Kitango 44

Wakainye Luvula

PA JOJA juba Yesu waubile bintu byavula kuvwangakotu ne kufunjisha bantu bavula bajinga ku kitulu ne kulumbulwila baana banji ba bwanga mwatajile bishimpi. Byo kyafikile mabanga, wibambijile’mba: “Twayai twabukile ku bushiya.”

Ku bushiya bwa Kalunga ka Ngalilea na ku musela kwajinga mpunzha yo batelanga’mba Ndekapoli, kufuma ku kyambo kya Kingiliki kya deʹka, kilumbulula amba “jikumi” ne poʹlis, kilumbulula amba “muzhi.” Mu mizhi ya Ndekapoli mo mwavujile bisho bya Bangiliki nangwa kya kuba mo mwaikalanga Bayudea bavula. Bino mu ino mizhi, Yesu kechi waubijilemo mingilo yavula ne. Nangwatu pa kikye kimye, byonka byo tusakumona, kechi bamuswishishe kwikala kokwa kimye kyabaya ne.

Yesu byo aambijile baana banji ba bwanga kwabukila ku bushiya, bayile nanji mu bwato. Bino bayile saka bebamona ku bantu. Bantu bakanjijile mu mato abo ne kuya nabo. Kechi palepeshe ne. Kalunga ka Ngalilea mubula kajinga makilomita 21 ne mu bwipi makilomita 12.

Yesu wakokele bingi. Onkao mambo, byo bayilenga, aye walaajile mu bwato kunyuma saka ashamina pa mushamino. Batumwa bavula bayukile bingi kuvuwa mato mambo baingijile pa kimye kyabaya mwingilo wakukwata masabi pa Kalunga ka Ngalilea. Onkao mambo, batumwa bo bavuwilenga bwato.

Luno lwendo kechi lwibapelejile ne. Na mambo a kyuya kyafuminenga pa kalunga ka mema ne mwela wafuminenga ku mitumba yajinga pepi, kipupu kikatampe kyalengele luvula wakatazha pa kalunga ka mema. Akino kyo kyamwekele. Bwato bwakebelenga kuloba na mambo a manyaki apuminengako ne mema atwelelenga mukachi. Bino pa kikye kimye, Yesu saka alaala!

Aba banabalume bayukile kuvuwa bwato baesekele kwibuzhalulula. Akye kechi kyo kyajinga kimye kitanshi kutalañana na luvula ne. Bino pa kikye kimye, bakankelwe bya kuba. Byo baakaminwe na mambo a bumi bwabo, babushishe Yesu ne kumwambila’mba: ‘Mufunjishi, anweba ne kwituta muchima nenyi?’ Tubena kuloba!’ ‘Tupulushai!’

Yesu byo abukile, wakainye luvula ne kalunga ka mema amba: “Zhindama!” Luvula wikilekele ne pa kalunga ka mema paubile ne nzoo. Byo aalulukijile ku baana ba bwanga wibashikishe’mba: “Mambo ka o mwaubila moyo? Nanchi mukyangye kwikala na lwitabilo nyi?”

Na mambo a kino, baana ba bwanga baakaminwe bingi kabiji beambijilenga mulwabo amba: “Nanchi uno muntu ye ñanyi? Mambo luvula ne kalunga ka mema byamukokela.”

Yesu wamwesheshe bulume bo aji nabo. Byo kitutekeneshapo kuyuka’mba tuji na Mfumu uji na bulume pa mvula, luvula ne bintutu bikwabo! Kabiji kimye kyo akatatula kulama ino ntanda mu Bufumu bwanji, bantu bonse bakazhikijilwa ku bintu bileta moyo.

Luvula byo alekele, Yesu ne baana banji ba bwanga bafikiletu bulongo ku kitulu. Kampe mato akwabo kechi aonaikile na luvula ne, kabiji ano mato abweleletu bulongo kwabo. Mako 4:35–5:1; Mateo 8:18, 23-27; Luka 8:22-26.

▪ Ndekapoli ye mu ka, kabiji waikajile kwepi?

▪ Ñanyi bintu byalengejile luvula pa Kalunga ka Ngalilea?

▪ Baana ba bwanga baubile byepi byo bakankelwe kwipulusha abo bene?

Kitango 45

Muntu Wabujile Mwana wa Bwanga

YESU byo afikile ku kitulu wamwene kintu kileta moyo! Bantu babiji bashinta baishilenga kwi aye kufuma ku bilende. Bajinga na bandemona. Byo kyajinga kuba’mba umo washinchile bingi kukila mukwabo mambo bamukatazhanga ku ndemona pa kimye kyabaya, ye ye ateleko muchima.

