi Yesu ne kumushikisha’mba: “Mambo ka atweba ne Bafaliseo o tuzhikilwa na nzala pakuba baana benu ba bwanga kechi bazhikilwa na nzala ne?” Bafaliseo bazhikilwanga na nzala jibiji mu mulungu mambo kino kyajinga kisho kya bupopweshi bwabo. Kabiji baana ba bwanga ba kwa Yoano kampe nabo balondejilenga kyonka kino kisho. Kampe bazhikilwanga na nzala na mambo a kujila Yoano ye bakashile kabiji bakuminye bingi baana ba bwanga ba kwa Yesu byo babujile kwikala na bulanda.

Yesu wibashikishe’mba: “Nanchi balunda ba musongoshi bakonsha kujila umvwe kya kuba musongoshi bakiji nanji nyi? Bino juba jikafika kimye musongoshi kyo bakamufumyako kwiabo, ne abo po po bakazhikilwa na nzala.”

Baana ba bwanga ba kwa Yoano bafwainwe kuvuluka kimye Yoano kyo aambile pe Yesu amba ye Musongoshi. Onkao mambo, Yesu byo ajinga nabo, Yoano nangwatu baana ba bwanga ba kwa Yesu bayukile’mba akya kimye kechi kyajinga kimye kya kuzhikilwa na nzala ne. Palutwe kacheche, Yesu byo afwile, baana banji ba bwanga po po bajijile ne kuzhikilwa na nzala. Bino byo asangukile ne kuya mwiulu, kechi batwajijile kujila ne kuzhikilwa na nzala ne.

Kabiji Yesu waingijishe bino byakumwenako amba: “Kafwako muntu wakonsha kutupika kikamba kya katataka pa kivwalo kya kala ne, mambo kikamba kya katataka kyakonsha kutondobola kivwalo kya kala ne patabuka pa bayilako. Kabiji bantu kechi balonga binyu bya bintonto mu mafukuta a biseba bya kala ne. Mambo umvwe bauba bino, mafukuta asabika ne binyu bichika ne konaika. Bino bantu balonga binyu bya bintonto mu mafukuta a katataka.” Nanchi bino byakumwenako byaesakana byepi na kuzhikilwa na nzala?

Yesu waingijishe bino byakumwenako kukwashishamo baana ba bwanga ba kwa Yoano Mubatizhi kumvwisha kuba’mba kafwako muntu nangwa umo wafwainwe kuketekela baana banji ba bwanga kulondela bisho bya kala bya Bayudea nabiji kya kuzhikilwa na nzala ne. Kechi waishile na kutupika ne kuswisha mpopwelo yatama kutwajijila ne. Bena Kilishitu kechi bafwainwe kulondela bisho bya Bayudea bya bantu bajingako pa kyo kya kimye ne. Kechi kyafwainwe kutupika kikamba kya katataka pa kivwalo kya kala ne, nangwa kulonga binyu bya bintonto mu fukuta wa kala ne. Mateo 9:14-17; Mako 2:18-22; Luka 5:33-39; Yoano 3:27-29.

▪ Bañanyi bazhikilwanga na nzala, kabiji baubijilenga ka kino?

▪ Mambo ka baana ba bwanga ba kwa Yesu o babujile kuzhikilwa na nzala byo ajinga nabo, kabiji palutwe kacheche kuzhikilwa na nzala kwapwile byepi?

▪ Ñanyi byakumwenako Yesu byo aingijishe kabiji byalumbulwilenga ka?