Kitango 31

Bachimawinenga Mitwe ya Wichi pa Juba ja Sabado

YESU ne baana banji ba bwanga bafuminemo mu Yelusalema ne kubwela ku Ngalilea. Kyajinga kimye kya mwela wa mebele kabiji mu majimi wichi waubile mituntu. Baana ba bwanga bafwile nzala. Onkao mambo, batatwile kuchimauna mitwe ya wichi ne kuja. Bino na mambo a kuba jajinga juba ja Sabado, bebamwene byo baubilenga kino.

Bantangi ba bupopweshi mu Yelusalema bakebelenga kwipaya Yesu na mambo a kuzhilulula juba ja Sabado. Byonkabyo, pa kikye kimye Bafaliseo bamupelemo mambo. Bamwambijile’mba: “Tala! Baana bobe ba bwanga babena kuba kintu kyafwainwa kubula kubiwa pa juba ja Sabado.”

Bafaliseo baambilenga amba kuchimauna mitwe ya wichi ne kwiivinga mu maboko ne kuja ke kunowa ne kupuula. Pano bino, mo balumbulwilanga mingilo yafwainwe kwingijiwa pa juba ja Sabado, kwalengejile jino juba kwikala kisendwa. Juba ja Sabado jafwainwe kwikala juba ja kusangalala ne kwikoseshamo ku mupashi. Onkao mambo, Yesu waingijishe byakumwenako bya mu Binembelo kumwesha’mba mo balumbulwilanga mwatala muzhilo wa juba ja Sabado kechi mo mwafuukwijile Yehoba Lesa ne.

Yesu waambile’mba kimye Davida ne banabalume bo ajinga nabo kyo bafwile nzala, batwelele mu tente wa lusambakeno ne kuja bashinkwa bakupana ku meso a Lesa. Bano bashinkwa bebafumisheko ku meso a Yehoba ne kwibapingizhapo na bashinkwa bakwabo, kabiji bebalamijile bañanga kuba’mba baje. Nangwa kya kuba baubile kino, Davida ne banabalume bo ajinga nabo kechi bebapelemo mambo pa kuja bano bashinkwa ne.

Yesu waingijishe kyakumwenako kikwabo amba: “Kechi mwatangapo kala mu Mizhilo amba mu moba a Sabado, bañanga baingijilanga mu nzubo ya Lesa bazhilulwilenga juba ja Sabado kwa kubula kwibapamo mambo nenyi?” Pa juba ja Sabado, bañanga baipayanga banyama ne kwingila mingilo ikwabo ya ku nzubo ya Lesa ya kunengezha bitapisho bya banyama! Yesu waambile’mba: “Kine nemubula namba muntu wakila nzubo ya Lesa uji pano.”

Pa kujimunako Bafaliseo, Yesu watwajijile kwamba’mba: “Umvwe mwajikumvwisha mwatala kino amba, ‘Amiwa nkeba lusa kechi kitapisho ne,’ inge kechi mwazhachisha babula mambo ne.” Kepo apezhezheko kwamba’mba: “Mambo Nkambo wa Sabado ke Mwana muntu.” Nanchi Yesu watazhizhe mu ka pa kwamba bino? Yesu waambilenga pa bukalama bwanji bwa mutende bwa Bufumu bwa myaka kiumbi.

Papita ke myaka 6,000, bantu bakiyanda na mambo a buzha bwibakwata Satana Diabola muji bumbanzhi ne nkondo bibena kubiwa pa juba pa juba. Pano bino, juba jikatampe ja Sabado ja bukalama bwa Kilishitu jikekala juba ja kukokoloka ku lumanamo lonse ne bya malwa byonse. Mateo 12:1-8; Bena Levi 24:5-9; 1 Samwela 21:1-6; Kubala 28:9; Hoseya 6:6.

▪ Ñanyi mambo o bapelemo baana ba bwanga ba kwa Yesu, kabiji Yesu wakumbwile byepi?