Pa kimye kyabaya, uno muntu waikalanga ku bilende kwa kubula kuvwala. Bufuku ne mute wabijikanga ne kwichibaula na mabwe. Washinchile bingi kya kuba kafwako muntu nangwa umo wapitanga mu joja jishinda ne. Bamukasanga minyololo ku maboko ne ku maulu bino aye wiichibanga. Kabiji kafwako muntu nangwa umo wajinga na bulume bwa kumufomona ne.

Uno muntu byo afikile kwi Yesu ne kufukama, ndemona wamukatazhanga wamulengejile kubijika’mba: “I ki ka kyo nsakuba nenu anweba Yesu, Mwana Lesa Mwine Wakila? Nemukambizha mwi Lesa namba kange munkabishe ne.”

Yesu wamwambijile’mba: “Obewa ndemona, fumamo mu uno muntu.” Kepo Yesu amushikishe’mba: “Jizhina jobe wi ñanyi?”

Aye wamukumbwile’mba: “Jizhina jami ne Nzhita mambo twavula.” Bandemona basekela bingi kumona bantu mo batwela saka bayanda, kampe ne kwibalengela kwikala na moyo. Byo bafikile kwi Yesu, bamusashijile’mba kange ebatumine mu kalengwa kabula kupela ne. Twamona’mba Yesu uji na bulume bukatampe. Washinjile bandemona bashinta. Kino kisolola amba bandemona bayuka’mba Lesa ukebataya mu kalengwa kabula kupela ne kwibazhachishisha pamo na ntangi wabo aye Satana Diabola.

Jitanga ja bankumba 2,000 jajinga pepi jajiilenga pa mutumba. Onkao mambo, bandemona bamwambijile’mba: “Tutumai mu bankumba kuba amba tukatwele mwi abo.” Bandemona basekela bingi mu kumanyika bilengwa. Yesu byo ebaswishishe kutwela mu bankumba, bonse 2,000 bakunkulukile lubilo ne kuketaya mu kalunga ka mema.

Aba bajishishenga bankumba byo bamwene kino, banyemene ne kuya na kubula bajinga mu muzhi ne mu mapunzha akwabo. Kepo bantu baishile na kumona kino kyamwekele. Byo bafikile bataine muntu mwafumine bandemona saka avwala ne kulubuluka muchima kabiji saka aikala ne Yesu!

Aba bamwene kino bashimikizhe byabukilwe yewa muntu. Kabiji babujile bantu byafwile bankumba. Bantu byo baumvwine kino, baubile bingi moyo kabiji basashijile Yesu kuba’mba ayenga. Onkao mambo, walondejile byo bamubujile ne kukanjila mu bwato. Awa muntu mwalupukile bandemona wasashijile Yesu amba ayenga nanji. Bino Yesu wamwambijile’mba: “Yanga ku nzubo ku balongo bobe, ne kwibabula byonse bintu bya kubila Yehoba ne lusa lo akumwesha.”

Yesu javula wakambizhanga bantu bo abukanga kubula kubulapo muntu nangwa umo ne, kuchina’mba bantu bakamwena mungi bintu byo aubilenga. Bino akya kyamwekele kyafwainwe mambo awa muntu mwalupukile ndemona ye wafwainwe kushimuna ku boba bantu Yesu bo akonsheshe kubula kufikako. Kabiji kushimuna kwa yewa muntu ku bantu kwayukanyikishe bulume buji ne Yesu bwa kuba bintu byawama, ne kufumyapo luzhinauko lwakonsheshe kwikala na bantu pa mambo a byafwile bankumba.

Byo akokejile byamukambizhe Yesu, awa muntu mwafumine ndemona wayile. Watatwile kusapwila monse mu Ndekapoli bintu byonse Yesu byo amubijile, ne bantu bakuminye bingi. Mateo 8:28-34; Mako 5:1-20; Luka 8:26-39; Lumwekesho 20:1-3.

▪ Mambo ka Yesu o atelejile muchima awa muntu umo wajinga na ndemona bino saka bajinga babiji?

▪ Ñanyi kintu kimwesha’mba bandemona bayuka’mba bakebataya mu kalengwa kabula kupela?

▪ Mambo ka bandemona o batemenwa kutwela mu bantu ne banyama?

▪ Mambo ka Yesu o akambizhizhe awa muntu wajinga na ndemona kuba’mba wafwainwa kubula bantu pa mambo a kintu kyo amubijile?