Kitango 40

Lufunjisho Luji mu Kuba Lusa

KYAMWEKA Yesu wakijinga mu Naina muzhi mo asangwijile mwana wamulume wa mwanamukazhi wafwijilwe nangwa kampe wafwakashijilenga muzhi wajinga pepi. Mufaliseo wa jizhina ja Shimona wakebeshe bingi kumona muntu waubilenga ino mingilo ya kukumya. Onkao mambo, waichile Yesu kuba’mba aje nanji.

Yesu byo amwene’mba akya kyajinga kimye kyafwainwa kya kufunjishamo batainwepo, waswile luno lwito byonkatu byo aswile alwa lwa kuja na basonkeshi ne bandengamambo. Pano bino, byo atwelele mu nzubo ya kwa Shimona, Yesu kechi bamutambwijile bulongo mwayijile kisho kyo batambwilangamo benyi ne.

Makwabilo atwanga bingi kyuya ne kuba lukungu na mambo a kwenda mu mikwakwa ya lufukuchi. Kabiji pa kutambwila benyi kyajinga kisho kya kwibovwa ku maulu na mema a munyango. Bino Yesu byo afikile, kechi bamovwele ku maulu ne. Kabiji kechi bamutambwijile na kumufyompa monka mo baubilanga na benyi ne. Kabiji kechi bamunengezhezhe manyi a kumushinga ku mutwe ne.

Kimye kyo bajiilenga ne benyi saka baikala ku tebulu, mwanamukazhi umo ye babujile kwitako watwelele kishinshi mu kibamba mo bajinga. Uno mwanamukazhi bamuyukile mu muzhi amba wajinga na byubilo byatama. Kyamweka waumvwine mafunjisho a kwa Yesu kuvwangakotu ne lwito lwa kwita ‘bonse banemenwa kwiya kwi aye amba ebakokoloshe.’ Byo atundaikilwe na bintu byo amwene ne kumvwa, wakebele kwajinga Yesu.

Uno mwanamukazhi wapichijile kunyuma ya kwa Yesu ku tebulu ne kufukama ku maulu anji. Mipolo yanji byo yaponejile ku maulu anji, wiishimwine na nsuki yanji. Watolele ne musashi wa manyi anunka bulongo kabiji panyuma ya kumufyompa ku maulu wiashingile manyi. Shimona byo amwene kino kechi watemenwe ne. Waambile mu muchima wanji amba: “Uno muntu, umvwe waji ngauzhi, inge wayuka biji uno mwanamukazhi ubena kumukwata kuba amba ndengamambo.”

Yesu byo ayukile byo alangulukilenga, wamwambijile’mba: “Shimona, kuji kintu kyonkeba kukubula.”

Ne aye waambile’mba: “Mufunjishi, mbulai!”

Yesu watatwile kwamba’mba: “Bantu babiji bajinga na bikoloto na muntu umo wibakongweshe; umo wajinga na kikoloto kya mandenali 500, bino mukwabo wajinga na kya makumi atanu. Byo babujile mali a kumubwezhezha, wibalekejileko mambo bonse. Onkao mambo, pa bano bonse babiji, wepi ukakilapo kumutemwa?”

Shimona wakumbwile kampe na mulanguluko wa kumwesha nobe bwipuzho bo bamushikishe kechi bwayijilemo ne, amba: “Amiwa nalanguluka amba awa ye alekejileko avula.”

Yesu wamwambijile’mba: “Waamba bulongo.” Byo aalulukijile ku mwanamukazhi waambijile Shimona amba: “Wamumona uno mwanamukazhi nyi? Naji kutwela muno mu nzubo yobe; bino obewa kechi waji kumpapo mema akowa ku maulu ami ne. Pakuba uno mwanamukazhi waji kuzobesha maulu ami na mipolo yanji ne kwiashimuna na nsuki yanji. Kechi waji kumfyompa ne; bino uno mwanamukazhi kufumatu kimye kyo naji kutwela muno, kechi wa kwikalatu kwa kubula kufyompa ku maulu ami ne. Obewa kechi waji kunshinga manyi ku mutwe wami ne, bino uno mwanamukazhi waji kushinga manyi anunka bulongo ku maulu ami.”

Awa mwanamukazhi wamwesheshe kulapila kwakine ku byubilo byanji byatama bya kala. Yesu wapezhezheko kwamba’mba: “Na mambo a kino, wamwesha butemwe bukatampe. Bino umvwe muntu walekelwa mambo acheche umwesha butemwe bucheche.”

Yesu kechi wasekejile mu byubilo byatama nangwa kwibiswisha ne. Bino kino kintu kyamwekele kyasolwele byo omvwina lusa bantu balenga mambo mu bwikalo bwabo, bino bamwesha’mba balapila pa mambo o balengele ne kwiya kwi Kilishitu amba ebakwashe. Pa kutekenesha uno mwanamukazhi, Yesu wamwambijile amba: “Mambo obe alekelwa. . . . Lwitabilo lobe lwa kupulusha; yanga mu mutende.” Luka 7:36-50; Mateo 11:28-30.

▪ Yesu bamutambwijile byepi kwi Shimona?

▪ Ñanyi wakebelenga Yesu kabiji mambo ka?

▪ Ñanyi kishimpi Yesu kyo aambile, kabiji wikingijishe byepi?

