Kitango 36

Lwitabilo Lukatampe lwa Mukulumpe wa Bashilikale

YESU waambile Jashi janji ja pa Mutumba saka aingilako kala mwingilo wanji wa kusapwila. Ko kuba’mba kwashajiletu mwaka umo ne bañondo batanu na bana nangwa kukilapo kuba’mba apwishe mwingilo wanji pano pa ntanda.

Yesu watwelele mu muzhi wa Kapenama, muzhi mo aubijile mingilo yanji. Mu uno muzhi bakulumpe ba Bayudea baishile kwi aye na kumushikisha. Bebatumine ku mukulumpe wa bashilikale wa bena Loma wajinga wa mu kisaka kikwabo, wabujile kwikala wa mu kisaka kya Bayudea.

Kalume wa mukulumpe wa bashilikale ye atemenwe wajinga pepi kufwa mambo wakolelwe bingi, kabiji wakebele Yesu amba abuke kalume wanji. Bayudea bamusashijileko uno mukulumpe wa bashilikale amba: “Anweba yenu mwafwainwa kumukwasha, mambo watemwa bingi kisaka kyetu kabiji aye mwine ye witushimikijile nshinagoga.”

Kwa kubula nangwa kutaya kimye ne, Yesu wayile na bano banabalume. Nangwa byonkabyo, byo banangijilenga kwipi, mukulumpe wa bashilikale watumineko balunda nanji na kumwambila’mba: “Mwane amiwa kechi nafwainwa kuba amba anweba mutwele mu nzubo yami ne. Na mambo a kino kyo kyo naji kubujila kwiya ko muji.”

Abino byambo bya mukulumpe wa bashilikale wakambizhanga bakwabo byamwesheshe byo epelwile! Bino kampe naye walangulukilenga pe Yesu mambo wayukile amba kisho kyakainye Bayudea kubula kupwanañana na babula Bayudea. Ne Petelo waambile amba: “Mwayukishatu bulongo amba kechi kyafwainwa Muyudea kwinunga nangwa kwisamba na muntu wa mu kisaka kikwabo ne.”

Kampe na mambo a kubula kukeba Yesu kumanyikwa na mambo a kuzhilulula akya kisho, uno mukulumpe wa bashilikale waambijile balunda nanji kumwambila’mba: “Bino ambaitu byambo ne kalume wami usakubukwa. Mambo nji na bakulumpe bantangijila, ne amiwa nji na bashilikale bo ntangijila, ñambila umo namba, ‘Yanga!’ naye kaye, ku mukwabo namba, ‘Iya!’ naye waiya, kabiji ku kalume wami namba, ‘Uba kikye!’ naye wikyuba.”

Yesu byo aumvwine kino, wakuminye bingi. Waambile’mba: “Kine nemwambila namba: Kafwako nangwa umo mu bena Isalela ye natanapo na lwitabilo lukatampe nobe luno ne.” Byo abukile kalume wa mukulumpe wa bashilikale, Yesu waingijishe kino kimye kwamba pa lwitabilo lwa bantu babula Bayudea byo bakobilwa bibusa byakaine Bayudea babujile lwitabilo.

Yesu waambile’mba: “Bavula bakeya kufuma ku musela ne ku muzhika ne kwikala ku tebulu na Abalahama, Izaka ne Yakoba mu Bufumu bwa mwiulu; pakuba baana ba mu bufumu, Lesa ukebataya pangye mu mfishi. Mo mo bakajilanga ne kushenka ku meno.”

‘Baana ba mu bufumu Lesa bo akataya pangye mu mfishi’ ke Bayudea bakisemwa bakaine lwito lutanshi lo bebapele lwa kulamina pamo na Kilishitu. Abalahama, Izaka ne Yakoba babena kwimenako lunengezho lwa Bufumu bwa Lesa. Onkao mambo, Yesu waambilenga pa bantu ba mu bisaka bikwabo pa byo bakebatambwila ne kwikala ku tebulu mwiulu ko kuba’mba “mu Bufumu bwa mwiulu.” Luka 7:1-10; Mateo 8:5-13; Byubilo 10:28.

▪ Mambo ka Bayudea o basashijileko mukulumpe wa bashilikale wa mu kisaka kikwabo?

▪ Ñanyi kintu kyalengejile mukulumpe wa bashilikale kubula kutambwila Yesu mu nzubo yanji?

▪ Yesu watazhizhe mu ka mu byambo bya kupezhako byo aambile?

Kitango 37

Yesu Wapwishishe Bulanda bwa Mwanamukazhi Wafwijilwe

PANYUMA ya kubuka kalume wa mukulumpe wa bashilikale, Yesu wayile ku Naina palepele makilomita 32 kufuma ku Kapenama. Baana banji ba bwanga ne jibumba jikatampe jamulondejilenga. Kyamweka kyajinga kimye kya mabanga byo banangijilenga kwipi na Naina. Bataine bantu balupwilenga muntu wafwa. Wajinga kalombwana wafwile ye batwajilenga na kuzhika.

Kino kintu kyalengejile inanji kwikala bingi na bulanda mambo wajinga mwanamukazhi wafwijilwe kabiji uno ye wajingatu mwananji yenka. Kimye kyafwile mwatawanji, kyamutekeneshanga ke mwananji yenka ye ashajile nanji. Kabiji mu mwananji mo mo akinkile manungo. Bino pa kikye kimye kechi kwajinga muntu wakumutekenesha ne. Bulanda bwanji bwabayijileko kimye bantu ba mu muzhi kyo bamushinjikinyeko na kuzhika mwananji.

Yesu byo amwene yewa mwanamukazhi, kyamwikele bingi ku muchima na mambo a bulanda bukatampe bwajinga na uno mwanamukazhi. Onkao mambo, na kifyele bino kwa kubula kuchina waambijile mwanamukazhi byambo bya kumulengela kwikala na luketekelo amba: “Kileke kujila.” Kintu kyo aubile kyalengejile jibumba kutako bingi muchima. Ponkapo byo afwenyenye kwipi ne kukwata ku makila po basendejile mubiji, aba beasendele baimene. Kyamweka bonse basakilenga kuyuka kintu kyo akebelenga kuba.

Ibyo kuba’mba aba bamulondejilenga bamwene Yesu saka abuka bantu bavula bajinga na bikola mu jishinda ja kukumya. Bino kyamweka kechi bakimumwenepo kala saka asangula muntu wafwa ne. Nanchi wakonsheshe kusangula uno muntu nyi? Byo aambile pa uno mubiji, Yesu wakambizhe amba: “Nsongwalume, nakwambila namba: Imana!” Ne uno muntu wabukile ne kwikala! Watatwile kwamba kabiji Yesu wamupaine kwi inanji.

Bantu byo bamwene amba umo nsongwalume ke mumi, batatwile kwamba’mba: “Ngauzhi mukatampe wamweka mukachi ketu.” Bakwabo baambilenga’mba: “Lesa wavuluka bantu banji.” Ponkapotu nkuwa ya byo aubile yakumbene mu Yudea monse ne mu mpunzha onse.

Yoano Mubatizhi wakijinga mu kaleya, kabiji wakebelenga kuyukilapo byavula pa mingilo yaingijilenga Yesu. Baana ba bwanga ba kwa Yoano bamubujile pa bino bya kukumya. Yoano waubilepo ka? Luka 7:11-18.

▪ Ñanyi kintu kyamwekele kimye Yesu kyo anangijilenga kwipi na Naina?

▪ Yesu wiumvwine byepi na byo amwene, kabiji waubilepo ka?

▪ Nga bantu baubilepo byepi pa kya kukumya kyaubile Yesu?