kafulumende watendekele kukambizha bena Kilishitu kubako bisho byaubiwanga mu bupopweshi bwa Bufumu. Kikale kino kyaubiwenga nangwa ne, mu 112 C.E., byonka byo kyanembwa mu nkalata yanembejilwe Trajan waambiwapo kuntendekelo ya uno mutwe, Pliny wakambizhenga amba bena Kilishitu ba mu Bitinya bobengako bino bisho.

Trajan wamutakaikile bingi Pliny pa mambo a jishinda jo apwishishangamo mambo o bamuletelanga, kabiji wakambizhe kwipaya bena Kilishitu bakananga kupopwela balesa ba bena Loma. Trajan wanembele amba: “Pano bino umvwe muntu wakana kwikala mwina Kilishitu, kabiji wamweshatu ne patoka kuba’mba kine wakana kupichila mu kuswa balesa betu, wafwainwa kulekelwa mambo panyuma ya kulapila.”

Bena Loma kechi bakonsheshe kuswa bupopweshi bwakebelenga bantu babo kulondelatu bintu byo bwafunjishenga ne. Inge kya kuba balesa ba bena Loma bakaine, nga Lesa wa bena Kilishitu wakonsheshe kuswa byepi? Balangulukile kuba’mba kupopwela balesa ba Bufumu kwamwesheshenga kuba’mba banemekele bumulwilantanda. Onkao mambo, kukana kupopwela bano balesa bekumonanga amba popamotu ne kusatukila kyalo. Kwesakana na bikimwene Pliny, kechi kyafwainwe kukanjikizha bena Kilishitu kukokela uno mukambizho ne. Mambo ku bena Kilishitu kuba bino kwakonsheshe kumwesha kubula bukishinka kwi Yehoba, kabiji bena Kilishitu batanshi bavula basakanga kufwa kukila kupopwela mfumu.

Twakonsha kufunjilako ka lelo jino? Mu byalo bimo, bangikazhi bebambila kupana mushingi ku bipashañano bya kyalo. Byo tuji bena Kilishitu, tunemeka buntangi bwa makafulumende a bantu. (Loma 13:1) Pano bino umvwe kwaikala bya kusekelela byavwangamo kupana mushingi ku mabandela a kyalo, twatundaikwa ne Yehoba Lesa kumwingijilatu aye yenka ne kulondela lujimuno luji mu Mambo anji lwa kuba’mba, “chinai kupopwela bankishi,” ne ‘kwilama [atweba bene] ku bankishi.’ (1 Ko. 10:14; 1 Yoa. 5:21; Na. 1:2) Yesu waambile’mba: “Ukapopwela Nkambo Lesa wobe ne kumwingijila aye yenka.” (Luka 4:8) Onkao mambo, twayai tutwajijile kwikala bakishinka kwi Lesa ye tupopwela.

Mambo ka o Twafwainwa Kunemekela

Bakikulumpe?

KU MUKUZHO wa kitulu kya California, ku U.S.A., kuji kichi kyo bakopa bipikichala byavula bingi kukila bichi byonse mwaya ntanda. Kino kichi kitelwa amba Kichi kya Sipulesi. Kyashimunwa kuba’mba kino kichi kyabanda kukila pa myaka 250. Pa kuba’mba kino kichi kyawama kikose, bekita bingi muchima mu mashinda avula. Kyakumwenako, bekikosesha na ntambo ne na mabwe kunshi yakyo.

Kino Kichi kya Sipulesi kyakonsha kwituvululamo pa mambo a bena Kilishitu bakikulumpe bo tuji nabo, bamwesha muchima wa kuchinchika. Jishinda jimo janema jo bobilamo bino ke kupichila mu kusapwila mambo awama. Ngauzhi Yoela waambijile jimo amba “bakote” bakashimunanga byambo biji mu Baibolo. (Yoe. 2:28-32; Byu. 2:16-21) Akilangulukai pa maola avula bano bantu o bataya kukwasha bakwabo kufunda “mambo awama a bufumu”! (Mat. 24:14) Bano basapwishi bakikulumpe bamo bachinchika meseko ne makatazhotu akwabo pa myaka yavula bingi. Umvwe kino Kichi kya Sipulesi kyayukanyikwa amba kyabanda bingi kabiji bekikosesha na mabwe ne na ntambo, ko kuba’mba ne atweba twafwainwa kunemeka ne kupa mushingi bakikulumpe bo tuji nabo.

Yehoba Lesa wakambizhe bantu banji bakukala amba: “Umushingike mukote wa mvwi ne kunemeka kilungi kyanji.” (Levi 19:32) Lelo jino mu bakalume ba Yehoba, muji byakumwenako byawama bingi bya bantu bakishinka ‘baenda na Lesa’ pa myaka