Kitango 41

Kintu Kyalengejile Mapata

PANYUMA ya kumutambwila ku nzubo ya kwa Shimona, Yesu watatwile lwendo lwanji lwa bubiji lwa kusapwila mu Ngalilea. Pa lwendo lwanji lutanshi ku ino nyaunda, wayijile pamo na baana banji ba bwanga batanshi ba Petelo, Andeleo, Yakoba ne Yoano. Bino pa kikye kimye, batumwa 12 ne banabakazhi bamo bayijile pamo nanji. Bano banabakazhi bajinga ba Maliya Mangadala, Susana ne Yoana wajinga na mwatawanji wajinga kalama wa Mfumu Heloda.

Mwingilo wa kwa Yesu byo abayijilengako, ne mapata nao pa mambo a mwingilo wanji abayijilengako. Yesu bamuletejile mwanamulume ye bakatazhanga ku ndemona wajinga mpofu kabiji kechi waambanga ne. Yesu byo amubukile kuba’mba baleke kumumanyika ku ndemona ne kutatula kwamba ne kumona, jibumba jakuminye bingi. Jatatwile kwamba’mba: “Nanchi uno kechi ye mwana Davida nenyi?”

Bantu bavula bakonkenejile ku nzubo kwaikelenga Yesu kya kuba aye ne baana banji ba bwanga bakankelwe ne kuja. Kununga pa boba balangulukilenga’mba wakonsheshe kwikala “Mwana Davida,” pajinga ne banembeshi ne Bafaliseo bafumine ku Yelusalema kwiya na kumulengulula. Balongo banji Yesu byo baumvwine kiwowo ko ajinga, baishile amba bamukwate. Mambo ka o bakebejile kumukwata?

Nangwatu bankasanji Yesu kechi bakimwitabijile’mba Mwana Lesa ne. Kabiji kiwowo ne kutoboka kwajingako pa mambo a kwa Yesu kechi kwayijilemo ne, mambo bamumwenenga byo akomenenga mu Nazala. Onkao mambo, abo balangulukile’mba Yesu wavulañana. Baambilenga’mba: “Wakonya.” Kabiji bayile amba bakamukwate ne kumusenda.

Kishinka ke kya kuba’mba Yesu wabukile awa muntu wajinga na ndemona. Banembeshi ne Bafaliseo kechi bakonsheshe kukana akya kyamwekele ne. Onkao mambo, pa kulengulula Yesu babujile bantu amba: “Uno muntu upanga bandemona na bulume bwa Belezebuba, mukulumpe wa bandemona.”

Byo ayukile milanguluko yabo, Yesu waichile banembeshi ne Bafaliseo ne kwibambila’mba: “Bufumu bwakonsha konaika umvwe bene benabo bealukamo kabiji muzhi nangwa nzubo yonaika umvwe bene mulwabo bealukamo. Byonkabyo, umvwe Satana upangamo Satana, ko kuba amba wialukilamo mwine; umvwe kiji bino, nga bufumu bwanji bukakosa byepi?”

Kine kino kibashinkile bulaka! Byo kiji kuba’mba Bafaliseo baambanga’mba bajinga na bantu ba mu kipanyi kyabo bapanganga bandemona, Yesu wibashikishe amba: “Kabiji umvwe amiwa mpanga bandemona na bulume bwa Belezebuba, nga baana benu bapanga bandemona na bulume bwa kwa ñanyi?” Mu jishinda jikwabo, mambo o bapelengamo Yesu, nabo bafwainwe kufwa nao. Yesu wibajimwineko’mba: “Bino umvwe mpanga bandemona na bulume bwa mupashi wa Lesa, ko kuba amba Bufumu bwa Lesa bwaiya kwi anweba kwa kubula kuyuka.”

Pa kulumbulula’mba bulume bwanji bwa kupangamo bandemona bwakila bwa kwa Satana, Yesu waambile’mba: “Nanchi muntu wakonsha kutwela mu nzubo ya kilobo ne kumwangata bipe kwa kubula patanshi kukimukasa nyi? Inge wauba bino po po akonsha kwangata bipe bya mu nzubo yanji. Yense wabula ku lubaji lwami ye mulwanyi wami ne aye ubula kukonkanya pamo ne amiwa upalañanya.” Bafaliseo kine bamushikilwe Yesu ne kumwesha’mba bajinga bamingilo ba kwa Satana. Bapalañenyenga bena Isalela kufuma kwi Yesu.

Onkao mambo, Yesu wajimwine bamingilo ba kwa Satana bamushikilwe amba, “awa unena mupashi kechi ukalekelwa mambo ne.” Yesu walumbulwile’mba: “Muntu yense unena Mwana muntu, mambo anji akalekelwa, pakuba awa ukanena mupashi wazhila mambo anji kechi akalekelwa mu buno bwikalo nangwa mu bukeya ne.” Aba banembeshi ne Bafaliseo balengele mambo a kubula kulekelwa byo baambilenga mu bujimbijimbi amba bya kukumya byaubilwenga na lutangijilo lwa mupashi wazhila wa Lesa amba byafuminenga kwi Satana. Mateo 12:22-32; Mako 3:19-30; Luka 8:1-3; Yoano 7:5.

▪ Lwendo lwa bubiji lwa kwa Yesu lwa ku Ngalilea lwapusene byepi na lutanshi?

▪ Mambo ka balongo ba kwa Yesu o bakebejile kumukwata?

▪ Bafaliseo baesekele byepi kulengulula bya kukumya byaubile Yesu, kabiji Yesu wibazhindamikilepo byepi?

▪ Ñanyi mambo alengele Bafaliseo kabiji mambo ka?