▪ Ñanyi kilubo kyajinga na Bafaliseo Yesu kyo asolwele?

▪ Mu ñanyi jishinda Yesu mo aikela “Nkambo wa Sabado”?

Kitango 32

Ñanyi Kintu Kyawama Kuba pa Juba ja Sabado?

JAJINGA juba jikwabo ja Sabado Yesu po atwelele mu nshinagoga wajinga kwipi na Kalunga ka Ngalilea. Mwajinga ne mwanamulume wajinga na kuboko kwapapa. Banembeshi ne Bafaliseo bamutajilenga bingi Yesu amba bamone umvwe usakubuka uno muntu nangwa ne. Kepo bamushikishe’mba: “Nanchi kijitu bulongo kubuka muntu pa juba ja Sabado nyi?”

Bantangi ba bupopweshi bwa Bayudea baitabijile’mba kubuka muntu pa juba ja Sabado kwafwainwe kubiwatu umvwe bumi bwa muntu buji mu kizumba. Kyakumwenako, bafunjishanga amba pa juba ja Sabado kechi kyafwainwe kolola kikupa nangwa kukasa ku kulu nangwa ku kuboko kwa muntu wizhongomona ne. Onkao mambo, banembeshi ne Bafaliseo bashikishenga Yesu kukeba mwakumutaina na mambo.

Nangwa byonkabyo, Yesu wayukile byo balangulukilenga. Pa kimye kimotu wayukile’mba kechi bakwatakenye mwatajile binembelo pa mambo a mingilo yo bakainye yazhilululanga juba ja Sabado ne. Onkao mambo, Yesu waambijile awa muntu wajinga na kuboko kwapapa amba: “Iya kuno wimane pakachi.”

Kabiji byo aalulukile ne kutala banembeshi ne Bafaliseo, Yesu wibashikishe’mba: “Ñanyi mwi anweba uji na mukooko uba inge waponena mu kimbo pa juba ja Sabado ubula kumutuntulamo?” Byo kiji kuba’mba mukooko mo mo bamwenanga mali, kechi bakonsheshe kumuleka kukisha mu kimbo ne, mambo kampe wakonsheshe kunyana ne kwibalengela kubula kumwenamo nsubu. Kabiji Binembelo byaamba’mba: “Muntu waoloka utesha muchima ne ku mweo wa nyama wanji.”

Yesu wanungilepo amba: “Muntu wanema kukila mukooko! Kijitu bulongo kuba kintu kyawama pa juba ja Sabado.” Bantangi ba bupopweshi kechi bakonsheshe kukana ino ngesakenyo, ndumbulwilo imwesha lusa ne, kabiji baubiletu nzoo.

Byo azhingijile ne byo kyamufichile ku muchima na mambo a kukosa kwa michima yabo, Yesu wakenkentele. Kepo aambijile awa mwanamulume amba: “Tanyika kuboko kobe.” Ne aye wikutanyikile kabiji kwakosele ne kukosa.

Mu kifulo kya kusekela amba uno mwanamulume kuboko kwanji kwakosa, Bafaliseo ponkapotu balupukile pangye na kumvwañana na baana ba bwanga ba kwa Heloda kuba’mba bepaye Yesu. Mu kino kipanyi mwajinga ne ba mu bupopweshi bwa Basadusea. Kino kipanyi ne Bafaliseo kechi baumvwañananga ne, bino bakwatankene bingi mu kulengulula Yesu. Mateo 12:9-14; Mako 3:1-6; Luka 6:6-11; Byambo bya Mana 12:10; Kulupuka 20:8-10.

▪ Nanchi bintu byajinga byepi kimye Yesu ne Bantangi ba bupopweshi bwa Bayudea kyo basambakene?

▪ Ñanyi bintu Bantangi ba bupopweshi bwa Bayudea byo baitabijile pa mambo a kubuka muntu pa juba ja Sabado?

▪ Ñanyi kyakumwenako Yesu kyo aingijishe kukainamo ndangulukilo yabo yatama?